பள்ளிக் குழந்தைகள் இந்த மூன்று மாத இடைவெளியில், ஊட்டச்சத்தின்மையால் எடை குறைந்து மெலிந்து சுருங்கிக் கிடக்கிறார்கள் என்கிறார் சென்னை முகப்பேரு கார்ப்பரேஷன் தொடக்கப் பள்ளியின் தலைமை ஆசிரியர் கிருஷ்ணவேணி.‘‘பள்ளிக் குழந்தைகளுக்கான மதிய உணவாக அரிசி, பருப்பு, சிறுபயறு, மூக்குக் கடலை, முட்டை, காய்கறிகள்... என அரசால் வழங்கப்படுகின்றன.

இவற்றை உணவாக்கி பருப்பு சாதத்துடன், தினம் ஒரு காய்கறி, கீரை, அவித்த முட்டையோடு, வாரத்தில் ஒரு நாள் சிறுபயறு, மூக்குக் கடலையால் செய்த சுண்டலும் சத்துணவுத்திட்டத்தில், மாணவர்களுக்கு வழங்கப்படுகிறது. இதற்காகவே அரசு நிதியையும் ஆண்டுதோறும் ஒதுக்குகிறது.

இந்த ஊரடங்கில் குழந்தைகளின் உணவுக்காக ஒதுக்கப்பட்ட நிதி எங்கே போனது?’’ என்று கேட்கும் கிருஷ்ணவேணி, தான் பணிபுரியும் பள்ளியின் உணவுக் கூடத்தில் தேங்கிக்கிடக்கும் உணவுப் பொருட்களை இயலாமையுடன் பார்க்கிறார்.

‘‘இந்த நோய்த் தொற்று நேரத்தில், அரசு ஏன் இவற்றை குழந்தைகளுக்கு வழங்கவில்லை? மார்ச் மாத இறுதியில் தொடங்கிய ஊரடங்கில், மே மாத விடுமுறை தவிர்த்து மற்ற மாதங்களில் தினம் ஒரு முட்டை வீதம் வாரத்துக்கு 5ம், அரிசி பருப்பையும் சேர்த்து கொடுத்திருக்கலாம். குழந்தைகள் கை கழுவ சோப்பு, மாஸ்க்கை இணைத்து சிறு கிட்டுகளாக குழந்தைகளின் பெற்றோர்களை வரவழைத்து வாரம் ஒரு முறை வழங்க அரசு ஏற்பாடு செய்திருக்கலாம்.

மீதிக் குழந்தைகள் நிற்க முடியாமல் வீட்டிலிருக்கும் அரிசி உணவையே திரும்பத் திரும்ப சாப்பிடும் நிலை ஏற்பட்டிருக்கிறது.

பள்ளிகளை மூடியபோதே குழந்தைகளுக்கான உணவுப் பொருட்கள் எல்லாப் பள்ளிகளிலும் இருப்பில் இருந்தன. ஆனால், தேங்கிய உணவுப் பொருட்களை திருப்பிக் கொடுக்கச் சொல்லி அரசு உத்தரவிட்டது. பார்த்தால்... அந்த உணவுப்பொருட்களின் தேதி காலாவதியாகி இருந்தது.

எத்தனை குழந்கைள் பள்ளிகளில் சத்துணவு சாப்பிடுகிறார்கள்... எவ்வளவு உணவு இருப்பில் உள்ளது... என்பவற்றைத் தெரிந்துகொள்வதற்கான தொழில் நுட்பங்கள் இன்று வந்துவிட்டன. இணையத்தில் யார் வேண்டுமானாலும் இதைப் பார்க்கலாம். இரண்டே இரண்டு சதவிகிதம் தவிர மீதமுள்ள 98% குழந்தைகள் சத்துணவை பள்ளிகளில் சாப்பிடுபவர்கள்.

இது தெரிந்தும் இப்படிச் செய்யலாமா?’’ ஆற்றாமையுடன் வினவும் கிருஷ்ணவேணி, 6ம் வகுப்புக்கு மேல் அரசுப் பள்ளிகளில் படிக்கும் பெண் குழந்தைகளுக்கு நாப்கின், இரும்புச்சத்து மாத்திரைகளும் ஊரடங்கு காலத்தில் வழங்கப்படவில்லை என்கிறார்.

‘‘இவற்றை ஆசிரியர்களை வைத்தே மாணவர்களுக்கு வழங்க ஏற்பாடு செய்திருக்கலாம். பள்ளிக் குழந்தைகளின் ஆரோக்கியத்தில் கவனம் செலுத்தவே அரசு இந்த ஏற்பாடுகளைச் செய்தன.

இப்பொழுது அதே அரசே குழந்தைகளின் எதிர்காலத்தை நசுக்குகிறது.பொறுப்பான அரசுப்பள்ளி ஆசிரியர்கள் அனைவரும் இதையெல்லாம் அரசின் கவனத்துக்குக் கொண்டு செல்கிறோம். நல்ல முடிவு எடுக்கப்படும் என நம்புகிறோம்...’’ என நம்பிக்கையுடன் சொல்கிறார் கிருஷ்ணவேணி.

நீண்ட ஊரடங்கால் அனைவருமே வாழ்வாதாரத்தை இழந்து தவிக்கிறார்கள். குழந்தைகளுக்கு சத்தான உணவு ஒரு வேளையாவது கிடைத்தால் நன்றாக இருக்கும். இந்த கொரோனா காலத்திலும் மதிய உணவைக் கொடுக்க அரசு அனுமதி வழங்கலாம்.

பெரும்பாலான அரசு பள்ளிகளில் குறைவான குழந்தைகள்தான் இருக்கிறார்கள். சமூக இடைவெளியோடு, சத்தான ஒரு வேளை உணவை வழங்குவது நோய் எதிர்ப்பு சக்தியை உருவாக்கும்.