பெண்கள் பங்கெடுக்கும் போராட்டங்கள்! மாறிவரும் இந்தியாவின் முகம்

ஆயிஷா ரென்னா, லதீடா பர்ஸானா, ஷகீன் அப்துல்லா...
இந்தப் பெயர்கள் பலருக்கும் தெரியாது. சிலருக்கு எங்கோ கேட்டது போல் இருக்கே என்று தோன்றக்கூடும். ஆனால், இவர்களின் புகைப்படங்களைப் பார்த்தால் நிச்சயம் கண்டுபிடித்துவிடுவீர்கள். ‘ஓ இவர்களா… தில்லி ஜாமியா பல்கலைக் கழக மாணவிகள்தானே’ என்று சொல்வீர்கள்.

கடந்த மாதம் மத்திய அரசு சிஏஏ சட்டத் திருத்தம் கொண்டுவந்தபோது அதை வட இந்தியா முழுதும் கடுமையாக எதிர்த்தது. அப்போது தலைநகர் தில்லியில் உள்ள ஜாமியா பல்கலைக் கழகம் இந்தப் போராட்டத்தில் ஊக்கமுடன் பங்கெடுத்தது.

மாணவர்களின் போராட்டத்தை ஒடுக்க காவல் துறை தடியடி நடத்தியபோது, காவல் துறையை நோக்கி, தைரியமாக விரலை உயர்த்திப் பேசியவர்தான் ஆயிஷா ரென்னா. மற்ற இருவரும் அந்த தடியடி சம்பவத்தின் போது உடன் இருந்தவர்கள்.சென்ற மாதம் இவர்கள் தாக்கப்படும் சம்பவம் வைரலானதைத் தொடர்ந்து இந்த மாணவிகளின் பேட்டிகளும் சில ஊடகங்களில் வெளிவந்தன. அதைத் தொடர்ந்து இவர்கள் மேல் இப்போதும் கவனம் குவிந்துள்ளது.

அதிகாரம் என்றால் அடங்கிப் போவதுதான் பெரும்பாலான சாமானியர்களின் இயல்பு. அதிலும் அதிகாரம் ஆயுதத்துடன் எதிரே வரும்போது ஓடிப் போகிறவர்களுக்கு இடையே இந்தப் பெண்கள் துணிச்சலாக எதிர்த்து நின்றதுடன், ‘இது தவறு’ என்று காவலர்களை நோக்கி எச்சரித்த துணிச்சலைத்தான் உலகமே வியந்து பாராட்டிக்கொண்டிருக்கிறது.