தனி ஒருவன்!

இடைநிற்றல், குழந்தைத் திருமணத்தைத் தடுக்க  பழங்குடி மாணவர்களுக்கு பாடம் நடத்தும் இளைஞர்

கொரோனா பெருந்தொற்றால் பாடங்கள் அனைத்தும் ஆன்லைன் வழியிலேயே நடத்தப்பட்டு வருகின்றன. நகரங்களிலும், கிராமங்களிலும் பல சிரமங்களுக்கு மத்தியில் ஆன்லைன் கல்வி நடந்து வருகிறது. இந்நிலையில் மலைக் கிராமங்களில் வசிக்கும் பழங்குடி மாணவ - மாணவிகளின் கற்றல் பற்றி எப்போதாவது சிந்தித்திருப்போமா?

இந்த மாணவர்கள் படிப்பதற்கு பதினைந்து கிமீ தொலைவிலுள்ள அரசு உண்டு உறைவிடப் பள்ளிக்கே செல்ல வேண்டும். இப்போது பள்ளிகள் மூடப்பட்டிருக்கும் சூழலில் எப்படி படிப்பார்கள்?  இந்தக் கேள்விதான் பழங்குடி இளைஞரான சத்தியமூர்த்தியைத் துரத்தியது. அந்த நொடியே, தன்னுடைய கிராமத்தில் தன் வீட்டிலேயே குழந்தைகளை ஒருங்கிணைத்து வகுப்புகளை எடுக்கத் தொடங்கினார். முதலில் வரத் தயங்கிய குழந்தைகள் சத்தியமூர்த்தியின் முயற்சியால் கொஞ்சம் கொஞ்சமாக வந்து சேர, கடந்த ஓராண்டாக அந்த மலைக்கிராமத்தில் வகுப்புகள் திறம்பட நடந்து வருகின்றன.