பிரிட்டிஷ் இறையாண்மையின் அதிகாரபூர்வ பிறந்தநாள் கொண்டாட்ட நிகழ்வு, ‘ட்ரூப்பிங் த கலர்’. சுமார் 1400 வீரர்கள், 200 குதிரைகள், 400 இசைக்கலைஞர்கள் என பிரம்மாண்ட ராணுவ அணிவகுப்புடன் செமயாய் களைகட்டும் ஓர் அழகிய நிகழ்வு அது. 

அந்நேரம் பக்கிங்ஹாம் அரண்மனையின் பால்கனியில் இருந்தவாறே அரச குடும்பத்தினர் அனைவரும் இந்நிகழ்வைக் கண்டுகளிப்பர். கடந்த 260 ஆண்டுகளாக பாரம்பரியமாக நடைபெற்று வரும் இந்நிகழ்வு சமீபத்தில் கோலாகலமாக லண்டனில் நடந்துமுடிந்தது. இதனை பிரிட்டிஷ் மக்களும் அத்தனை உற்சாகமாகப் பார்த்து மகிழ்ந்தனர்.  

1982ம் ஆண்டு லண்டன் அருகே பெர்க்‌ஷயர் கவுன்டியில் உள்ள ரெட்டிங் நகரில், உயர் நடுத்தர வர்க்க குடும்பத்தில் பிறந்தவர் கேத்தரின் மிடில்டன்.தந்தை மைக்கேல் மிடில்டன் பிரிட்டிஷ் ஏர்வேஸில் விமான செயல்பாடுகளின் அதிகாரியாக பணிசெய்தார். 

தாய் கரோல் அதே ஏர்வேஸில் விமானப் பணிப்பெண்ணாக இருந்தார்.பள்ளிப் படிப்பு முடிந்ததும் மார்ல்பரோ கல்லூரியில் பயின்றார். பின்னர், ஸ்காட்லாந்தில் உள்ள செயின்ட் ஆண்ட்ரூஸ் பல்கலைக்கழகத்தில் எம்.ஏ ஹானர்ஸ் பட்டம் பெற்றார். அங்கு 2001ல் படிக்கும்போதுதான் சகமாணவராக இருந்த இளவரசர் வில்லியமை சந்தித்தார். இருவரும் 2003ல் டேட்டிங்கில் ஈடுபட்டனர்.

இதற்கிடையே கேத்தரின் பல்வேறு அரச கடமைகளைச் செய்து வந்தார். கூடவே அறக்கட்டளை பணிகளையும் முன்னெடுத்தார். 2022ல் ராணி எலிசபெத், இறந்ததும் வேல்ஸ் இளவரசராக இருந்த சார்லஸ் 2023ல் அரசராக அரியணை ஏறினார். இதனால், 2022ல் அவரின் மகன் வில்லியம், வேல்ஸ் இளவரசர் ஆனார். 

கேத்தரின் வேல்ஸ் இளவரசி என்ற பட்டத்தை பெற்றார். இந்நிலையில்தான் இந்த ஆண்டின் தொடக்கத்தில் கென்சிங்டன் அரண்மனையின் செய்திக் குறிப்பு, இளவரசி கேத்தரின் அடிவயிற்றில் அறுவை சிகிச்சை மேற்கொள்ள இருப்பதாக அறிவித்தது. தொடர்ந்து லண்டன் கிளினிக்கில் அனுமதிக்கப்பட்டார்.

பின்னர் அனைத்து பொது நிகழ்ச்சிகளையும், அரச பணிகளையும் தள்ளிவைத்தார். இதனால் பல்வேறு சந்தேகங்களும் வதந்திகளும் உலா வந்தன. அதன்பிறகே மார்ச் 22ம் தேதி அறுவை சிகிச்சைக்குப் பிறகான பரிசோதனையில் தனக்கு புற்றுநோய் கண்டறியப்பட்டதாக வீடியோ வெளியிட்டார். இப்போது அவர் பொதுவெளியில் தோன்றியுள்ளார். 

கேத்தரின் ரொம்பவே ஆக்டிவ்வாக இருப்பதாகச் சொல்கின்றன சில தகவல்கள். ‘‘கேட் முன்பைவிட உற்சாகமாக இருக்கிறார். அவரால் பலரைப் பார்க்கமுடியவில்லைதான். ஏனெனில், அவர்களின் ஆறுதலும், இரக்கமும் மேலும் தன்னை நோயாளியாக்கிவிடுேமா என்கிற பயமே காரணம்’’ என்கின்றன அந்தத் தகவல்கள்.

அவரின் நெருங்கிய உள்வட்டம் என்பது மிகச்சிறியது. அம்மா கரோல், சகோதரி பிப்பா ஆகியோர் மட்டும்தான். அவர்களே எப்போதும் உடனிருப்பார்கள். அவர் இந்த ‘ட்ரூப்பிங் த கலர்’ ஒத்திகை நிகழ்ச்சிக்குக்கூட வரவில்லை. அதற்கு மன்னிப்பும் கோரியிருந்தார். 

அவர் அரச பணிக்குத் திரும்புவாரா, பொது நிகழ்வில் பங்கேற்பாரா என்கிற கேள்விகள் இருந்து வந்தன. இப்போது, ‘ட்ரூப்பிங் த கலர்’ நிகழ்வுக்கு வந்ததன் மூலம் அந்தக் கேள்விக்கு பதிலளித்துள்ளார் இளவரசி கேத்தரின். இதனால், இங்கிலாந்து மக்கள் உற்சாகமாகியுள்ளனர்.இருந்தும் அவரின் உடல்நிலையைப் பொறுத்தே பொதுநிகழ்வில் கலந்துகொள்வதும், அரச கடமைகளும் அமையும் என்கின்றன செய்திகள்.