ஹமாஸ்...யார் இவர்கள்?

இஸ்ரேல் - பாலஸ்தீனம் போர் உச்சகட்டத்தை எட்டியுள்ளது. கடந்த பத்து நாட்களாக நடந்துவரும் போரில் இதுவரை சுமார் 2,300 பாலஸ்தீனர்கள் கொல்லப்பட்டுள்ளனர். இதில், 700க்கும் மேற்பட்டவர்கள் குழந்தைகள். இஸ்ரேல் தரப்பில் 1,300 பேர் இறந்துள்ளனர்.தற்போது காஸாவில் இஸ்ரேல் ராணுவம் நுழைந்துள்ளது. ஹமாஸ் படையினரை ஒழிக்கும்வரை விடப்போவதில்லை என கங்கணம்கட்டி நிற்கிறது இஸ்ரேல்.

இந்நிலையில், இஸ்ரேல், பாலஸ்தீனம் வரலாறு பற்றி படிப்பவர்கள், யார் இந்த ஹமாஸ்... அவர்களுக்கும் பாலஸ்தீனத்திற்கும் என்ன சம்பந்தம்... என்பதையும் நெட்டில் தேடித்தேடி படித்து வருகின்றனர். பொதுவாகவே, பாலஸ்தீனம் என்றாலே நம் நினைவுக்கு வரும் பெயர் யாசர் அராஃபத். ஆனால், அவர் மறைவிற்குப்பிறகு அவர்போல் முகம் அறிந்த தலைவர்கள் யாரும் உருவாகவில்லை. ஹமாஸ் அமைப்பின் பெயரே பெரிதாக அறியப்படுகிறது.

யார் இவர்கள்?

Harakat al-Muquwamah al-Islamiya (Hamas) என்பதன் சுருக்கமே ‘ஹமாஸ்’. இதன் அர்த்தம் இஸ்லாமிய எதிர்ப்பு இயக்கம் என்பதாகும். இதற்கு அரேபிய மொழியில், ‘வைராக்கியம்’ எனப் பொருள்படும். ஆனால், இஸ்ரேலியர்களின் ஹீப்ரு மொழியில் என்ன அர்த்தம் தெரியுமா? ‘தீய’ எனப் பொருள்படுகிறது. எப்படி இப்படியொரு பெயரை யோசித்தார்களோ தெரியவில்லை.  
இதனை 1987ம் ஆண்டு ஷேக் அகமது யாசின் என்பவர் உருவாக்கினார். இவர் அப்போது பிரிட்டிஷின் கட்டுப்பாட்டில் இருந்த பாலஸ்தீனத்தின் அஷ்கெலோன் நகருக்கு அருகே உள்ள அல்-ஜூரா என்ற சிறிய கிராமத்தில் பிறந்தவர். தற்போது இஸ்ரேலின் கட்டுப்பாட்டில் உள்ளது இந்த நகரம்.

1948ம் ஆண்டு இஸ்ரேல்- அரபு போரின்போது காஸாவிற்கு அகதியாக வந்தவர்தான் அகமது யாசின். தன் 12வது வயதில் நண்பருடன் மல்யுத்த விளையாட்டு ஆடியபோது முதுகுத் தண்டில் காயம் ஏற்பட, வாழ்நாள் முழுவதும் அவர் சக்கர நாற்காலியில் இருக்கும்படி ஆனது. இதிலிருந்தபடியேதான் அவர் ஹமாஸ் அமைப்பை உருவாக்கி, செயல்படுத்தினார் என்பதை எல்லோரும் நம்புவது சிரமம்.   

எகிப்து தலைநகர் கெய்ரோவில் உள்ள அல்-அசார் பல்கலைக்கழகத்தில் பயின்றார் யாசின். ஆனால், உடல்நிலை பிரச்னை காரணமாக வீட்டிலேயே படிக்க வேண்டியதானது. மதம், தத்துவம், அரசியல், சமூகவியல் சார்ந்து படித்தார். பின்னர் ஆசிரியராகவும், போதகராகவும், சமூக சேவகராகவும் பணியாற்றினார். ஆனாலும் அவர் எப்போதும் மதத் தலைவராகவே அறியப்படுகிறார். அவர் கெய்ரோவில் படிக்கும்போது முஸ்லிம் சகோதரத்துவ அமைப்பினால் ஈர்க்கப்பட்டு அதில் இணைந்தார்.

அதன் கிளையை பாலஸ்தீனத்தில் அமைக்க தீவிரமாக செயல்பட்டார். இதற்கிடையில், 1973ல் அல்-முஜாமா அல்-இஸ்லாமியா என்ற மதத் தொண்டு நிறுவனத்தை உருவாக்கினார். அதாவது இஸ்லாமிக் சென்டர் என்பது இதன் அர்த்தம். இந்த மையத்தை 1979ல் இஸ்ரேல் அங்கீகரித்தது. இதனால், யாசர் அராஃபத்தின் அரசியல் கட்சியான ஃபதா இயக்கத்தின் செல்வாக்கு மேற்குக் கரையிலும் காஸா பகுதியிலும் குறையும் எனக் கூறப்பட்டது. ஆனால், அப்போது அப்படி எதுவும் நடக்கவில்லை.