Stargazing trip எனப்படும் நட்சத்திரங்களைப் பார்வையிடும் பயணத்திற்கான அழைப்பு இது.

நட்சத்திரங்களைப் பார்வையிடும் பயணம் என்றதும் விண்வெளிப் பயணம் என நினைத்துவிட வேண்டாம். பூமியிலிருந்தே விண்வெளியை ரசிக்க வைக்கும் பயணம். மொட்டை மாடியில் படுத்துக்கொண்டே வானத்தில் ஒளிரும் நிலவையும் மின்னும் நட்சத்திரங்களையும் ரசித்திருப்போம் இல்லையா? ரம்மியமான ஓர் இடத்திற்கு நம்மை அழைத்துச் சென்று டெலஸ்கோப்பின் வழியே அதை தத்ரூபமாகக் காட்டும் அழகிய பயணம்.

‘‘நான் படிச்சு வளர்ந்ததெல்லாம் சென்னைலதான். லயோலாவுல பி.காம் முடிச்சேன். பிறகு ஒரு வங்கியில் வேலை செய்தேன். எனக்கு 2015ல்தான் நட்சத்திரங்களைப் பார்க்கிறதுல ஆர்வம் வந்தது. சென்னைக்குப் பக்கத்துல நாகலாபுரம்னு ஒரு இடம் இருக்கு. அங்க மலையடிவாரத்துல நானும் என் நண்பனும் ஒரு கேம்ப் பண்ணினோம்.

அவன்தான் எனக்கு வியாழன், சனிக்கோள்களைக் கண்களால் பார்க்கலாம்னு சொன்னான். அதுக்கு டெலஸ்கோப் எல்லாம் தேவையில்லனு அவன் சொன்னப்ப எனக்கு அது புதுசா இருந்தது. நான் முதல்ல நம்பல. அவன் சில போன் ஆப்களைக் காட்டி இது சனிக்கோள், இது வியாழன்னு சொன்னதும் எனக்கு ஆச்சரியமா இருந்துச்சு. அது எனக்குள் ஓர் ஆர்வத்தை ஏற்படுத்துச்சு.

இப்ப என் ட்ரிப்புக்கு வர்றவங்களுக்குக் கூட நான் படிச்ச ஆஸ்ட்ரோ புத்தகங்களை கிஃப்ட்டா கொடுத்திருக்கேன். சமீபத்துல அந்தமானுக்கு என்னுடன் வந்தவங்களுக்கு ‘பிக் பாங்’னு சைமன் சிங் எழுதிய புத்தகத்தை கொடுத்தேன்...’’ என்கிறவர், சிரித்தபடி தொடர்ந்தார். ‘‘அப்புறம், ஏன் இதை ஒரு ட்ரிப்பா செய்யக்கூடாதுனு தோணுச்சு.

அதனால, டிஸ்கவர் ஆல்பாஸ்ல இருந்து வெளியே வந்து ட்ரிப் ஏற்பாடு செய்யும் வேலையை ஆரம்பிச்சேன். பிறகு, கடந்த ஜூன் மாசம் ‘Starvoirs’னு ட்ரிப்பிற்காக ஒரு நிறுவனத்தைத் தொடங்கி ஸ்டார்கேஸிங் ட்ரிப் பண்றேன்.

இருந்தும் நம்மூர்ல சில ஸ்பாட்கள் ரொம்ப நல்லாயிருக்கும். அதுல ராமநாதபுரம் பக்கம் சாயல்குடி, சிதம்பரம் அருகே ஒரு ஸ்பாட், அப்புறம், கோடநாடு, ஊட்டி, கொடைக்கானல்ல பூம்பாறையில் சிறப்பா இருக்கும். இந்தியாவுல நாகலாந்துலயும், அந்தமான்லயும் ஸ்டார்கேஸிங் பண்ணிட்டு இருக்கேன். 

என்னுடைய வேலையில் இந்த நட்சத்திர பார்வையிடலுக்கு சரியான இடத்தைக் கண்டுபிடிப்பதும் முக்கியமானது. பொதுவா, கேம்ப் ஸ்பாட் எல்லாம் ஊரைத் தாண்டி ஒளி மாசு அடையாத இடமாகவே இருக்கும். இந்தமாதிரியான இடங்களை நான் தேர்ந்தெடுத்து மக்களைக் கூப்பிட்டுப் போய் நட்சத்திர பார்வையிடலைச் செய்றேன்.

பொதுவா எங்க ட்ரிப்ல நட்சத்திரங்கள், கோள்கள், கேலக்ஸிகள் எல்லாம் காட்டுவோம். சமீபத்துல அந்தமான் போர்ட்பிளேயர்ல ஒரு ஈவென்ட் நடத்தினேன். அங்க சனி, வியாழன், செவ்வாய், சந்திரன் உள்ளிட்ட கோள்களைக் காட்டினேன். அப்புறம், ஆண்ட்ரோமேடா கேலக்ஸி, பின்வீல் கேலக்ஸி, நெபுலாஸ் எல்லாம் காட்டினேன்.

அடுத்து, நட்சத்திரங்கள் நிறைய காட்டினேன். குறிப்பா, Siriusனு சொல்லப்படுற பொலிவான நட்சத்திரத்தைக் காட்டினேன். ஒரு நட்சத்திரம் இறந்திட்டால் அது white dwarf; அதாவது வெண்குறுமீனாக மாறும். அல்லது நியூட்ரான் ஸ்டாரா இருக்கும். அல்லது பிளாக்ஹோல் ஆகும். இப்படி வொயிட் ட்வார்ஃப் ஆன நட்சத்திரத்தை டெலஸ்கோப்ல பார்க்கலாம்.