தமிழ் சினிமாவின் கவனிக்கத்தக்க இயக்குநர்களில் ஒருவர் ராஜுமுருகன். ‘ஜோக்கர்’, ‘குக்கூ’, ‘ஜிப்ஸி’ என இவருடைய படங்கள் ரசிகர்கள் மத்தியில் அதிர்வுகளை ஏற்படுத்தியவை. தன் படத்துக்காக தேசிய விருது பெற்றவர்.

எழுத்தாளர், சமூக செயற்பாட்டாளர், இயக்குநர் என பல தளங்களில் இயங்கி வரும் இவர் இப்போது கார்த்தியின் ‘ஜப்பான்’ படத்தை இயக்கி முடித்துள்ளார். தீபாவளி சரவெடியாக வெடிக்கப் போகும் ‘ஜப்பான்’ இறுதிக் கட்ட வேலைக்காக எடிட்டர் பிலோமோன் எடிட்டிங் ஸ்டூயோவில் ஃபைனல் கட் சொல்லிக்கொண்டிருந்த  ராஜுமுருகனை சந்தித்தோம்.

என்னுடைய படங்களில் எளிய மனிதர்களின் உலகம், அவர்களின் வாழ்க்கையில் உள்ள காதல், அன்பு, அரசியல் போன்ற அம்சங்கள் கதைக் களமாக இருக்கும். அப்படி இது என்னுடைய படங்களில் இருந்து வேறொரு தளத்தில் இருக்கும். சொல்லப்போனால் எனக்கே இது புது அனுபவமாக இருந்தது.இது முழுமையான பொழுது போக்குப் படமாக இருக்கும். 

படத்தோட பட்ஜெட், கார்த்தி சாருக்கான ரசிகர்கள், வணிகம் என எல்லா அம்சங்களையும் கருத்தில்கொண்டுதான் இந்தப் படம்  உருவாகியுள்ளது. ஒரு படைப்பாளியாக எனக்கான நியாயத்தோடும், கார்த்தி சார் படங்களுக்கான நியாயத்தோடும் படம் பிரமாதமாக வந்துள்ளது.

சமூகத்துக்கான குரலாக இருக்க வேண்டும் என்ற அடிப்படையில்தான் நான் சினிமாவுக்கு வந்தேன். கருத்தியல் ரீதியான என்னுடைய படைப்பை கார்த்தி சார் மாதிரியான பெரிய நடிகர் எடுத்துச் செல்லும்போது அதற்கு பலம் அதிகரிக்கும். அந்த எண்ணத்தின் அடிப்படையில்தான் கார்த்தி சாரிடம் போனேன்.

ட்ரீம் வாரியர்ஸ் எஸ்.ஆர்.பிரபு, பிரகாஷ் இருவரும் எப்போது சந்தித்தாலும் ‘பெரிய படம் பண்ணுங்க, அதுக்கேற்ற மாதிரி கதை எழுதுங்க’னு சொல்வார்கள். சினிமாவில் இதைப் பண்ணிடணும், அதைப் பண்ணிடணும் என்ற இலக்கு எனக்கு இருந்ததில்லை. என்னை பாதித்தவைகளைத்தான் படமாகப் பண்ணுகிறேன்.

ஆரம்பத்தில் ‘ஜோக்கர்’ அவருடன் பண்ணுவதாக இருந்தது. அந்தக்  கதையின் முந்தைய வடிவத்தை அவரிடம்தான் சொல்லியிருந்தேன். கார்த்தி சாருக்கு கதை பிடித்திருந்தாலும் அவருக்கான பிசினஸ் எல்லைக்குள் இல்லாததால் அப்போது எங்களால் சேர்ந்து படம் பண்ண முடியவில்லை.பிறகு, கார்த்தி சாரை மனதில் வைத்து ஒரு கதை எழுதினேன். 

அது அவருக்கு செட்டாகவில்லை. அடுத்ததாக ஹீரோவை மனதில் வைக்காமல் ஒரு கதையை எழுதினேன். அதை ட்ரீம் வாரியர்ஸுக்கு கொடுத்தேன். அவர்கள் எனக்குத் தெரியாமலே கார்த்தி சாரிடம் கொடுத்து படிக்கச் சொல்லியிருக்கிறார்கள்.

இதுல ஹீரோயினுக்கும் முக்கியத்துவம் இருக்கும். அதைப் புரிஞ்சு பண்ணும் இடத்தில் அனு இம்மானுவேல் சரியாக இருந்தார். கார்த்தி சார், அனு இருவருக்கும் லவ், டூயட் உண்டு. ஆனால், அது ஆடியன்ஸ் நினைக்கிற மாதிரியான காதலாக இருக்காது.

‘ஜெயிலர்’ சுனில் முக்கியமான கேரக்டர் பண்றார். காமெடி, வில்லன், குணச்சித்திர வேடம் என சுமார் 600 படங்கள் பண்ணியவர். எளிமையாக பழகுவார். அனுபவம் ஒருவரை கனிவுள்ளவராக மாற்றிவிடும். அதை அவரிடம் பார்த்தேன். நல்ல மனிதருடன் பழகினோம் என்ற திருப்தி கிடைச்சது.

கேமராமேன் விஜய் மில்டன் சார் போலீஸ் கேரக்டர்ல வர்றார். பல வருட நண்பர். சினிமாவில் அவர் மாதிரி தன்மையான ஒருவரைப் பார்ப்பது அரிது. வாகை சந்திரசேகர் சார் 300 படங்கள் பண்ணியவர். அவரை வேறு ஒரு கோணத்தில் காட்ட வேண்டும் என்று முடிவு பண்ணினேன். அவரும் அதைப் புரிஞ்சு ஒத்துழைப்பு கொடுத்தார்.

பவா செல்லதுரை இலக்கிய வட்டார நண்பர். அவர் குரல் மீது எனக்கு எப்போதும் ஈர்ப்பு உண்டு. அவரையும் வழக்கமாகக் காண்பிக்காமல் வேறு ஒரு கோணத்தில் காண்பித்துள்ளேன். அந்தக் கேரக்டரில் பவா சார் நடித்தால் எப்படி இருக்கும்னு முதலில் கார்த்திக் சார்தான் கேட்டார். ஜித்தன் ரமேஷ் கேரக்டர் ஆச்சர்யப்படுத்தும்.

ட்ரீம் வாரியர்ஸ் எஸ்.ஆர்.பிரபு, பிரகாஷ் ஆகியோர் என்னுடைய தயாரிப்பாளர்கள் மட்டுமல்ல. நண்பர்கள். ‘ஜோக்கர்’ அவர்களுக்கு பண்ணினேன்.என்னுடைய எல்லா ஸ்கிரிப்ட்டையும் நட்பின் அடிப்படையில் அவர்களிடம்  கொடுப்பேன். படம் பண்ணவில்லையென்றாலும் தொடர்ந்து நட்பு பாராட்டுவோம்.