92 வருடங்களாக சமையல்...இது நளபாகத்தின் கதை

92 வருடங்களாக சமையல்...  தேவர் மகன், தளபதி என 122 படங்களுக்கு சமையல்...தனுஷ் திருமணத்துக்கு சமையல்... ரூ.90 ஆயிரம் தங்கத் தட்டில் சமையல்...

எளிய மக்களுக்கு சமையல்..! இது நளபாகத்தின் கதை

ஒரு வேளை சாப்பாட்டுக்கே திண்டாடியவர், நடைபாதை வாசியாக மிகச் சாதாரண வாழ்க்கையை வாழ்ந்த ஒரு சாமான்யன், பிற்காலத்தில் சென்னையில் பல லட்சம் மக்களுக்கு நளபாகக் கலைஞனாக விருந்து பரிமாறினார் என்பதைக் கேட்கும்போது சினிமாவில் மட்டுமே இது சாத்தியம் என்று நினைக்கத்தோன்றும்.90 களில் கோலிவுட்டில் நளபாகம் மீனாட்சி என்ற பெயரைத் தெரியாத சினிமா கம்பெனிகளே இல்லை. ரஜினி, கமல் தொடங்கி பல முன்னணி நடிகர்களின் படங்களுக்கு நளபாக உபசரிப்பு மீனாட்சியின் கைப் பக்குவமே.  

நான்கு தலைமுறைகளாக சமையல் துறையில் கொடிகட்டிப் பறக்கும் மீனாட்சியின் வாரிசாக இப்போது ஹரீஷ் தன் தந்தையோடு சேர்ந்து பிசினஸை கவனித்து வருகிறார். ‘‘சமையலுக்கும் எங்கள் குடும்பத்துக்குமான பந்தம் 92 ஆண்டுகளாக நீடித்து வருகிறது. இந்தப் பாரம்பரியத்தைத் தெரிந்துகொள்ள வேண்டும் என்றால் காலச் சக்கரத்தின் பாகையை 1930களுக்கு திருப்ப வேண்டும்.

எங்களுக்கு பூர்வீகம் கும்பகோணம். கொள்ளுத் தாத்தா எளிமையான ஒரு சமையல்காரராகத்தான் தன்னுடைய வாழ்க்கையை ஆரம்பித்தார். மைசூர்பா, லட்டு, பாதுஷா என்று வழக்கமான ஸ்வீட் வகைகள் மத்தியில் தாத்தா ‘ஐஸ் பன்’ என்ற புதுவகை ஸ்வீட்டை அறிமுகப்படுத்தினார். அப்போது அந்த ஸ்வீட் எங்களுடைய சிக்நேச்சர் ஸ்வீட்டாக இருந்ததாம். நம்முடைய நாடு சுதந்திரம் அடைந்தபோது நடைபெற்ற கொண்டாட்டங்களுக்கு பல்வேறு சமையல்காரர்களுடன் சேர்ந்து என்னுடைய தாத்தாவும் சமைத்துக் கொடுத்துள்ளாராம். அப்போது லட்சக்கணக்கான மக்களுக்கு இந்திய சுதந்திரத்தைக் கொண்டாடும் விதத்தில் விருந்து படைக்கப்பட்டதாம்.

என்னுடைய தாத்தா ராஜா மணியுடன் பிறந்தவர்கள் ஒன்பது பேர். பொடிக்கடை பிரதர்ஸ் என்று அழைப்பதுண்டு. என்னுடைய அப்பா மீனாட்சிசுந்தரம் 1982ல் சமையல் துறையில் அடியெடுத்து வைத்தார். மதுரையில் உள்ள ஒரு ஹோட்டலில் கிளீனராக வாழ்க்கையைத் தொடங்கியவர் ஒரு கட்டத்தில் தாத்தாவின் சமையல் பிசினஸை கவனிக்க ஆரம்பித்தார்.
பிறகு, நம்பிக்கையை மட்டுமே மூலதனமாக எடுத்துக்கொண்டு சென்னைக்கு ரூட்டை மாற்றியுள்ளார். சென்னைக்கு வரும்போது அப்பாவுக்கு 18 வயது.

தங்குவதற்கு இடமில்லாமல் நடைபாதையில் படுத்துத் தூங்கியுள்ளார். ஆரம்பத்தில் திருமண நிகழ்ச்சிகளுக்கு வேலை செய்தவர் சினிமாவில் சமையலுக்கான தேவை அதிகம் இருப்பதை
அறிந்துகொண்டு கவனத்தை சினிமா பக்கம் திருப்பியுள்ளார். சினிமா யூனியனில் உறுப்பினராகி சினிமா படப்பிடிப்புகளுக்கு சமைக்க ஆரம்பித்துள்ளார்.‘தளபதி’, ‘பாட்ஷா’, ‘தேவர்மகன்’ உட்பட இதுவரை 122 படங்களுக்கு அப்பா சமையல கலைஞராகப் பணியாற்றியுள்ளார். ‘தேவர்மகன்’ படப்பிடிப்பு சமயத்தில்தான் நான் பிறந்ததாகவும் அப்பா சொல்லியுள்ளார்.

கே.பாலசந்தர், எஸ்.பி.முத்துராமன், ஏவிஎம், ரஜினி, கமல், விஜயகாந்த், சத்யராஜ், பிரபு, கார்த்திக், முரளி உட்பட ஏராளமான பிரபலங்களின் படங்களுக்கு அப்பா சமையல் செய்துள்ளார். இயக்குநர் கே.பாலசந்தர், அப்பாவின் சேவையைப் பாராட்டும் விதத்தில் அப்பா பெயருக்கு முன் ‘நளபாகம்’ என்ற அடைமொழி கொடுத்தார்.90களில் சினிமா படப்பிடிப்புடன் சேர்த்து ‘ஜனனி கேட்டரிங்’ தொடங்கி திருமண நிகழ்ச்சிகளுக்கும் சமைக்க ஆரம்பித்தார். அப்போதும் சினிமா பிரபலங்களின் திருமண நிகழ்ச்சிகள், வீட்டு விசேஷங்களுக்கு சமைக்க ஆரம்பித்துள்ளார். தனுஷ் சார் திருமணத்துக்கும் அப்பா சமையல் செய்துள்ளார். கமல் சார் இல்ல நிகழ்ச்சிகளுக்கும் அப்பா சமையல் செய்துள்ளார்.

நளபாக ஊழியர்கள் சங்கத்தில் அப்பா செயலாளராகவும், பெப்சியில் இணைச் செயலாளராகவும் பதவி வகித்துள்ளார். ஒரு கட்டத்தில் வெளியே சொல்ல முடியாத சில காரணங்களால் சினிமாவை விட்டு வெளியே வந்து,  திருமணம், வீட்டு விசேஷங்களுக்கு மட்டும் சமைக்க ஆரம்பித்தார்...’’ என்று முன்னோர்களின் வெற்றி வரலாற்றை மூச்சுவிடாமல் சொல்லி முடித்த ஹரீஷ், தண்ணீர் பருகியவாறு மீண்டும் தொடர்ந்தார்.‘‘சமையல் குடும்பம் என்பதால் சின்ன வயதிலேயே அப்பாவுடன் நானும் சமையல் வேலைகளில் ஆர்வமாகப் பங்கு எடுப்பேன். சாப்பாட்டுப் பந்திக்கு சில்வர் டம்ளர் வைத்து தண்ணீர் ஊற்றுவது என்னுடைய வேலையாக இருக்கும்.

எனக்கிருக்கும் ஆர்வத்தைப் புரிந்துகொண்ட அப்பா, இந்தத் தொழிலுக்கு வருவதாக இருந்தால் அடிப்படையைத் தெரிந்துகொள்ள வேண்டும் என்று எச்சில் இலையை எடுப்பதில் ஆரம்பித்து சமையல்கட்டில் உணவு வகைகளைத் தயாரிப்பது வரை கற்றுக்கொடுத்தார். நானும் ஆர்வத்துடன் கற்றுக்கொண்டதோடு ஹோட்டல் மேனேஜ்மெண்டும் படித்தேன்.