தமிழுக்கு ஒரு திரைக்கதை... மலையாளத்துக்கு ஒரு ஸ்கிரிப்ட்... ஆனா, ஒரே நேரத்துல ரிலீஸ்!

‘‘ஒரு பொண்ண கண்டுபிடிக்கணும்... எங்க போனா... என்ன ஆனான்னு தெரியலை... அங்க அப்படி ஒரு பொண்ணு இருந்ததுக்கான தடயமே இல்லையே...’’இப்படி டீஸரிலே பலவாறு நம்மை நிமிர்ந்து உட்கார வைத்து, ஆர்வத்தைத் தூண்டுகிறது ‘யூகி’ திரைப்பட டீஸர். ‘‘இந்தப் படம் மூலமா பிரதாப் போத்தன் சார் கூட சேர்ந்து வேலை செய்கிற பாக்கியம் கிடைச்சது. லெஜெண்டரி நடிகர் மற்றும் இயக்குநர். ஆனால், எங்கேயும் அவருடைய தலையீடு இல்ல.

நானே எதாவது சார் சொல்வாரா... மாத்தணும்னு கேட்பாரான்னு நினைச்சேன். இல்லவே இல்ல. நிறைய அவர்கிட்ட கத்துக்க நினைச்சேன்... ஆனா...’’ முதல் படம் முழுமையாகி வெளியாகப் போகும் மகிழ்ச்சியிலும், பிரதாப் போத்தனின் மறைவை இப்போதும் ஏற்றுக்கொள்ள முடியாதவராகவும் இருக்கிறார் இயக்குநர் ஜாக் ஹாரிஸ். இயக்குநராக முதல் படம் கடந்து வந்த பாதை எப்படி இருக்கு?

இப்போ யோசிக்கும் போது காத்திருந்தது வீண் போகலைன்னு தோணுது. கேரளா, திரிச்சூர்தான் எனக்கு சொந்த ஊர். சின்ன வயதில் இருந்தே சினிமா மேலே காதல். அதற்காகவே ஃபிலிம் இன்ஸ்டிடியூட்ல சேர்ந்து படிச்சேன். கொஞ்ச நாள் வேலை கூட செய்தேன். மலையாளத்தில் முதல் படம் ஆண்டனி வர்கீஸ் கூட ‘தேவ் ஃபாகிர்’ படம் செய்ய வேண்டியது. ஆனால், கொரோனா, ஊரடங்குன்னு அந்தக் கனவு கனவாவே போயிடுச்சு. அடுத்து நானும் என் நண்பரும் சேர்ந்து விளம்பரப் படங்கள் எல்லாம் செய்துட்டு இருந்தோம்.  சில படங்களில் அசிஸ்டென்ட் டைரக்டராகவும் வேலை செய்துட்டு இருந்தேன்.

அப்பதான் நண்பர் பாக்கிராஜ் - என் கூட இன்ஸ்டிடியூட்டில் ஒண்ணா படிச்சவர் - எழுதியிருந்த ஒரு கதை எனக்கு ரொம்பவே பிடிச்சிருந்தது. அந்த கதைக்கு திரைக்கதை எழுதினேன் அதுதான் ‘யூகி’. கதைக்களம் என்ன? ஆரம்பத்தில் இந்த படத்துக்கு வைச்ச பெயர் ‘கெஸ்’. ஏன் தலைப்பு தமிழிலேயே வைக்கக் கூடாதுன்னு யோசிச்சோம்... அதுதான் ‘யூகி’. தவிர ‘யூகி’னா புத்திசாலி என்கிற பொருளும் வருது.

படம் முழுக்க கேரக்டர்கள் ஒவ்வொண்ணும் யூகிச்சுதான் ஒவ்வொரு முடிச்சா அவிழ்ப்பாங்க. பரபர திரில்லரான கதைக் களம்தான் இந்த படம். ஒரு பெண்ணுக்கான தேடல்... அதை பல கோணத்தில் தேடுறாங்க... ஏன் எதுக்கு அப்படிங்கறதுதான் கதை. கதிர், நரேன், நட்டி நட்ராஜ்... நடிப்பிற்காகவே பெயர் போன மூவரையும் ஒரே படத்தில் அடக்கி இருக்கிறீர்களே?