ரசாயனம் வேண்டாம்... தாவரங்கள், பாறைக் கற்கள், மண் இவற்றிலிருந்தே கலர்ஸை தயாரிக்கலாம்!

‘‘நாம் பயன்படுத்துற வண்ணங்கள் எல்லாமே செயற்கையானது. வீட்டுல அடிக்கிற பெயிண்ட்ல இருந்து ஓவியங்களுக்குத் தீட்டும் வண்ணங்கள் வரை எல்லாமே ஆய்வகத்துல கெமிக்கல் ரியாக்‌ஷன் மூலம் உருவாக்கப்படுது. பள்ளிக் குழந்தைங்க பயன்படுத்துற ஸ்கெட்ச், கலர் பென்சில், கிரேயான்ஸ், வாட்டர் கலர் எல்லாமே ரசாயனம் கலந்ததுதான். அதனால, வண்ணங்களை இயற்கை முறையில் உருவாக்கி அதை கேட்குறவங்களுக்கு கொடுக்குறேன். தவிர, இதை எப்படி உருவாக்கலாம்னு வகுப்புகளும் எடுக்குறேன்...’’ மெல்லிய குரலில் யதார்த்தமாக பேசுகிறார் நந்திதா.

அதென்ன இயற்கை வண்ணங்கள்?  

‘‘அதாவது தாவரங்கள், பாறைக் கற்கள், மண் இவற்றிலிருந்து வண்ணங்களை பிரித்தெடுக்க முடியும். உதாரணத்திற்கு, அவுரிச் செடியிலிருந்து நீல நிறம் எடுக்கலாம். மஞ்சள், சாமந்திப் பூ ஆகியவற்றிலிருந்து மஞ்சள் நிறம் பண்ணலாம். செம்மண்ல இருந்து சிவப்பு வண்ணத்தை பிரித்தெடுக்கலாம். கடுக்காய்ல இருந்து பச்சை நிறம் கிடைக்கும். புரசு மரத்தின் பூவிலிருந்து ஆரஞ்சு நிறம் எடுக்கலாம். மாவுத்தன்மை அதிகமுள்ள சில கற்கள்ல இருந்து நிறங்கள் கிடைக்கும்.

இப்படி நம்மைச் சுத்தி இருக்கிற இயற்கையான தாவரங்கள், கற்கள், மணல் ஆகியவற்றிலிருந்து வண்ணங்களை எடுக்க முடியும். இவை இயற்கையானது. நம் உடலுக்கு எந்தத் தீங்கும் ஏற்படுத்தாதது. வண்ணங்களும் ரொம்ப அருமையா இருக்கும். அந்தக் காலத்துல நம் முன்னோர்கள் எல்லோரும் இயற்கை வண்ணங்களைத்தான் பயன்படுத்தி ஓவியங்கள் வரைஞ்சாங்க. அஜந்தா, எல்லோரா ஓவியங்களை எடுத்துக்கோங்க. நம்மூர் தஞ்சை பெரிய கோயில்லயும், சித்தன்னவாசல்லயும் வரையப்பட்ட ஓவியங்களைப் பாருங்க. எல்லாமே இயற்கை வண்ணங்களால் தீட்டப்பட்டவைதான். இப்பவும் காலத்தால் அழியாத ஓவியமா ஒளிர்ந்திட்டு இருக்கு...’’ என்கிற நந்திதா, சாஃப்ட்வேர் எஞ்சினியராக இருந்தவர். அதிலிருந்து வெளியேறி இயற்கை வண்ணங்களை நோக்கி பயணித்து வருகிறார்.

‘‘நானும் கணவர் ராமநாதனும் பெங்களூர்ல ஐடி வேலையில் இருந்தோம். ரெண்டு பேருக்குமே சொந்த ஊர் திருப்பூர். எனக்கு சிறுவயசுல இருந்தே இயற்கையைப் பாதுகாக்கணும்கிற எண்ணம் உண்டு. ஆனா, அதை ஒரு கேரியரா எடுத்திட்டு போகிற அளவுக்கு தெரியல. திருமணமாகி தனியா போனப்ப, வீட்டுக்குத் தேவையான பொருட்களை வாங்கும்போதே எவ்வளவு ரசாயனப் பொருட்களைப் பயன்படுத்துறோம்னு தெரிஞ்சது. அதனால, ரசாயனம் கலக்காத பொருட்களைப் பயன்படுத்தணும்னு நினைச்சேன்.
 
நம் வீட்டுல இருந்து வெளியே போகிற நீர் பூமியை பாதிக்கக்கூடாது, மாசு ஏற்படுத்தக்கூடாது. அதனால, நானும் என் கணவரும் எவ்வளவு முடியுமோ அவ்வளவு தூரம் இயற்கையுடன் இணைந்த வாழ்க்கையை மேற்கொண்டோம்.அந்நேரம், வேலையில் மனசு ஒட்டல. 2017ல் வேலையை விட்டுட்டேன். வீட்டிலிருந்தே மனசுக்குப் பிடிச்ச மாதிரி ஏதாவது பண்ணலாம்னு இருந்தேன். கணவரும் உனக்கு பிடிச்ச மாதிரி பண்ணுனு ஊக்கப்படுத்தினார். அவருக்கும் இயற்கையில் அதீத ஆர்வம்.

சரி, இயற்கை சார்ந்து பண்ணுவோம்னு முடிவெடுத்தேன். ஆனா, என்ன பண்ணணும்னு தெரியல. சின்ன வயசுல நிறைய பெயிண்ட்டிங் பண்ணுவேன். அப்புறம், எப்படியோ அதை மறந்துட்டேன. வேலையை விட்டபிறகு வீட்டுல சும்மா இருந்த நேரம் பெயிண்ட் பண்ணினேன். அப்பதான் ஓவியம் வரைய பயன்படுத்துற வண்ணங்கள்ல ரசாயனம் நிறைய இருக்குமேனு ஒரு எண்ணம் வந்துச்சு. உடனே, இயற்கை வண்ணங்களை யாராவது தயாரிக்கிறாங்களா... விற்பனை செய்றாங்களானு தேடிப் பார்த்தேன். எதுவும் கிடைக்கல. அப்பதான் நாமே இயற்கை வண்ணங்களைத் தயாரிக்கலாமேனு தோணுச்சு...’’ என்கிறவர் தொடர்ந்தார்.