வந்தது கொரோனா... முறுக்கு வியாபாரியானார் கல்லூரி பேராசிரியர்!

ஒரு தொற்றுநோய் உலகையே முடக்கி கோரதாண்டவம் ஆடிக் கொண்டிருக்க... பலரும் வாழ்வாதாரம் இழந்து தவிக்கிறார்கள். இதில் கல்லூரி பேராசிரியர்களும் அடக்கம் என்பதுதான் முகத்தில் அறையும் நிஜம். கோவை பொறியியல் கல்லூரி ஒன்றில் கணினி துறைத் தலைவராகவும் பேராசிரியராகவும் இருந்த டி.மஹேஷ்வரன், இன்று தன் சொந்த ஊரில் முறுக்கு வியாபாரம் செய்யத் தொடங்கியிருக்கிறார்.  

‘‘பிப்ரவரி மாசமே கல்லூரி வேலையை விட்டுட்டு சொந்த ஊரான நெய்வேலிக்கு வந்துட்டேன். ஒவ்வொரு பேராசிரியரும் தலைக்கு அஞ்சு அட்மிஷன் கொண்டு வரணும்னு கெடு விதிச்சாங்க. அதோடு சம்பளத்திலும் கை வைச்சாங்க.இது வேலைக்கு ஆகாதுன்னு தெரிஞ்சது. குடும்பப் பொறுப்பு, செலவு, மாசா மாசம் இஎம்ஐ... இப்படி கழுத்தை நெரிக்கிற பல பிரச்னைகள் இருக்கே!இதை எப்படி சமாளிக்கறதுனு நானும் என் குடும்பமும் யோசிச்சோம்.

என் அப்பா சின்னதா ஒரு கடை வெச்சிருக்கார். போதுமான போக்குவரத்து இல்லாம எந்த தின்பண்டமும் வரலை. எல்லா பாட்டில்களும் காலியா இருந்துச்சு. அதே சமயம் என் மனைவி சித்திரை செல்வம், திருவாரூரைச் சேர்ந்தவங்க; திருவாரூர் ஸ்பெஷல் முறுக்கு சுடுறதுல அவங்க திறமைசாலி.
இதையே எங்க முதலீடா வெச்சு சுவையான பலகாரங்கள் செய்தோம். அதை எங்க அப்பா கடைலயே விற்பனைக்கு வைச்சோம்...’’ என்னும் மஹேஷ்வரன், வீட்டுப் பலகாரங்களுக்கு அதிக கிராக்கி இருப்பதைப் புரிந்துகொண்டார்.