இன்றைய சூழ்நிலையில் மருத்துவப் படிப்பு எவ்வளவு சிரமமானது என்பது நம் எல்லோருக்கும் தெரியும். மாணவ - மாணவிகள் நீட் தேர்வில் தேர்ச்சிபெற்று மருத்துவக் கல்லூரிக்குள் நுழைவதே அத்தனை கஷ்டம். இதில், தமிழ் வழியில் படித்து உள்நுழையும் மாணவ - மாணவிகளின் நிலை பற்றி சொல்ல வேண்டியதில்லை. 

இதில், அவர்கள் முதலாம் ஆண்டில் அடியெடுத்து வைத்ததும் எதிர்கொள்ளும் முதல் பிரச்னை ஆங்கில வழிக் கல்வி.மருத்துவப் படிப்பைப் பொறுத்தவரை முதலாம் ஆண்டில் தேர்ச்சி பெறவில்லை என்றால் அந்த மாணவர்கள் இரண்டாம் ஆண்டிற்குச் செல்லமுடியாது. அடுத்த செட் மாணவர்களுடன் முதலாம் ஆண்டு படித்து தேர்ச்சி பெற்ற பிறகே செல்லமுடியும்.

இந்த வழிகாட்டிக் குழுவிற்கான முதல் விதையை விதைத்தவர். இந்தக் குழுவின் திட்டமிடுதல் மற்றும் செயல்படுத்துதல் வேலை இவருடையது. தற்போது தேனி மருத்துவக் கல்லூரியின் சமூகம் சார்ந்த மருத்துவப் பிரிவில் பேராசிரியராகப் பணியாற்றி வருகிறார்.

 ‘‘முதல் விதையை நான் தூவியிருந்தாலும் இது ஒரு கூட்டு முயற்சிதான். எங்க குழுவுல தமிழகம் முழுவதும் உள்ள மருத்துவக் கல்லூரிகளின் பேராசிரியர்கள் இருக்காங்க. இவர்களுடன் ஓய்வுபெற்ற துறை சார்ந்த நிபுணர்களும், தற்போதைய மருத்துவக் கல்லூரி முதல்வர்களும் இருக்காங்க. அதனாலயே இந்தப் பணி சாத்தியமாகுது.

‘‘எனக்கு சொந்த ஊர் திருச்செங்கோடு. நான் பத்தாம் வகுப்பு வரை திருச்செங்கோடு அரசுப் பள்ளியில் தமிழ் வழியில்தான் படிச்சேன். பிறகு, மேல்நிலைக் கல்வியை அதே அரசுப் பள்ளியில் ஆங்கில வழியில் முடிச்சேன். 

அப்படியிருந்தும் நான் எம்பிபிஎஸ் படிக்கிறப்ப முதலாம் ஆண்டு கஷ்டமாக இருந்துச்சு. இது 1990கள்ல நடந்தது. நான் எம்பிபிஎஸ்ஸை பிஎஸ்ஜி மருத்துவக் கல்லூரியில் அரசு ஒதுக்கீட்டில் படிச்சேன். பிறகு, அண்ணாமலைப் பல்கலைக்கழகத்தில் அரசு இடஒதுக்கீட்டில் எம்.டி பண்ணினேன். படிப்பில் தங்கப்பதக்கமும் வாங்கினேன்.

அப்படியாக, தமிழ் வழியில் இருந்து வரும் மாணவர்களுக்கு இந்த அறிவைப் பகிரும் பணியைத் துவக்கினோம். இதற்கு, நான் முன்னாடியே சொன்னமாதிரி மருத்துவர்களும், துறை சார்ந்த நிபுணர்களும் உறுதுணையாக இருந்தாங்க. தவிர, என் மனைவி உமாவும் சப்போர்ட் கொடுத்தாங்க. 

அவங்க தேனி அரசு செவிலியர் கல்லூரியில் பேராசிரியராக இருக்காங்க.

இந்த மாணவர்களை ‘தமிழ் உறவுகள் வழிகாட்டி மருத்துவக்குழு’ என்ற வாட்ஸ்அப் குழு மூலம் ஒருங்கிணைத்தோம். இப்ப ஒவ்வொரு ஆண்டும் ஐந்நூறு மாணவ - மாணவிகள் பயனடைஞ்சிட்டு வர்றாங்க. இது மூன்றாவது ஆண்டு. வகுப்புகள் போயிட்டு இருக்கு...’’ என்கிறவர், நிதானமாகத் தொடர்ந்தார்.

 ‘‘பொதுவாக, மருத்துவக் கல்லூரி வந்ததும் பாடங்கள் எல்லாம் கண்ணைக் கட்டிவிட்டமாதிரிதான் இருக்கும். இதுல பிரேதத்தை வைத்து மாணவர்களுக்கு பாடம் எடுப்போம். அந்தப் பிரேதத்தைப் பார்த்ததும் சில மாணவர்களுக்கு அயர்ச்சியோ அல்லது ஒவ்வாமையோ கூட ஏற்படும்.

அதேபோல இந்தக் குழுவில் தமிழ் வழியில் படித்த மாணவ - மாணவிகள் மட்டுமில்லாமல் மற்ற மாணவர்களும் இஷ்டப்பட்டால் சேர்ந்துக்கலாம். 

யாருக்கும் இதில் தடை கிடையாது. இந்தக் குழுவில் தனியார் மருத்துவக் கல்லூரியில் படிப்பவர்களும் இருக்காங்க...’’ என அவர் நிறுத்த, உமா திருவேங்கடம் தொடர்ந்தார். இந்தக் குழுவின் ஒருங்கிணைப்பாளர், இணைய வழியில் மாணவர்களையும், ஆசிரியர்களையும் இணைக்கும் பணி இவருடையது.

இதுல ஒவ்வொரு பாடத்திற்கும் நான்கு ஆசிரியர்கள் இருப்பாங்க. அவங்க நான்கு பேரும் ஒவ்வொரு வாரம்னு பிரிச்சிருப்பாங்க. எல்லோருமே எந்த ஒரு எதிர்பார்ப்பும் இல்லாமல் தன்னார்வமாக இந்தப் பணியை மேற்கொள்றாங்க. 

ஓய்வுபெற்ற மருத்துவர்களும் தன்னார்வமாக வந்து வகுப்புகள் எடுக்குறாங்க. மாணவர்ளுக்கு தெளிவாகப் புரியும்படி வகுப்புகளை நடத்துவாங்க. பொதுவாக, கல்லூரிகளில் ஆங்கிலத்துலதான் வகுப்புகள் நடக்கும். அதனால, தமிழ் வழி மாணவர்கள் பயத்தில் சந்தேகங்கள் கேட்க மாட்டாங்க. தயக்கப்படுவாங்க. எப்படி படிக்கிறதுனு யோசிப்பாங்க.

தினமும் கூகுள் மீட்லதான் வகுப்புகள் நடக்கும். இதை குறைஞ்சது 200 மாணவர்களாவது அட்டெண்ட் பண்ணுவாங்க. இப்ப முதலாம் ஆண்டு மாணவர்களுக்கு மட்டுமில்லாமல் இரண்டாமாண்டு, மூன்றாமாண்டு மாணவர்களுக்கும் பண்றோம். முதலாம் ஆண்டு முடிச்சிட்டாலே எளிதாக பிக்அப் பண்ணிடுவாங்கதான். இருந்தும் நாங்க வகுப்புகள் எடுக்குறோம்.

எங்க குரூப்ல உள்ள மருத்துவக் கல்லூரி முதல்வர்கள், ‘முன்னாடி இந்த 7.5 ஒதுக்கீட்டுல வந்த மாணவர்கள் எப்படி பிக்அப் பண்ணுவாங்களோனு கவலையா இருக்கும். இப்ப அவங்கதான் நல்லா படிக்கிறாங்க. 

நிறைய ஆர்வம் வந்திருக்கு’னு சொல்றாங்க. இது எங்கள் மருத்துவக் குழுவிற்குக் கிடைச்ச பெருமையாக நினைக்கிறோம். இந்த ஆண்டு சில மாணவர்கள் ஆங்கிலம் ரொம்ப சிரமமாக இருக்குனு சொன்னாங்க. அதனால, ஸ்போக்கன் இங்கிலீஷ் வகுப்பிற்கும் ஏற்பாடு செய்திருக்கோம்...’’ என்கிற உமாவைத் தொடர்ந்தார் மருத்துவர் திருவேங்கடம்.

‘‘இப்பதான் முதலாம் ஆண்டு தேர்வு எழுதப் போறேன். நான் சேலத்துல அரசுப் பள்ளியில் தமிழ் வழியில் படிச்சேன். ஆரம்பத்துல தெரியாம எம்பிபிஎஸ் சேர்ந்துட்டோமோனு கூட தோணுச்சு. அந்தளவுக்குப் படிக்க சிரமமாக இருந்தது. இந்த குரூப்ல சேர்ந்தேன். இப்ப எனக்கு ரொம்ப பயனுள்ளதாக இருக்கு. 

கல்லூரியில் எல்லோருக்கும் பொதுவாக நடத்துவாங்க. அங்க சந்தேகம் கேட்க சிரமமாக இருக்கும். தவிர, வகுப்புகள் ஆங்கிலமாக இருக்கும். இங்க அதை தமிழ்ல சொல்லி புரிய வைக்கிறாங்க. பிறகு, ஆங்கிலத்துலயும் சொல்வாங்க. இதனால, அதை எளிதாக புரிய முடியுது...’’ என்கிறார் சேலம் அரசு மோகன் குமாரமங்கலம் மருத்துவக்கல்லூரி மாணவர் தினேஷ்.