நீங்கள் ஒரு நல்ல ஷூ வாங்கலாம் என கூகுளில் தேடுகிறீர்கள். உடனே நாம் எந்த வலைத்தளம் சென்றாலும் ஷூ பற்றிய விளம்பரங்கள் வரும்.  எந்த செயலியைத் திறந்தாலும் ஷூ பற்றிய விளம்பரங்கள் குவியும். 

இதுதான் இணையத்தில் உள்ள சிக்கல்.நாம் பயன்படுத்தும் இணையம் என்பது முழுக்க முழுக்க நம் அடையாளங்களை, நம்மைப் பற்றிய தகவல்களைத் திரட்டிக் கொண்டே இருக்கும். திரட்டப்பட்ட தகவல்கள் இணைய நிறுவனங்களுக்கு பகிரப்படும்.  அப்படித்தான் நீங்கள் ஷூவைப் பற்றி இணையத்தில் தேட அந்தத் தகவல் பிற இணைய தளங்களுக்கும், செயலிகளுக்கும் பகிரப்பட்டுவிடும். இல்லை... இல்லை விற்கப்பட்டுவிடும்.  

அதாவது நீங்கள் இணையதளத்தில் நுழைந்தவுடன் உங்களுடைய அடையாளங்கள், தகவல்கள், அந்தரங்க தகவல்கள் எதையுமே அந்த இணையத்தால்  சேகரிக்க முடியவில்லை... ஆனால், அந்த இணையத்தில் நுழைந்து நீங்கள் என்னென்ன செய்கிறீர்கள் என்பதை அது சேகரிக்கும்... இதைத்தான் அனானிமஸ் ஆக இணையத்தில் இருப்பது என்று புரிந்து கொள்ளலாம்.

இணையம் என்பது முழுக்க முழுக்க தனியார் பெரு நிறுவனங்களால் நடத்தப்படுவது; அதேநேரம் அரசின் கட்டுப்பாட்டில் இயங்குகிறது என்பதைப் புரிந்து கொள்ள வேண்டும். தனியார் நிறுவனங்களுக்கு லாபம் மட்டும்தான் குறி. அரசாங்கத்துக்கோ அரசுக்கு எதிரான எந்தக் கருத்தும் சமூகத்தில் பரவிவிடக்கூடாது என்பதில் குறி.

இந்த கருத்தாக்கத்தின் அடிப்படையில்தான் இணையத்தில் நம் அடையாளங்களைக் கொடுக்காமல் ரகசியமாகப் பயன்படுத்தும் முறையை / தொழில்நுட்பத்தை பலரும் உருவாக்கினார்கள்.