த கால்

சமூக வலைத்தளங்களைக் கலக்கிக்கொண்டிருக்கும் கொரியன் படம், ‘த கால்’. நெட்பிளிக்ஸில் வெளியாகி சக்கைப்போடு போட்டுக்கொண்டிருக்கிறது.
கடந்த காலத்தைச் சேர்ந்த பெண்ணுடன் நிகழ்காலத்தில் வாழும் பெண்ணை இணைக்கிறது ஒரு போன் கால். அதற்குப் பிறகு அவர்களின் வாழ்க்கை எப்படி புரட்டிப்போடப்படுகிறது என்பதே படத்தின் கதை.

2019ம் வருடத்தின் ஒரு நாள். கிராமத்திலிருக்கும் அம்மாவைக் காணச் செல்கிறாள் இளம் பெண் சியோன். வழியில் தனது மொபைல் போனைத் தொலைத்துவிடுகிறாள். சிறு வயதில் அவள் வாழ்ந்த வீடு அந்தக் கிராமத்தில்தான் இருக்கிறது. ரொம்ப நாட்களாக பூட்டியே கிடக்கும் அந்த வீட்டுக்கு விசிட் அடிக்கிறாள். அங்கே பழமையான கார்டுலெஸ் போன் ஒன்று அவள் கண்ணில் படுகிறது. அந்தப் போனுக்கு இடைவிடாமல் அழைப்பு வந்துகொண்டே இருக்கிறது. பதறிப்போகிறாள் சியோன்.

ஒரு கட்டத்தில் போனை எடுத்து பேசி விடுகிறாள். எதிர்த்தரப்பில் இருந்து ‘‘என் அம்மா கொடுமைப்படுத்துகிறாள். ப்ளீஸ் என்னைக் காப்பாற்றுங்கள்...’’ என்று ஒரு பெண்ணின் குரல் ஒலிக்கிறது. அதிர்ச்சியடையும் சியோன் வீடு முழுவதும் சல்லடை போட்டுத் தேடுகிறாள்.
1999ல் யங் சூக் என்ற பெண்ணும் அவளின் வளர்ப்புத் தாயும் அந்த வீட்டில் வாழ்ந்திருக்கும் விஷயம் சியோனுக்குத் தெரிய வருகிறது. யங் சூக் ஓர் அனாதை. ஆவிகளுடன் தொடர்புகொள்ளும் ஒரு பெண்தான் அவளை வளர்த்து வந்தாள். யங்- சூக்கைப் பற்றி இணையத்தில் தேடிப்பார்க்கிறாள் சியோன்.