பள்ளி பெயர்களில் சாதி... நீதிபதி சந்துரு அறிக்கை என்ன சொல்கிறது?

பள்ளி, கல்லூரி மாணவர்களிடையே சாதி, இன உணர்வுகளால் உருவாகும் வன்முறைகளைத் தவிர்க்க சாதி ரீதியிலான பள்ளிகளை பள்ளிக் கல்வித் துறையின் கீழ் கொண்டுவர வேண்டும் என்று ஓய்வு பெற்ற நீதிபதி கே.சந்துரு தலைமையிலான குழு தனது அறிக்கையை முதல்வர் மு.க.ஸ்டாலினிடம் சமர்ப்பித்துள்ளது.திருநெல்வேலி மாவட்டம் நாங்குநேரியில் உள்ள அரசுப் பள்ளியில், சென்ற ஆண்டு பள்ளி மாணவர் ஒருவரை சக பள்ளி மாணவர்களே அருவாளால் கொடூரமாகத் தாக்கிய சம்பவம் தமிழ்நாடு முழுவதும் பெரும் அதிர்வலைகளை ஏற்படுத் தியது.

இந்தச் சம்பவத்தைத் தொடர்ந்து தமிழகம் முழுவதும் பள்ளி, கல்லூரிகளில் சாதிய மோதல்களைத் தடுப்பதற்காக ஆய்வு செய்து அரசுக்கு பரிந்துரை அளிப்பதற்கு ஓய்வுபெற்ற உயர்நீதிமன்ற நீதிபதி சந்துரு தலைமையில் ஒரு நபர் குழுவை தமிழக அரசு கடந்த ஆண்டு ஆகஸ்ட் மாதம் அமைத்தது. இந்தக் குழு பள்ளி, கல்லூரி மாணவர்களிடையே சாதி, இன உணர்வால் உருவாகும் வன்முறைகளைத் தவிர்ப்பது குறித்து ஆய்வு செய்து வந்தது.

பொதுமக்கள், கல்வியாளர்கள் என பல்வேறு தரப்பினரிடம் இருந்து கருத்துகளையும் கேட்டு அறிந்து, அதனடிப்படையில் தயாரித்த 610 பக்கங்கள் கொண்ட அறிக்கையை சென்னை தலைமை செயலகத்தில் முதல்வர் மு.க.ஸ்டாலினிடம் ஓய்வுபெற்ற நீதிபதி சந்துரு சமர்ப்பித்தார். இதில், உடனடியாக செய்ய வேண்டியவை மற்றும் நீண்டகால செயல் திட்டங்கள் என இரண்டு விதமாக பரிந்துரைகள் அளிக்கப்பட்டுள்ளன.

“கள்ளர் மறுவாழ்வு மற்றும் ஆதி திராவிடர் நலன் என்று பள்ளி பெயர்களில் வரும் வார்த்தைகளை நீக்க நிர்வாக ரீதியாக உத்தரவு பிறப்பிக்க வேண்டும். அரசு பள்ளிகளுக்கு நன்கொடை கொடுப்பவர்கள் அல்லது நன்கொடை கொடுத்தவர்களின் சாதிப் பெயர்கள் பள்ளிகளில் எழுதப்பட்டால் அதை நீக்க வேண்டும். ஏற்கனவே செயல்பாட்டில் இருக்கும் தனியார் பள்ளிகளில் சாதி ரீதியிலான பள்ளி பெயர்கள் இருந்தால் அதையும் நீக்க வேண்டும், நீக்கத் தவறினால் அரசு நடவடிக்கை எடுக்க வேண்டும்.

சாதி ரீதியிலான பள்ளிகளை அரசு நலத் துறைகள் நடத்தி வருவதைத் தவிர்த்து, பள்ளிக் கல்வித் துறையின் கீழ் கொண்டு வர வேண்டும். உயர்நிலைப் பள்ளி மற்றும் மேல்நிலைப்பள்ளி ஆசிரியர்கள் குறிப்பிட்ட கால இடைவெளியில் பணியிடை மாற்றம் செய்யப்பட வேண்டும். அந்தப் பகுதியில் உள்ள பெரும்பான்மை சாதியைச் சேர்ந்தவரை CEO, DEO, BEO மற்றும் தலைமை ஆசிரியராக நியமிக்கக் கூடாது.டி.ஆர்.பி மூலம் ஆசிரியர்களைத் தேர்வு செய்யும்போது, அவர்களது சமூக நீதி தொடர்பாக எண்ணங்கள் பரிசீலிக்கப்பட்டு பணிக்கு தேர்வு செய்யும்போது அதை கருத்தில் கொள்ள வேண்டும்.

பள்ளி, கல்லூரி ஆசிரியர்கள் மற்றும் பணியாளர்களுக்கு சமுதாயப் பிரச்னைகள், சாதிப் பாகுபாடு, பாலியல் வன்முறை தொடர்பான சட்டங்கள், பாலியல் துன்புறுத்தல்கள், போதைப் பொருள் தடுப்பு, எஸ்.சி மற்றும் எஸ்.டிக்கு எதிரான குற்றங்கள் தொடர்பாக விழிப்புணர்வு முகாம் நடத்த வேண்டும். ஆசிரியர் பயிற்சி தொடர்பான பாடத்திட்டம் வடிவமைக்க நிபுணர் குழு அமைத்து, அந்தக் குழு சீரான இடைவெளியில் பாடத்திட்டத்தை ஆய்வு செய்ய வேண்டும்.