இசை, நடனம், பாட்டு, பரதம், சிலம்பம் எனப் பன்முகக் கலைகளில் கைதேர்ந்தவராக மிளிர்கிறார் ‘மகராசி’ சீரியலின் நாயகன் ஆர்யன். இவர், பழம்பெரும் நடிகரான எஸ்.எஸ்.ராஜேந்திரனின் பேரன். சினிமாவிலிருந்து சீரியலுக்குள் வந்திருக்கும் ஆர்யன் முதல் சீரியலிலேயே நல்ல பெயர் பெற்றிருக்கிறார்.

‘‘இயற்பெயர் பங்கஜ் குமார். சினிமாவுக்காக ஆர்யன்னு மாற்றி வச்சுக்கிட்டேன். ஆனாலும், ‘மகராசி’ சீரியல்ல வர்ற புவியரசன் கேரக்டர்தான் மக்கள் மனசுல நிற்குது. எங்க போனாலும் புவினு கூப்பிட்டு என்னை நெகிழ வைக்கிறாங்க. அவங்க செலுத்துற அன்பு, ரொம்ப சந்தோஷத்தைக் கொடுக்குது...’’ உற்சாகமாகச் சொல்கிறார் ஆர்யன்.

அம்மாதான் என்னையும் தங்கச்சியையும் ஒவ்வொரு இடமா கூப்பிட்டுபோய் இந்தக் கலையெல்லாம் கத்துக்க வச்சாங்க. எங்களுக்காகவே டிரைவிங் கத்துக்கிட்டாங்க. அப்பாவும் நிறைய சப்போர்ட் பண்ணுவார். அவங்க ரெண்டு பேரின் சப்போர்ட்டும் இல்லனா என்னால் இந்தளவுக்கு வந்திருக்க முடியாது.

அப்புறம், சின்ன வயசுல இருந்தே சினிமா என் கூட இருந்தது. ஆனா, சினிமாவுக்கு வரணும்னு நினைச்சு இந்தக் கலைகளையெல்லாம் ஆரம்பத்துல கத்துக்கல. ஒரு ஆர்ட்டா நினைச்சே கத்துக்கிட்டேன். அதனாலதான் லயோலாவுல விஸ்காம் படிச்சேன்.

‘‘தாத்தா எஸ்எஸ்ஆர் ரொம்ப ஃப்ரண்டலியானவர். சினிமாவிலும், அரசியலிலும் நிறைய சாதிச்சிருக்கார். அவர் நிறைய கதைகளை அப்பாவிடம் சொல்லும்போது நான் உட்கார்ந்து கேட்டுட்டு இருப்பேன். தாத்தாவை நடிகராகத்தான் பலருக்குத் தெரியும். ஆனா, அவர் சிறந்த பாடகரும்கூட. ‘புதுமைப்பெண்’ படத்துல கே.வி.மகாதேவன் இசையில் அவரே நடிச்சு அவரே பாடியிருக்கார்...’’ என்கிற ஆர்யன், அந்தப் பாடலை நமக்காக பாடிக்காட்டினார். 

‘‘‘செந்தமிழ் நாட்டு கைத்தறி நெசவு சேலைகள், வேட்டிகள் வாங்குவேன்; திராவிட நாட்டினர் சேமம் வேண்டி சிங்கார ஆடைகள் வாங்குவேன்’னு ஒரு பாடல். ரொம்ப அருமையாகப் பாடியிருப்பார். அவரின் தமிழ் உச்சரிப்பு அப்படியிருக்கும். அதேபோல குரலும் கணீர்னு இருக்கும். அந்தக்குரல்தான் அவரை அரசியலில் உயர்த்தியது. எம்எல்ஏ, எம்பியாக அமர வைத்தது.  

அவருக்கு என்ன பதில் சொல்லனு தெரியாமல் சிரிச்சிட்டு வந்தேன். அப்பதான் மக்கள் எப்படி இந்த சீரியலை ரசிக்கிறாங்கனு தெரிஞ்சது. ரொம்ப சந்தோஷமா இருந்தது...’’ என்கிறவருக்கு இசையில் சிறகடிக்க வேண்டும் என்பதே கனவு.

‘‘என் பாடும் திறமையையும், கிடார் திறமையையும் உலகத்துக்கு தெரியப்படுத்தணும்னு ஆசைப்படுறேன். மியூசிக் இண்டஸ்ட்ரியில் ஒரு ரவுண்ட் வரணும்னு நினைக்கிறேன். அதாவது, மியூசிக் டைரக்‌ஷன் பண்ணணும்னு ஆர்வம் இருக்கு. அதுக்கான வொர்க் பண்ணிட்டு இருக்கேன். இப்ப இண்டிபெண்டன்ட் மியூசிக் நிறைய ரீச்சாகிட்டு இருக்கு.  ‘என்ஜாமி’ பாடல் எல்லாம் வந்தது இல்லையா, அதுமாதிரி.