‘No Food Waste’ என்கிற தன்னார்வ அமைப்பின் சென்னை இயக்குனர் இவர். திருமணங்கள், விருந்துகள், நிகழ்வுகள், நிறுவனங்கள் போன்றவற்றில் மீதமாகும் அதிகப்படியான உணவை பசியுடன் இருப்பவர்களுக்கு மறுவிநியோகம் செய்வதை நோக்கமாகக் கொண்டு செயல்படும் தன்னார்வ அமைப்பு இது.

2014ல் கோவையில் உருவாக்கப்பட்ட இந்த அமைப்பின் சென்னை சேப்டரை 2017ல் சென்னையில் தொடங்கி அதன்வழியே சிறப்பான செயல்பாடுகளை முன்னெடுத்து வரும் இளைஞர் அருண்குமார். மக்கள் யாரும் பட்டினியுடன் இருக்கக்கூடாது என்கிற உயரிய நோக்கத்திற்காக தன் சொந்தப் பணியைத் துறந்துவிட்டு மற்றவர்களின் பசியைப்போக்க ஓடிக்கொண்டே இருப்பவர்.

‘‘சின்ன வயசுல இருந்தே வீட்டுல பெரியவங்க உணவை வீணடிக்கக் கூடாதுனும், உணவு விலை மதிப்பு இல்லாததுனும் சொல்லிச் சொல்லி வளர்த்தாங்க. அந்த வார்த்தைகளே எனக்குள் உணவு பற்றின விழிப்புணர்வு விதையைத் தூவியது. பிறந்து வளர்ந்து படிச்சதெல்லாம் கரூர்ல. படிக்கிறப்பவே சமூக சேவை சார்ந்த வேலைகள்ல ஈடுபட்டேன்.

ஓய்வுநேரங்கள்ல தன்னார்வத் தொண்டு நிறுவனங்களுடன் இணைந்து பணியாற்றினேன். ஆதரவற்ற இல்லங்களுக்கு போய் என்னாலான சேவைகளைச் செய்தேன். வீட்டுல உள்ள ரேசன் பொருட்களை சேமிச்சு தேவையான நபர்களுக்கும், ஆதரவற்ற இல்லங்களுக்கும் கொடுத்திட்டு வந்தேன். அது இன்னமும் தொடர்ந்திட்டு இருக்கு.

‘‘விழாக்கள்ல ஐம்பதுக்கும் மேல் கைப்படாத உணவுகள் இருந்தால் அதை சேகரிச்சு வேண்டியவர்களுக்குக் கொடுக்குறோம். அதுக்குத் தேவையான வண்டி உள்ளிட்ட உதவிகளை அப்போது உணவுப் பாதுகாப்பு ஆணையராக இருந்த அமுதா ஐஏஎஸ் மேடம் அவங்க சொந்த செலவில் வாங்கித் தந்தாங்க. நிறைய சப்போர்ட்டும் செய்தாங்க.

பிறகு, உணவுப் பாதுகாப்புத்துறை மூலம் ஸ்பான்சர்கள் கார்ப்பரேட் சமூக பொறுப்புத் திட்டம் வழியே கிடைச்சது. அப்படியாக முதல்கட்டமாக தி.நகர், கோடம்பாக்கம் உள்ளிட்ட சுற்றுவட்டாரங்கள்ல ஒரு பைலட் வெர்ஷன் மாதிரி தொடங்கினோம்.  

அதாவது, இந்த ஏரியாக்கள்ல உள்ள திருமண மண்டபங்கள் உள்பட எந்தெந்த இடங்கள்ல உணவு வீணாகுமோ அதை கண்டறிந்து உணவை சேகரிக்க ஆரம்பிச்சோம். இதுக்கு சென்னை மாநகராட்சியும் சப்போர்ட் செய்தாங்க.

அப்புறம், ஆன்லைன்ல கேன்சலான ஆர்டர்ஸ் உணவை சேகரிச்சோம். பிறகு, சின்னச் சின்னதான சாய் கிங்ஸ் மாதிரி உள்ள கடைகள்ல தினமும் சமோசா, பப்ஸ் உள்ளிட்ட ஐட்டங்கள் மிச்சமாகும். இது எப்படியும் ஒரு பத்து பதினைந்தாவது வரும். அதையும் சேகரிச்சோம்.  

2019ல் ஐபிஎல் போட்டிகள் நடந்தப்ப அங்கிருந்த கேன்டீன்ல நிறைய உணவு தேவைக்கு அதிகமாக இருந்தது. அங்க உணவுப் பாதுகாப்புத்துறை மூலம் தகவல் கிடைச்சு போய் சேகரிச்சோம். அப்போதிலிருந்தே ஐபிஎல் போட்டிகள் நடக்கிறப்ப எல்லாம் அதிகப்படியாக மிச்சமாகும் உணவுகளைச் சேகரிக்கிறோம்.

இதை கோயம்பேடு, மெரினா பீச் உள்ளிட்ட இடங்கள்ல உள்ள துப்புரவுப் பணியாளர்கள், நள்ளிரவு நேர ஆட்டோ ஓட்டுநர்கள், தினக்கூலிகள், உணவுக்காக தவிப்பவர்கள் உள்ளிட்டவங்களுக்கு வழங்குவோம். இந்த உணவுகளைக் கொடுக்கும்போது உணவுப் பாதுகாப்புத்துறை வழிகாட்டுதல்படியே செய்வோம். அதேபோல, கெட்டுப்போகாத உணவுகளாகப் பார்த்து தரம் பிரிச்சே வழங்குவோம்.

உதாரணத்திற்கு, கடந்த வாரம் தொடர்ந்து ரெண்டு நாட்கள் மழை பெய்தது. அப்ப அலுவலகத்திற்கு சிலர் வராமல் இருந்தாங்க. அவங்க உணவு மீதமாகும் இல்லையா? அதை போய் நாங்க சேகரிப்போம். எங்களிடம் ஏழு ஆம்னி வண்டிகள் இருக்கு. நூறுக்கும் மேற்பட்ட தன்னார்வலர்கள் இருக்காங்க.

அவங்களால்தான் என்னால் எல்லாவற்றையும் எளிதாக செய்யமுடியுது. தவிர, என் குடும்பத்தினரும் என்னுடைய இந்தப் பணிக்கு பக்கபலமாக இருந்து நிறைய சப்போர்ட் செய்றாங்க. இப்ப அவங்க எல்லோருமே உணவை வீணடிக்கக்கூடாதுனு நினைக்கிறாங்க. என்னுடைய குழந்தையும் அதை உள்வாங்கி இருப்பதுதான் என்னுடைய வெற்றியாக நான் பார்க்கிறேன்...’’ என்கிறவர், வீணாகும் உணவை மட்டுமில்லாமல் புதிதாக உணவு தயாரித்தும் பலருக்கு அளிக்கிறார்.  

இப்ப நாங்க பண்ற இந்த செயல்பாட்டைப் பார்த்து ஒருத்தங்க ரெகுலராக உணவு தயாரிச்சே தர்றாங்க. முதல்ல அவங்களுக்கு எங்கே போய் யாரிடம் கொடுக்குறதுனு தெரியாது. அதனால எங்களிடம் வந்தாங்க. எங்களுக்கு சென்னையில் ஹங்கர் ஸ்பாட் இடங்கள் எவைனு தெரியும். அவற்றை அடையாளம் கண்டிருக்கோம்.

அதாவது, மக்கள் பசியோடு எங்கே இருப்பாங்க. யாருக்கு தேவைனு எல்லாம் இந்த ஃபீல்டுல இருக்கிறதால தெரியும். அதனால, உணவு தயாரிச்சுத் தர்றவங்ககிட்ட இருந்து வாங்கிட்டுப் போய் தேவையானவங்களுக்குக் கொடுக்குறோம்.

இவற்றையெல்லாம் நாங்க எடுத்திட்டுபோய் பசியானவர்களுக்கு வழங்குறோம். இந்தமாதிரி நம்மூர்ல பல நல்லுள்ளங்களும் இருக்காங்க. அவங்களால்தான் இன்னமும் இந்த உலகம் அற்புதமாக இயங்கிட்டு இருக்கு...’’ என்கிறவரின் கனவு, பசி, பட்டினியில்லாத சென்னை மாநகரம்.

‘‘எங்க இலக்கு சென்னை மற்றும் சுற்றுவட்டார  மாவட்டங்களில் யாரும் பசியுடன் இருக்கக்கூடாது என்பதுதான். குறிப்பாக பட்டினியில்லாத சென்னை மாநகரை உருவாக்கணும் என்பதே எங்கள் கனவு. அதேபோல உணவையும் யாரும் வீணடிக்கக்கூடாது. இதுக்கான வேலைகளைத் தொடர்ந்து செய்திட்டு இருக்கோம்.