ஒரு சுரங்கமும் 41 தொழிலாளர்களும்!

யமுனோத்ரி, கங்கோத்ரி, பத்ரிநாத், கேதார்நாத்... இந்த நான்கு இடங்களுமே இந்துக்களுக்கு மிகமிக புனிதமான இடங்கள்.இந்த நான்கு பகுதிகளையும் சார்தாம் என்ற நெடுஞ்சாலைத் திட்டத்தின்கீழ் இணைக்கத் திட்டமிட்டது உத்தரகண்ட் அரசு. ‘ச்சார்’ என்றால் இந்தியில் நான்கு.

இந்தப் பணியின் ஒரு கட்டமாக, உத்தரகாசி மாவட்டத்தில் பிரம்மகால், யமுனோத்ரியை இணைக்கும் நெடுஞ்சாலையில், சில்க்யாரா - தண்டல்காவ்ன் இடையே மலையைக் குடைந்து சுரங்கப்பாதை அமைக்கும் பணி ஆரம்பமானது. இந்த சுரங்கப்பாதை உருவானால், 26 கிலோ மீட்டர் தொலைவு மிச்சமாகும்.

கடந்த 12ம்தேதி, தீபாவளி அன்று சுரங்கத்தின் உள்ளே நாற்பது தொழிலாளர்கள் சுறுசுறுப்பாக வேலை செய்து கொண்டிருந்த நேரம், ‘டமார்’ என்று ஒரு சத்தம்.சில்க்யாரா நுழைவாயிலில் இருந்து 600 அடி தொலைவில் 120 அடி நீளத்துக்கு திடீரென சுரங்கத்தின் கூரையில் சரிவு ஏற்பட்டு காங்கிரீட்டும், கற்களும் சரிந்து விழுந்தன. சரிந்த பாறைகளும், கற்களும், மண்ணும் உள்ளே இருந்த நாற்பது தொழிலாளர்களுக்கும், வெளிஉலகத்துக்கும் இடையே பல மீட்டர் நீளமுள்ள இடைவெளியை ஏற்படுத்தி விட்டன.

இந்த இடிபாடுகளை அகற்றினால்தான் தொழிலாளர்கள் இருக்கும் இடத்தை தொட முடியும் என்ற நிலை.அதிகாரிகள் திகைத்துப் போனார்கள். உடனடியாக மாநில பேரிடர் மீட்புப்படைக்குத் தகவல் பறந்தது. அவர்கள் ஓடோடி வர, முதல் வேலையாக தொழிலாளர்கள் சிக்கிக் கிடந்த இடத்துக்கு அவசர அவசரமாக, மின்னல் வேகத்தில் ஒரு துளை போடப்பட்டது. அதன் வழியே உள்ளிருப்பவர்கள் தடையின்றி சுவாசிக்க ஆக்சிஜன் காற்று செலுத்தப்பட்டது.

நல்லவேளையாக உள்ளே இருந்த மகாதேவ் என்ற தொழிலாளரிடம் வாக்கிடாக்கி இருந்தது. அதன்மூலம் தொலைத்தொடர்பு ஏற்படுத்தப்பட்டது. ‘உள்ளே வெளிச்சம் இருக்கு. காத்து இருக்கு. எங்களை எப்படியாவது மீட்டு வெளியே எடுத்துடுவீங்க இல்லையா?’ என்றார் மகாதேவ்.

மகாதேவின் அந்த வாக்கிடாக்கி ஆடியோ பேச்சு சமூகவலைதளங்களில் வைரலாகப் பரவியது.சுரங்கத்தின் உள்ளே சிக்கிய 41 தொழிலாளர்களில் ஜார்க்கண்ட் மாநிலத்தவர்கள்தான் அதிகம். அவர்கள் மட்டும் மொத்தம் 15 பேர். தவிர, உத்தரப்பிரதேசம் (8), மேற்கு வங்கம் (5), ஒடிசா (5), பீகார் (4), இமாச்சல், அசாமைச் சேர்ந்த தொழிலாளர்களும் அடங்குவார்கள்.

துளை வழியே தொழிலாளர்களுக்கு உணவு, குடிநீர், கூடவே தேவையான மருந்துகளை அனுப்பும் வேலை ஒருபக்கம் நடக்க, மறுபக்கம் குவிந்து கிடக்கும் மண், பாறைகளை அப்புறப்படுத்தி, வழியை உருவாக்கி 41 பேரையும் மீட்கும்பணி சுறுசுறுப்பாகத் தொடங்கியது.மாநில மீட்புப்படை அதிகாரி மணிகந்த் மிஸ்ரா தலைமையில் 200 பேர் இந்த அதிரடி வேலையில் இறங்கினார்கள். உள்ளே காற்று, போதிய வெளிச்சம் இருந்தாலும் எவ்வளவு சீக்கிரம் முடியுமோ அவ்வளவு சீக்கிரம் தொழிலாளர்களை மீட்கும் முயற்சியில் இறங்கினார் மீட்புப் பணி பொறுப்பாளர் தீபக் பாட்டீல்.

சுரங்கத் தொழிலாளர்களை மீட்க இடிபாடுகள் வழியே துளையிடும் வேலை நடந்தபோது இயந்திரங்களின் அதிர்வால் இப்போது மீண்டும் ஏற்பட்டது ஒரு மண்சரிவு.
14ம்தேதி வரை 6 முறை அடுத்தடுத்து இப்படி மண் சரிவுகள். இதனால் அதிர்ந்து போனார்கள் மீட்புப் படையினர். இந்த சரிவுகளால், தோண்ட வேண்டிய பகுதியின் நீளம் இன்னும் 70 மீட்டர் அதிகமாகிப் போனது.