Family Tree-398 வருடங்களாக ஜால்ரா தயாரிக்கும் நிறுவனம்

இசை உலகில் ஜால்ரா (cymbals)வுக்கு இன்னொரு பெயர், ‘ஜில்ஜியான்’. இசைக் கருவிகளைத் தயாரிக்கும் பழமையான குடும்ப நிறுவனம் இது. உலகப் புகழ்பெற்ற இசை மேதை மொசார்ட் முதல் இசை பயில ஆரம்பிக்கும் குழந்தை வரை இதன் வாடிக்கையாளர்களின் பட்டியல் நீள்கிறது. 400 வருடங்களுக்கு முன்பு துருக்கியில் வேர் பிடித்த இந்நிறுவனம், இப்போது அமெரிக்காவில் வானளவு உயர்ந்து நிற்கிறது.

எந்த ஒரு சூழலிலும் துவண்டு போகாமல் ஒரு நிறுவனம் தொடர்ந்து இயங்க என்னென்ன செய்ய வேண்டும் என்பதற்கு ‘ஜில்ஜியானி’ன் வரலாறு நல்ல வழிகாட்டி. அவேடிஸ் ஜில்ஜியான்ஒட்டோமான் சாம்ராஜ்யத்தின் கீழ் கான்ஸ்டான்டிநோபிள் இருந்த காலகட்டம் அது. துருக்கியின் வரலாற்றுச் சிறப்புமிக்க நகரமான இஸ்தான்புல்தான் ஒரு காலத்தில் கான்ஸ்டான்டிநோபிள் என்று அழைக்கப்பட்டது.

பதினாறாம் நூற்றாண்டின் இறுதி வருடங்கள். ஆர்மீனியாவைச் சேர்ந்த ஒரு கொல்லரின் மகனாகப் பிறந்தார் அவேடிஸ். சின்ன வயதிலேயே உலோகங்களை உருக்கி வார்க்கும் கலையை தந்தையிடமிருந்து கற்றுக்கொண்டார். 15 வயதிலேயே தகரத்தை தங்கமாக மாற்றும் ரசவாதி என்ற புகழ் அவரைப் பிரபலப்படுத்தியது.

அவேடிஸின் ரசவாதத்  திறமைகளைப் பற்றிக் கேள்விப்பட்டு, ஆடிப்போனார் ஒட்டோமானின் அரசரான இரண்டாம் ஒஸ்மான். உடனே அவேடிஸைத் தனது அரண்மனைக்கு அழைத்து தகரம், செம்பு, வெள்ளி போன்ற உலோகங்களைக் கொடுத்து தங்கமாக மாற்றித்தரும்படி கோரிக்கை வைத்தார். பல்வேறு பரிசோதனைகளைச் செய்து பார்த்த அவேடிஸுக்கு ஏமாற்றமே மிஞ்சியது.  

அந்த உலோகங்கள் தங்கமாக மாறவில்லை. அவேடிஸை அரசர் உற்சாகப்படுத்த, அந்த ஏமாற்றத்திலும் ஒரு நல்லது நடந்தது. ஆம்; அந்தப் பரிசோதனையில்தான் ஜால்ரா செய்வதற்கான அற்புதமான ஓர் உலோகக் கலவையை அவேடிஸ் கண்டுபிடித்தார். அது வெண்கலத்திலேயே உயர்ந்த ரகமாக இருந்தது. அந்தக் கலவையில் செய்த ஜால்ராக்கள் அதுவரைக்கும் இல்லாத ஓர் இசையை எழுப்பியது. மகிழ்ச்சியடைந்த அரசர், அவேடிஸை தன்னுடனே வைத்துக்கொண்டார். அரண்மனையில் நடந்த திருமணங்கள், பிரார்த்தனைகள், விருந்துகளில் அரங்கேறும் இசை நிகழ்ச்சிகளில் அவேடிஸின் ஜால்ராக்கள் முக்கிய அங்கமாகின.

தங்கத்தை உருவாக்க வந்த ரசவாதி, இசைக்கருவியைச் செய்யும் கலைஞனாக பரிணமித்தார்.அவேடிஸின் ஜால்ராக்கள் அரண்மைனையைத் தாண்டி வெளியிலிருக்கும் இசைக்கலைஞர்களின் மத்தியிலும் நல்ல வரவேற்பைப் பெற்றன. 1622ம் வருடம் அவேடிஸுக்கு 80 தங்கக் கட்டிகளைப் பரிசாகக் கொடுத்து, அவர் குடும்பத்துக்கு ‘ஜில்ஜியான்’ என்று பெயரும் வைத்தார் அரசர். அதுவே ‘அவேடிஸ் ஜில்ஜியான்’ என்று நிறுவனத்தின் பெயராக மாறி, இன்று சுருக்கமாக ‘ஜில்ஜியான்’ என்று அழைக்கப்படுகிறது.  

ஆர்மீனியன் மொழியில் ‘ஜில்ஜியான்’ என்றால் ஜால்ரா செய்பவர்கள் என்று அர்த்தம்.1623ம் வருடம் அரசரின் ஆசீர்வாதங்களுடன் அரண்மனையிலிருந்து வெளியேறிய அவேடிஸ், கான்ஸ்டான்டிநோபிளில் உள்ள ஒரு கடற்கரையோரத்தில் ‘ஜில்ஜியான்’ நிறுவனத்தை முறையாகத் தொடங்கினார். கப்பலில் வரும் உலோகங்களை கழுதை, ஒட்டகங்கள் மூலம் சுலபமாக எடுத்து வருவதற்காக கடற்கரையோரத்தை அவர் தேர்ந்தெடுத்தது தொழில் செய்ய நினைப்பவர்களுக்கு ஒரு பாடம்.