டார்க்நெட்

18. ரேன்சம்வேர் அட்டாக் என்னும் எமன்!

ஒரு நாள் உங்கள் போனைத்திறந்து பார்த்தால் அதில் எதுவுமே இல்லை... அதாவது எதையுமே போன் காட்டவில்லை. மாறாக ஒரு சிறு செய்தி... ‘உங்கள் போனை நாங்கள் லாக் செய்து விட்டோம். பாஸ்வேர்ட் வேண்டுமென்றால் எங்களுக்கு 100 டாலர் பணம் கொடுக்க வேண்டும். பணம் அனுப்பும் வழி கீழே கொடுக்கப்பட்டுள்ளது...’ என்று இருக்கிறது.  

நீங்கள் என்ன செய்வீர்கள்?

பணம் கட்டினால்தான் பாஸ்வேர்ட். வேறு வழி என்றால்... அது ஒன்றே ஒன்றுதான். நீங்கள் புது போன்தான் வாங்க வேண்டும். ஏனெனில் பழைய போன் வேலை செய்யாது. ஒருவேளை வேலை செய்ய வைத்தாலும் அதில் உங்களின் பழைய டேட்டாக்கள் இருக்காது; அழிந்திருக்கும். ஒருவேளை உங்கள் போனில் நீங்கள் ஓரளவு பேக்கப் செய்து வைத்திருந்தால் தப்பித்தீர்கள். இல்லை என்றால் உங்கள் போன் இனி உங்களது இல்லை.

இப்போது இதேபோல் உங்கள் தனிப்பட்ட கணினியையோ அல்லது பெரிய பெரிய நிறுவனங்களின் கணினிகளையோ ஹேக் செய்துவிட்டு, பணம் கொடுத்தால்தான் உங்களுக்கு அந்த பாஸ்வேர்ட் கிடைக்கும் என்று சொன்னால் எப்படிஇருக்கும்..?  

ஏனெனில் பெரிய பெரிய நிறுவனங்களுக்கெல்லாம் ஒரு நிமிடம் என்பது பல லட்ச ரூபாய்.இதுபோன்ற சைபர் தாக்குதல்களை ரேன்சம்வேர் (Ransomware) அட்டாக் என்று அழைப்பார்கள். ரேன்சம் என்றால் ஆங்கிலத்தில் பணயம் பிடித்தல் என பொருள். ஒருவரை கடத்தி வைத்துக் கொண்டு பணயத்தொகை கேட்பார்கள் அல்லவா... அதே கதைதான். ஆனால், விஷயம் இங்கு சைபர் வடிவத்தில் அதைச் செய்கிறார்கள்.

இந்த ரேன்சம்வேர் அட்டாக் என்பது மிகவும் தலைவலி பிடித்தது. 2022ல் கூட சைபர் கிரிமினல்கள் இந்த ரேன்சம்வேரை பயன்படுத்தி பல லட்சம் டாலர்கள் சுருட்டி விட்டார்கள்.