அக்டோபர் 10, உலக மனநல தினத்தை முன்னிட்டு பாலிவுட் நடிகை தீபிகா படுகோன், தான் உபயோகித்த ஆடை அணிகலன்களை விற்பனைக்கு அறிமுகப்படுத்தினார்.

தன் deepikapadukone.com என்ற இணையதளத்தில் தன் உடைமைகளை வெளியிட்ட தீபிகா, இதில் வரும் வருமானம் அவருடைய ‘லிவ் லவ் லாஃப்’ அமைப்பிற்காக (The Live Love Laugh) உபயோகிக்கப்படும் என்றும் கூறியுள்ளார். மன அழுத்தம், கவலை, மனச்சோர்வால் பாதிக்கப்படும் மக்களுக்காக இந்த அமைப்பு இயங்கிவருவது குறிப்பிடத்தக்கது.

டுவிட்டர் பயனர்கள் பாதுகாப்பு நோக்கங்களுக்காகக் கொடுத்த மொபைல் எண்ணையும், மின்னஞ்சல் முகவரியையும், விளம்பரங்கள் அனுப்ப பயன்படுத்திக்கொண்டதாக டுவிட்டர் ஒப்புக்கொண்டுள்ளது.

இதற்காக மன்னிப்பும் கேட்ட டுவிட்டர் நிறுவனம், இது தற்செயலாக நடந்த பிழை என்று தெரிவித்துள்ளது. இதனால் எவ்வளவு மக்கள் பாதிக்கப்பட்டுள்ளனர் என்ற எண்ணிக்கையை திரட்ட முடியவில்லை என்று கூறி, இது மேலும் நடக்காமல் தடுக்க அதற்கான தக்க நடவடிக்கை எடுக்கப்பட்டுள்ளதாகவும் தெரிவித்திருந்தது.

மும்பையைச் சேர்ந்த 82 வயது பிச்சைக்காரர் ஒருவரின் உடலை, ரயில் தண்டவாளங்களுக்கு நடுவிலிருந்து மீட்ட போலீசார் அவரை சோதனையிட்டனர். அப்போது அவரது குடிசையிலிருந்த பழைய  சாக்குப் பையில், ஒரு லட்சத்திற்கும் அதிகமான நாணயங்களும், வங்கி விவரங்களும் கிடைத்தன.

அதில் அவரது பெயரில், நிரந்தர வைப்பில் எட்டு லட்ச ரூபாயும், சேமிப்புக் கணக்கில் 96 ஆயிரமும் இருந்துள்ளது. இதை பத்திரமாக ஒரு ப்ளாஸ்டிக் பையில் ஒளித்து வைத்திருக்கிறார். மொத்தமாக ரூ.11.5 லட்சம் பணத்தை போலீசார் இவரது பெயரிலிருந்து மீட்டு, ராஜஸ்தானில் வசிக்கும் அவரது மகனிடம் ஒப்படைக்கவுள்ளனர்.

மகாராஷ்டிரா மாநிலத்தைச் சேர்ந்த நேஹா ஷீக், ஒரு மருத்துவர். அவருக்கு அடுத்த மாதம் திருமணம் நிச்சயிக்கப்பட்டிருந்தது. இந்நிலையில்  கடந்த 9ம் தேதி, வேலை முடிந்து, கிளினிக்கில் இருந்து ஸ்கூட்டியில் வீடு  திரும்பிக்கொண்டிருந்தார்.

அப்போது, தானே பிவண்டி பகுதியிலிருந்த  பள்ளத்தில் ஸ்கூட்டியின் சக்கரம் சிக்க, கீழே விழுந்து, பின்னால் வந்த  லாரி மோதி சம்பவ இடத்திலேயே உயிரிழந்தார்.