கின்னஸில் கில்லியாக நிற்கும் இந்திய நடிகர்கள்!

நம் இந்திய சினிமா கின்னஸ் வேர்ல்ட் ரெகார்ட் வரை சென்று எந்த அளவிற்கு சாதனைகளை முறியடித்தன என்பதை சில வாரங்களுக்கு முன் பார்த்தோம்.ஆனால், இந்த சாதனைகள் வெறும் திரைப்படங்களோடு மட்டும்தான் நின்று விட்டதா..?இல்லை. கின்னஸ் வரை சென்ற நம் இந்திய திரைப்படக் கலைஞர்களும் பலர் உள்ளனர்; உலக சாதனைகளை படைத்துள்ளனர்! கடந்த பிப்ரவரி மாதம் 22ம் தேதி பாலிவுட் நடிகர் அக்‌ஷய் குமார் தனது ‘செல்பி’ படத்தின் ப்ரோமோஷன் நிகழ்வில் வெறும் மூன்று நிமிடங்களில் உலகிலேயே அதிக செல்ஃபி எடுத்த நடிகராக கின்னஸ் புத்தகத்தில் இடம் பிடித்தார். அன்றைய தினம் முழுக்கவே தன்னை சந்திக்க வந்த அத்தனை ரசிகர்களுக்கும் நோ சொல்லாமல் செல்ஃபி எடுத்துக் கொள்ள அனுமதித்தார்.

2016ம் ஆண்டு சர்வதேச மகளிர் தினச் சிறப்பாக ஒரே நேரத்தில் 1300 பெண்கள் ஒன்றிணைந்து விரல் நகங்களில் நெயில் பாலிஷ் போட்டுக்கொள்ளும் நிகழ்வு ஒன்றை நடத்தினர்.
இதில் கலந்துகொண்டு நிகழ்வைத் துவக்கி வைத்தார் சோனாக்‌ஷி சின்ஹா. 1300 பெண்களும் ஒன்றிணைந்து ஒரே நேரத்தில் நெயில் பாலிஷ் அணிந்து கொள்ளும் தருணத்தில் சோனாக்‌ஷி சின்ஹாவும் கலந்துகொண்டதில் கின்னஸ் உலக சாதனைப் புத்தகத்தில் இடம் பிடித்தார்.

2009ம் ஆண்டு வெளியான ‘டெல்லி 6’ படத்திற்காக அபிஷேக் பச்சன் 12 மணி நேரத்தில் 12 நகரங்களுக்கு பயணித்து குறைந்த நேரத்தில் அதிகமான பொது நிகழ்வில் கலந்து கொண்ட நடிகர் என்ற விதத்தில் கின்னஸ் உலக சாதனை புத்தகத்தில் இடம் பிடித்தார். இதற்கு முன் ஜெர்மன் நடிகர்களான ஜார்ஜில் வோகெல் மற்றும் டேனியல் ப்ரோஹ்ள் இந்த சாதனையைச் செய்திருந்தார்கள். அதைத்தான் அபிஷேக் பச்சன் முறியடித்தார்.