சிறியவர்கள் முதல் பெரியவர்கள் வரை ஸ்ட்ரெஸ்...என்ன செய்யவேண்டும்...

இன்று மனஅழுத்தம் நம் வாழ்வில் ஓர் அங்கமாகவே மாறிவருகிறது. ‘ஒரே ஸ்ட்ரெஸ்ஸா இருக்கு...’ என்பது இப்போது அடிக்கடி கேட்கும் வார்த்தையாகிவிட்டது. சமீபத்தில்கூட பிரபல இசையமைப்பாளரும், நடிகரும், இயக்குநருமானவரின் மகள் மனஅழுத்தம் காரணமாக தற்கொலை செய்து கொண்டதாக செய்திகள் வந்தன. உலகளவிலும் இன்று மனஅழுத்தம் பெரிய பிரச்னையாக உருெவடுத்திருப்பதாகவும், அது ஒருவரை தற்கொலை வரை அழைத்துச் சென்றுவிடுவதாகவும் வேதனை தெரிவிக்கின்றனர் மருத்துவர்கள். குறிப்பாக இந்தியாவில் கோவிட் தொற்றுக்குப்பிறகு மனஅழுத்தம் அதிகரித்திருப்பதாக பல்வேறு அறிக்கைகள் குறிப்பிடுகின்றன.

இந்நிலையில் மனஅழுத்தம் குறித்தும், அதைத் தவிர்க்க நாம் செய்ய வேண்டியவை குறித்தும் மனநல மருத்துவர் ராமானுஜம் கோவிந்தனிடம் பேசினோம்.    ‘‘மனம் என்பதே நம் மூளையின் இயக்கம்தான். அதனால் மனதையும், உடலையும் பிரிக்கமுடியாது. நம் சிந்தனை, நம் உணர்வு, நம் நடவடிக்கை இந்த மூன்றும் சேர்ந்ததே மனம். இதை எண்ணங்கள், உணர்ச்சிகள், செயல்கள்னு சொல்லலாம். அதனால், மனம் பாதித்தால் அது உடலை பாதிக்கும். உடலில் பிரச்னை என்றால் அது மனதை பாதிக்கும்.

இந்தக் காலக்கட்டத்தில் மனம், உடல் இரண்டையும் பாதிக்கிற காரணிகள் நிறைய இருக்குது. பெரும்பாலும் மனஅழுத்தம் ஏற்படக் காரணம், அதிக எதிர்பார்ப்புதான். நம்மிடம் அதிகளவு எதிர்பார்ப்பு இருக்கும்போது மனஅழுத்தம் தானாகவே உண்டாகுது. நம்மால் முடியாத ஒரு விஷயம், நாம் நினைத்ததை செய்ய முடியாதபோது ஓர் அழுத்தத்தை உண்டாக்குது. படிக்க முடியாதவனைப் படினு சொன்னால் அது ஓர் அழுத்தம். நாளைக்கு இவ்வளவு படிச்சே ஆகணும் எனும்போது அழுத்தம் இயல்பாகவே வந்திடும்.

கிரிக்கெட்ல ஒரு ஓவருக்கு பத்து ரன்கள் அடிக்கலாம். ஆனா, ஒரு ஓவருக்கு 20 ரன்கள் அடிக்கணும்னா அது அழுத்தத்தை ஏற்படுத்தும் இல்லையா... அதுபோல எது நம்மால் முடியலையோ அது அதிகமாகி மனஅழுத்தத்தை ஏற்படுத்துகிறது. தொடர்ந்து இந்த அழுத்தம் உடலில் இருக்கிறபோது அது மருத்துவரை அணுகுகிற அளவுக்கு நோயாக மாறுது. தொடர்ச்சியான ஸ்ட்ரெஸ்  மனநோயாக மாறும். அதேபோல, உடல்லயும் பல்வேறு நோய்களை உண்டாக்கும்.

இதுக்குத் தீர்வுனு பார்க்கிறப்ப ரெண்டே வழிகள்தான். ஒண்ணு அழுத்தத்தை நிறுத்தணும். இல்லனா சம்பந்தப்பட்ட அந்த நபர் தன்னை மாற்றிக்கணும்...’’ என்கிறவர், அது
குறித்து விரிவாகத் தொடர்ந்தார்.  ‘‘பொதுவாக மனஅழுத்தமாகும்போது எண்ணங்கள், உணர்ச்சிகள், செயல்பாடுகள் இந்த மூன்றிலும் மாற்றங்கள் ஏற்படும். எண்ணங்கள்னு எடுத்துக்கிட்டால் நிறைய எதிர்மறையான எண்ணங்கள் வரும். ‘என்னால் ஒண்ணும் முடியாது. எனக்கு யாருமே உதவி செய்யமாட்டேங்கிறாங்க. நீங்கள் எல்லாம் எனக்கு எதிராக இருக்கீங்க...’ இப்படி எதிர்மறையான எண்ணங்கள்ல இருப்பாங்க.

இந்த எதிர்மறை எண்ணங்கள் அவங்களைப் பற்றியும், அவங்க எதிராளிகளைப் பற்றியும், சுற்றியுள்ளவங்களைப் பற்றியும் வரும். இந்த உலகமே மோசமாக இருக்குனு நினைப்பாங்க.
அதேமாதிரி உணர்வுகள்ல மனச்சோர்வு, பதட்டம், எரிச்சல், கோபம் இந்தமாதிரி நிறைய வரும். அப்புறம், செயல்பாடுகள்னு எடுத்துக்கிட்டால் மாற்றங்கள் நிறைய இருக்கும். யார்கிட்டயும் பேசாமல், பழகாமல் இருப்பாங்க. இல்லனா வீட்டுக்குள்ளயே அடைஞ்சு கிடப்பாங்க.

முன்பு சந்தோஷமாக நிறைய விஷயங்கள் செய்திருப்பாங்க. இப்ப அதையெல்லாம் பண்ணாமல் ஒருகட்டத்துல தற்கொலைக்கு முயற்சி செய்வாங்க. இதேபோல மனஅழுத்தம் உடல்லயும் பிரதிபலிக்கும். பசி எடுக்காது. தூக்கம் வராது. உடல் சோர்வாக இருக்கும். குழந்தைகளிடம் கவனக்குறைபாடு நிறைய இருக்கும். நன்றாக படிச்சிட்டு இருந்த குழந்தைக்குக்கூட படிப்பு குறைஞ்சிடும். சோர்வினால் முயற்சி செய்யமாட்டாங்க.

அதனால எண்ணம், உணர்வு, செயல்பாடு இந்த மூன்றிலும் மாற்றங்கள் ஒரு குழந்தையிடமோ அல்லது ஒரு நபரிடமோ தெரிந்தால் அவங்ககிட்ட பேச வேண்டியது அவசியம். கவுன்சிலிங் கொடுப்பது அத்தியாவசியம். இதுல முதல்ல அவங்க மனஅழுத்தத்தை சரிபண்ணணும். அது பெரும்பாலும் முடியாது. ஏன்னா, படிப்பில் பிரச்னையுள்ள குழந்தையிடம் படிக்க வேண்டாம்னு சொல்லமுடியாது. வேலையில் இருப்பவரிடம் வேலையை ராஜினாமா செய்திடுங்கனும் கூறமுடியாது. ரெண்டுமே அவரவர்க்கு அவசியமானது.  

ஆனா, சில இடங்களில் அழுத்தத்தை சரி செய்யமுடியும். அதாவது சில சூழல்களை மாற்றமுடியும்னா மாற்றிக்கலாம். அது முடியாதபோது ரெண்டாவது ஆப்ஷனை கையிலெடுக்கணும். அதாவது நாம் மாறிக்கணும். இதில் முதல்ல மாற்றவேண்டியது நம் மனப்பான்மையைத்தான். எதிர்பார்ப்புகள் அதிகம் இருக்கிறப்பதானே அழுத்தம் வருது. எந்தப் பிரச்னையையும் நாம் அழுத்தமாகப் பார்த்தால்தானே அது அழுத்தமாக மாறுது. அதனால், பிரச்னையை அழுத்தமாகப் பார்க்காமல் நம் மனதை மாற்றும்போது பல விஷயங்களைக் கடந்து போகமுடியும்.