கஷ்டங்கள் தீர்க்கும் ஆலயங்கள்-43

நம் பாவங்களைப் பந்தாடும் நாயகி

அந்த ஆமணக்குக் காட்டின் அடர்ந்த ஒரு பகுதியில் நின்றிருந்தார் பத்திரயோகி. எதிரே பரமேஸ்வரர் ரிஷபம் மீது அமர்ந்தபடி அற்புதமாக சேவை சாதித்துக் கொண்டிருந்தார். ‘‘நான் கோடி உருவங்களில் உனக்கு அம்பிகையாக, விநாயகனாக, குமரனாகக் காட்சி தந்த போது நீ எந்த வேத வசனத்தை உணர்ந்தாய்..? தயக்கமின்றி மனதில் பட்டதைச் சொல் பத்திரா!’’ ஈசன் கருணை பொங்க ஆணை பிறப்பித்தார். அதற்காகவே காத்திருந்தவர் போல, முனிவர் விளக்கம் தர ஆரம்பித்தார்.

‘‘‘ச பிரம்ம ச சிவச்ச ச ஹரி சேந்திர சோக்ஷர பரம ஸ்வராட்’ என்று வேதம் சொல்கிறது. அதாவது பிரம்மனாகவும், ஹரியாகவும், சிவனாகவும், அம்பிகையாகவும், அனைத்துமாய் நிற்கும் தெய்வம் ஒன்றே என்பது வேதத்தின் இறுதியான உறுதியான முடிவு. இங்கு இன்று கோடி அம்பிகையாகவும், முருகனாகவும், கணேசனாகவும் தாங்கள் காட்சி தந்து, வேதத்தை மீண்டும் நிலைநாட்டி விட்டீர்கள் பரம்பொருளே!’’ என்றபடி ஈசனை நமஸ்கரித்தார் முனிவர்.