பொங்கலும் தமிழ் சினிமாவும்

ஒவ்வொரு ஆண்டும் எத்தனையோ பண்டிகைகள் வந்தாலும் சினிமாவைப் பொறுத்தவரையில் முக்கியமான இடத்தை வகிப்பது தீபாவளியும், பொங்கலும்தான்.இதில் தீபாவளியை விட பொங்கலுக்கு சற்று கூடுதல் சிறப்பு உண்டு. ஏனென்றால், தீபாவளி மாதிரி பொங்கல் ஒரு நாள் கொண்டாட்டம் அல்ல, மூன்று நாள் கொண்டாட்டம்.

பொங்கலன்று குறைந்தபட்சம் மூன்று திரைப்படங்களைப் பார்க்காமல் எந்தத் தீவிர தமிழ் சினிமா ரசிகனின் அன்றைய நாளும் முழுமையடையாது. பொங்கலைப் பொறுத்தவரையில் புதுத் துணி, கரும்பு, சர்க்கரைப் பொங்கல் இவற்றிற்கெல்லாம் எவ்வளவு முக்கியத்துவம் உண்டோ அதற்கு சற்றும் குறையாத முக்கியத்துவம் நம் தமிழ் சினிமாவிற்கு உண்டு.

1931ம் ஆண்டிலே வெளிவந்த முதல் தமிழ் சினிமாவான ‘காளிதாஸ்’ படத்தைத் தொடர்ந்து 1939ம் ஆண்டு வரை வெளியான படங்களில் எந்தெந்த படங்கள் எப்போது வெளியாகின என்ற விவரமான குறிப்புகள் எந்த இணையதளத்திலும் தெளிவாக இல்லை. 1940ம் ஆண்டு முதல்தான் அதுபோன்ற பதிவுகள் காணக்கிடைக்கின்றன.

அந்த குறிப்புகளின் அடிப்படையில் பார்த்தால் தமிழ் சினிமா உலகின் பிதாமகர் என்று போற்றப்படுகின்ற இயக்குநர் கே.சுப்ரமணியம் அவர்களின் இயக்கத்தில் உருவான ‘பக்த சேதா’ என்ற படம் 1940ம் ஆண்டு பொங்கலன்று வெளியாகி உள்ளது தெரியவருகிறது.

1941ம் ஆண்டு பொங்கலன்றும் கே.சுப்ரமணியம் இயக்கத்தில் ஒரு படம் வெளியானது. அது ‘கச்ச தேவயானி’. தமிழ் சினிமா உலகின் முதல் கவர்ச்சிக் கன்னியான டி.ஆர்.ராஜகுமாரியை தமிழ் சினிமா ரசிகர்களுக்கு அறிமுகப்படுத்தி வைத்தது. அவரது தாக்கத்திலிருந்து தமிழ் ரசிகர்கள் மீள வெகு நாட்கள் ஆனது என்பது வேறு விஷயம்.

இன்று ரஜினிகாந்த், கமல்ஹாசன், அஜித், விஜய் ஆகியோர் தமிழ் சினிமாவில் முதல் நான்கு இடங்களில் இருப்பதைப் போல தமிழ் சினிமா பேசத் தொடங்கிய காலகட்டத்திலே இருந்த இரு முன்னணி நட்சத்திரங்கள் எம்.கே. தியாகராஜ பாகவதரும், பி.யு.சின்னப்பாவும்தான். தமிழ் சினிமாவினுடைய முதல் சூப்பர் ஸ்டாரான எம்.கே,டி. முதல் இடத்திலும், அதற்கடுத்த இடத்தில் பி.யு.சி.யும் அப்போது இருந்தார்கள்.

மூன்று தீபாவளிகளைக் கடந்து ஓடிய மாபெரும் வெற்றிச் சித்திரமான ‘ஹரிதாஸ்’ படத்தைத் தந்த எம்.கே.தியாகராஜ பாகவதர் ஏராளமான படங்களில் நடித்திருந்தாலும் அவரது படங்களில் ஒன்று கூட பொங்கலன்று வெளியாகாதது ஏன் என்று தெரியவில்லை.ராஜா சாண்டோவின் இயக்கத்தில் உருவான ‘சந்திரகாந்தா’ என்ற படத்தின் மூலம் தமிழ் சினிமாவுக்கு அறிமுகமான பி.யு.சின்னப்பா நடித்த 28 படங்களில் இரண்டு படங்கள் பொங்கல் வெளியீடாக அமைந்துள்ளன.

அதில் முதல் படம் 1944ம் ஆண்டு வெளியான ‘ஹரிச்சந்திரா’. நடிகை கண்ணாம்பாவின் தயாரிப்பில் உருவான படம் அது. அந்தப் படத்தைத் தொடர்ந்து 1949ம் ஆண்டில் சின்னப்பா நடித்த ‘கிருஷ்ண பக்தி’ என்ற திரைப்படம் பொங்கல் வெளியீடாக திரைக்கு வந்தது.‘சதிலீலாவதி’ படத்தின் மூலம் தமிழ் சினிமா உலகில் அடி எடுத்து வைத்த புரட்சி நடிகர் எம்ஜிஆர் கதாநாயகனாக உயர்ந்ததற்குப் பின்னாலே பொங்கல் வெளியீடாக வெளிவந்த, மாடர்ன் தியேட்டர்ஸ் தயாரிப்பில் அவர் நடித்த ‘அலிபாபாவும் நாற்பது திருடர்களும்’ படத்துக்கு பெரும் பங்குண்டு.

எம்ஜிஆர், பானுமதி ஜோடியாக நடித்த அந்தப் படம்தான் தமிழில் வெளியான முதல் வண்ணப்படம். அது கேவா கலரில் உருவாக்கப்பட்டிருந்தது.
‘அலிபாபாவும் நாற்பது திருடர்களும்’ பற்றி ருசிகரமான தகவலும் ஒன்று உண்டு. அந்தப் படம் தயாரிப்பில் இருந்தபோது அதன் படப்பிடிப்பிற்காக அப்படத்தின் தயாரிப்பாளரும் இயக்குநருமான டி.ஆர்.சுந்தரம் கேட்ட தேதிகளை எம்ஜிஆர் சரியான நேரத்துக்கு ஒதுக்கித் தராததால்
 எம்ஜிஆருக்குப் பதிலாக ஒரு டூப்பை வைத்து, கதாநாயகனும் கதாநாயகியும் சேர்ந்து நடிக்கவேண்டிய ஒரு பாடல் காட்சி உட்பட அவர் சம்பந்தப்பட்ட காட்சிகள் எல்லாவற்றையும் படமாக்கி முடித்து விட்டார் டி.ஆர்.சுந்தரம்.

அந்தச் சம்பவம் நடந்த சில நாட்களுக்குப் பின் மாடர்ன் தியேட்டர்ஸுக்கு வந்த எம்ஜிஆர், ‘எப்போது படப்பிடிப்பை வைத்துக் கொள்ளலாம்?’ என்று டி.ஆர்.சுந்தரத்திடம் கேட்டபோது, ‘படப்பிடிப்பா?’ என்று சிரித்தபடியே அவரைப் பார்த்துக் கேட்ட டி.ஆர்.சுந்தரம், ‘நான் கூப்பிட்டபோது நீங்கள் வராததால் உங்களுடைய காட்சிகள் எல்லாவற்றையும் டூப்பை வைத்து படமாக்கிவிட்டேன்’ என்று சொன்னதுடன், படமாக்கப்பட்ட அந்தக் காட்சிகளை எல்லாம் அவருக்குப் போட்டுக் காட்டினார்.

அந்தச் சம்பவம் காரணமாக டி.ஆர்.சுந்தரம் மீது ஆத்திரமடைந்த எம்ஜிஆர் அதற்குப் பின்னாலே மாடர்ன் தியேட்டர்ஸ் நிறுவனத்தில் உருவான எந்தப் படத்திலும் நடிக்கவில்லை. ‘அலிபாபாவும் நாற்பது திருடர்களும்’ படத்தைத் தொடர்ந்து பொங்கலன்று வெளியான எம்ஜிஆர். படங்களில் ‘சக்கரவர்த்தித் திருமகள்’, ‘பணத்தோட்டம்’. ‘வேட்டைக்காரன்’, ‘எங்க வீட்டுப் பிள்ளை’, ‘அன்பே வா’, ‘தாய்க்குத் தலை
மகன்’, ‘ரகசிய போலீஸ் 115’, ‘மாட்டுக்கார வேலன்’ ஆகிய படங்கள் மிகப்பெரிய வெற்றிப்படங்களாக அமைந்தன.

1965ம் ஆண்டு சாணக்யாவின் இயக்கத்தில் வெளியான ‘எங்க வீட்டுப் பிள்ளை’ படத்தில் எம்ஜிஆர் இரட்டை வேடங்களில் நடித்திருந்தார். வாகினி ஸ்டூடியோவின் சார்பிலே தயாரிக்கப்பட்ட அந்தப் படம் மிகப் பெரிய வெற்றிப் படமாக அமைந்தது. அது மட்டுமின்றி வசூலிலும் பல புதிய சாதனைகளைப் படைத்திருக்கிறது. அந்தப் படம் மிகப்பெரிய வெற்றி பெற்றதால் பல திரைப்பட விநியோகஸ்தர்கள் எம்ஜிஆரை வைத்து படம் எடுக்கும்படி ஏவிஎம் நிறுவனத்தினரை வற்புறுத்தத் தொடங்கினார்கள்.

அந்த சமயத்தில் ஏவிஎம் நிறுவனத்தால் அறிமுகப்படுத்தப்பட்ட இயக்குநரான ஏ.சி திருலோகச்சந்தர், எம்ஜிஆருக்கு ஏற்ற ஒரு கதையை உருவாக்கி வைத்திருந்ததால் தங்களுடைய தந்தையுடைய அனுமதியோடு எம்ஜிஆரை சந்தித்த ஏவிஎம் குமாரர்கள் தங்கள் நிறுவனத்திற்காக அவர் ஒரு படம் நடித்துத்தர வேண்டும் என்று கேட்டுக்கொண்டார்கள்.

அப்படி ஒரு வாய்ப்புக்காக காத்துக்கொண்டு இருந்ததைப் போல உடனடியாக அந்தப் படத்தில் நடிக்க ஒப்புக்கொண்ட எம்ஜிஆர் அந்தப் படத்தில் நடிப்பதற்காக கேட்ட சம்பளம் எவ்வளவு தெரியுமா? மூன்று லட்சம் ரூபாய்!

வாகினியின் தயாரிப்பான ‘எங்க வீட்டுப் பிள்ளை’ 65ம் ஆண்டு பொங்கலுக்கு வெளியானதால் 66ம் ஆண்டு பொங்கலுக்கு தங்களது தயாரிப்பில் எம்ஜிஆர். நடிக்கின்ற படமான ‘அன்பே வா’ வெளியாக வேண்டும் என்ற ஆசை நிறுவனத்திற்கு ஏற்பட்டது. அப்போது எம்ஜிஆருடன் மிகவும் நெருக்கமான பழக்கத்தில் இருந்தவர் மெய்யப்ப செட்டியாரின் மூன்றாவது மகனான எம்.சரவணன். அடிக்கடி படப்பிடிப்புத் தளத்துக்குச் சென்று
எம்ஜிஆரை சந்தித்துப் பேசுவதை அவர் வழக்கமாக வைத்துக் கொண்டிருந்தார்.

அந்த உரிமையில் தங்களது படம் பொங்கலுக்கு வெளியாக வேண்டும் என்று எம்ஜிஆரிடம் அவர் கேட்டபோது, தனது நிர்வாகியாக பணியாற்றிக் கொண்டிருந்த ஆர்.எம்.வீரப்பனின் தயாரிப்பில் அப்போது உருவாகிக் கொண்டிருந்த ‘காவல்காரன்’ படத்தை பொங்கலுக்கு வெளியிட திட்டமிட்டிருப்பதாக முதலில் சரவணனிடம் சொன்ன எம்ஜிஆர், ‘எதற்கும் வீரப்பனிடம் ஒரு வார்த்தை பேசிவிட்டு உங்களுக்கு பதில் சொல்கிறேன்’ என்று சரவணனிடம் தெரிவித்தார்.

அதன் பின்னர் ஆர்.எம்.வீரப்பனின் சம்மதத்துடன் ‘அன்பே வா’ படத்தை பொங்கலுக்கு வெளியிட ஒப்புக் கொண்ட எம்ஜிஆர் அதற்காக தன்னுடைய சம்பளத் தொகையில் 25 ஆயிரம் ரூபாயை அதிகரித்துத் தருமாறு மெய்யப்ப செட்டியாரிடம் கேட்டுக்கொண்டார். ‘எங்க வீட்டுப்பிள்ளை’ படத்தைப் போலவே ‘அன்பே வா’ திரைப்படமும் மிகப் பெரிய வெற்றிப் படமாக அமைந்தது.

1952 ஆம் ஆண்டு தீபாவளியன்று வெளியான ‘பராசக்தி’ படத்தில் அறிமுகமான நடிகர் திலகம் சிவாஜி கணேசனின் திரையுலக வாழ்க்கையில், அவர் நடித்து பொங்கலன்று வெளியான முதல் படமாக 1955ல் வெளியான ‘காவேரி’ படம் அமைந்தது. சிவாஜியுடன் எண்ணற்ற படங்களில் இணைந்து நடித்த பத்மினி, சிவாஜிக்கு ஜோடியாக நடித்த அந்தப் படத்தில் பத்மினியின் சகோதரிகளான லலிதா, ராகினி ஆகியோரும் நடித்திருந்தனர்.

நூறு நாட்களைக் கடந்து ஓடிய அந்த படத்தின் கதையை ‘ராஜகுமாரி’ என்ற படத்தின் மூலம் எம்ஜிஆரை கதாநாயகன் ஆக்கிய இயக்குநரான ஏ.எஸ்.ஏ. சாமி எழுத டி.யோகானந்த் அந்த படத்தை இயக்கியிருந்தார். சிவாஜி நாயகனாக நடித்த, ‘நல்ல வீடு’, ‘நான் பெற்ற செல்வம்’, ‘இரும்புத்திரை’, ‘கர்ணன்’, ‘எங்க மாமா’, ‘இரு துருவம்’, ‘மனிதனும் தெய்வமாகலாம்’, ‘அவன் ஒரு சரித்திரம்’, ‘உருவங்கள் மாறலாம்’, ‘சாதனை’, ‘ஞானப் பறவை’ ஆகிய பல படங்கள் பொங்கலுக்கு வெளியாகி இருக்கின்றன.