இந்த வருடத்தில் பெரிய எதிர்பார்ப்புகளைக் கிளப்பி ‘அமேசான் ப்ரைமி’ல் வெளியாகியிருக்கும் தெலுங்குப் படம் ‘வி’. தமிழ் டப்பிங்கிலும் பார்க்கக் கிடைக்கிறது.  சூப்பர் போலீஸுக்கும் சீரியல் கில்லருக்கும் இடையிலான யுத்தம்தான் ‘வி’. பலமுறை பார்த்து சலித்துப்போன ஒரு விளையாட்டை புதுப்பொலிவுடன் சொல்ல முயற்சித்திருக்கிறார்கள்.

ஹைதராபாத்தில் நடந்த ஒரு கலவரத்தைக் கட்டுப்படுத்தி மெடல்களை அள்ளுகிறார் டிசிபி ஆதித்யா. எந்த நாளிதழைத் திறந்தாலும் தலைப்புச் செய்தியாக அவரின் பெயரே அச்சாகியிருக்கிறது. ‘சூப்பர் காப்’, ‘ஸ்டைலீஷான போலீஸ்’ என மக்களால் கொண்டாடப்படுகிறார்.

ஊரே ஆதித்யாவின் கட்டுப்பாட்டில் அமைதியாக இருக்க, இன்ஸ்பெக்டர் ஒருவர் மர்மமான முறையில் கொல்லப்படுகிறார். தனது கண்காணிப்பில் இருக்கும் பகுதியில் கொலை விழுந்தது ஆதித்யாவைக் கோபமூட்ட, களத்தில் இறங்குகிறார். இதற்கிடையில் க்ரைம் நாவல் எழுதும் அபூர்வாவுடன் ரொமான்ஸ் வேறு.

அடுத்தடுத்து நான்கு பெருந்தலைகள் கொடூரமாக கொல்லப்படுகின்றனர். மேலிடத்தில் இருந்து கொலையாளியைப் பிடிக்க ஆதித்யாவுக்கு அழுத்தம் அதிகரிக்கிறது. ஒவ்வொரு கொலையின்போதும் அடுத்த கொலைக்கான க்ளூவைக் கொடுத்து ஆதித்யாவிடம் விளையாடுகிறான் சீரியல் கில்லர்.