7.5% ஒதுக்கீடு அரசுப் பள்ளி மாணவர்களுக்கு நல்லதா ஏழரையா?

மருத்துவப் படிப்புகளுக்கு தேசிய அளவிலான நுழைவுத் தேர்விலிருந்து (நீட்) தமிழ்நாட்டுக்கு விலக்கு அளிக்கப்பட வேண்டும் என்று அனைவரும் வலியுறுத்தி வரும் நிலையில், இந்தத் தேர்வால் பாதிக்கப்பட்டிருக்கும் அரசுப் பள்ளி மாணவர்களுக்கு நிவாரணம்போல 7.5% இடஒதுக்கீட்டை அறிவித்திருக்கிறது தமிழக அரசு.

மாநில பாடத்திட்டத்தின்படி ஆண்டுதோறும் மேல்நிலைக் கல்வியை முடிக்கும் சுமார் 8 லட்சம் தமிழக மாணவர்களில், கிட்டத்தட்ட மூன்றில் இரு பங்கினர் அரசுப் பள்ளி களைச் சேர்ந்தவர்கள். ஆனால், நீட் தேர்வு நடைமுறைக்கு வந்த பிறகு கடந்த மூன்றாண்டுகளில் 14 அரசுப் பள்ளி மாணவர்கள் மட்டுமே மருத்துவப் படிப்புக்கான வாய்ப்பைப் பெற்றார்கள்.

அரசுப் பள்ளி மாணவர்கள் திறனில் குறைந்தவர்கள் இல்லை, தேர்ந்தெடுக்கும் முறையே மோசமானது என்று பல தரப்பினரிடமிருந்து கருத்துக்கள் வந்தன. இது தொடர்பாக அரசுக்கு பரிந்துரைக்க நியமிக்கப்பட்ட நீதிபதி பொன்.கலையரசன் தலைமையிலான குழு, 10% இட ஒதுக்கீட்டைப் பரிந்துரைத்தது. அரசு அதைக் குறைத்து 7.5% என்று அறிவித்துள்ளது.    

“ஒரு காலத்தில் பனிரெண்டாம் வகுப்பு முடித்தவுடன் மருத்துவத்திற்கென நுழைவுத்தேர்வு எழுத வேண்டும் என்ற நிலை மாறி, பனிரெண்டாம் வகுப்பு மதிப்பெண் மட்டுமே போதும் என்றானது. ஆனால், கடந்த சில ஆண்டுகளாக மத்திய அரசு மருத்துவப் படிப்பிற்கென அகில இந்திய அளவில் நுழைவுத்தேர்வு நடத்த வேண்டும் என முடிவெடுத்தபோது தமிழகம் உட்பட பல்வேறு மாநிலங்களில் கடுமையான எதிர்ப்புகள் கிளம்பின.

தமிழகத்தில் பலதரப்பு மக்களின் எதிர்ப்பை எல்லாம் பொருட்படுத்தாமல் அப்போதைய முதல்வர் ஓ.பன்னீர்செல்வம் கையெழுத்திட, தமிழகமும் மத்திய அரசிற்கு இணங்கிப்போனது...” என்று பேச ஆரம்பித்தார் பேராசிரியர் சம்பத்குமார்.‘‘தேசிய தேர்வு முகமை எனப்படும் (National Testing Agency-NTA) அமைப்பு மருத்துவப் படிப்புகளுக்காக தேசிய தகுதி & நுழைவுத்தேர்வை (National Eligibility and Entrance Test - NEET) ஆண்டுதோறும் நடத்தி வருகிறது.

இதில் மத்திய அரசின் மருத்துவ பல்கலைக்கழக இடங்களில் மொத்தமாகவும், ஒவ்வொரு மாநிலத்தில் உள்ள இடங்களில் 15% மத்திய தொகுப்பு எனவும் கணக்கிடப்படும். இந்த இடங்களில் மத்திய அரசின் இட ஒதுக்கீட்டு அளவான எஸ்சி - 15%, எஸ்டி - 7.5%, ஓபிசி - 27%, இடபிள்யூஎஸ் - 10%,
பிடபிள்யூடி - 5% என்று மொத்தத்தில் 64.5% இடங்கள் இட ஒதுக்கீட்டின்படி நிரப்பப்படும். மீதமுள்ள இடங்களை அந்தந்த மாநிலங்கள் தங்களது இட ஒதுக்கீடு கொள்கையின் அடிப்படையில் நிரப்பு வார்கள்.

‘சமூக நீதித் தொட்டில்’ என்று அழைக்கப்படும் தமிழகம் ஏற்கனவே 69% இட ஒதுக்கீட்டைப் பின்பற்றி வருகிறது. SC - 15%, SC.A - 3%, ST - 1%, BC - 26.5%, BC.M - 3.5%, MBC - 20% என இருந்த இட ஒதுக்கீட்டில் இப்போது புதிதாக அரசுப் பள்ளிகளில் பயின்ற மாணவர்களுக்கு 7.5% உள் ஒதுக்கீடு வழங்க முடிவெடுக்கப்பட்டுள்ளது.