அப்பா வந்தான்

முட்டை ஓடு உடைந்த மாதிரி பனி உடைந்தது. ஏலகிரி மலையில் சூரியக்குஞ்சு எட்டிப் பார்த்தது. இன்னும் கொஞ்ச நேரத்தில் பகல் விரிந்து பூத்து விடும், ராஜாத்தி குடிசையை விட்டு வெளியே வந்து கிழக்கைப் பார்த்து நின்றாள். கூந்தலை உதறி முடிந்து கொண்டாள், சேலையை அவிழ்த்து சரியாக உடுத்தி கொண்டாள். காலமெல்லாம் வளைவதற்கு பழகி விட்ட உடம்பை வளைத்து குடிசைக்குள் நுழைந்தாள். “அப்பு… அப்பு…” தூங்கிக் கொண்டிருந்த பயலை எழுப்பினாள்.அப்புவை இப்போது எழுப்பினால்தான் குளிப்பாட்டி, தலைவாரி பழையது போட்டு ஆறு மணிக்குள் கொண்டு போய் மிட்டாய் கம்பெனியில் சேர்க்க முடியும்.