பகவான்-40

Bravo America!

ஒரு மனிதரை நாடு கடத்துவது என்பது அவரை உச்சபட்சமாக அவமானப்படுத்துவது.“என் உயிரே போனாலும் உங்களை நாடு கடத்த மாட்டேன்...” என்கிற உருகுவே குடியரசுத் தலைவரின் பெருந்தன்மைக்கு, பகவான் நெகிழ்ச்சியாக நன்றி தெரிவித்தார்.

ஆனால் -விமான நிலையத்தில் அமெரிக்க அதிகாரிகள் வல்லூறுகள் மாதிரி காத்திருந்தார்கள்.பகவானின் பாஸ்போர்ட்டில் அவர் நாடு கடத்தப்பட்டதாக பதிவாக வேண்டும் என்பதில் உறுதியாக இருந்தார்கள்.உருகுவே குடியரசுத் தலைவரின் உறுதிக்கு மாறாக, விமான நிலையத்தில் இருந்த அதிகாரிகள் ஓஷோவை நாடு கடத்தியதாக விண்ணப்பத்தில் குறிப்பிட்டார்கள்.

உருகுவேயில் இருந்து ஓஷோவின் விமானம் மீண்டும் இலக்கில்லாமல் வானில் பறந்தது.இதற்கிடையே அவரை தாங்கள் கொடுத்த கெடுவுக்குள் வெளியேற்றி விட்டதால் உருகுவேவுக்கு முப்பத்தி ஆறு மில்லியன் டாலர்களை ஊக்கத் தொகையாக அமெரிக்க அரசு கொடுத்தது. அதாவது முப்பத்தி ஆறு மணி நேரக் கெடுவுக்குள் வெளியேற்றியதால் முப்பத்தி ஆறு மில்லியன் டாலர்களாம்!

இதைக் கேள்விப்பட்ட ஓஷோ நகைச்சுவையாக அறிவித்தார்.“உலக நாடுகளே உங்களுக்கு பணம் வேண்டுமானால், என்னை வரவேற்று உபசரியுங்கள். என்னை நாடு கடத்தி வெளியேற்ற அமெரிக்கா உங்களுக்கு எத்தனை மணி நேரம் கெடு விதிக்கிறதோ, அத்தனை மில்லியன் டாலர்களை நீங்கள் வெல்லலாம்!”

பகவான் நகைச்சுவையாகக் குறிப்பிட்டதை மொரீஷியஸ் பிரதமர் சீரியஸாக எடுத்துக் கொண்டாரோ என்னவோ தெரியவில்லை. ஓஷோவை, தான் வரவேற்கத் தயாராக இருப்பதாக தெரிவித்தார். அவர் தங்கள் நாட்டுக்கு வந்தால் தங்களுக்கு இரண்டு பில்லியன் டாலர்கள் கிடைக்கக்கூடும் என்று வெளிப்படையாகவே ‘பிசினஸ்’ ரகசியத்தைப் போட்டு உடைத்தார்.

பகவானின் விமானம் மொரீஷியஸ் தீவில் தரையிறங்கியது.விஷயம் கேள்விப்பட்டு அமெரிக்கா சுறுசுறுப்பானது. வந்த வேகத்திலேயே விமானம் மீண்டும் விண்ணில் கிளம்பியது. மொரீஷியஸுக்கு அமெரிக்காவிலிருந்து எவ்வளவு பணம் கைமாறியது என்று துல்லியமான தகவல்கள் இல்லை.அமெரிக்கா இவ்வளவு டார்ச்சர் செய்தும், அமெரிக்கர்கள் மீது பகவானுக்கு கோபமே வரவில்லை.

‘Bravo America!’ என்று அடிக்கடி வாழ்த்துவார். அமெரிக்கா தன்னுடைய முதன்மை எதிரியாகக் கருதி, இவரை உலகின் மூலை முடுக்குக்கு எல்லாம் துரத்திக் கொண்டிருந்த நிலையிலும், இம்மாதிரி அமெரிக்காவை வாழ்த்திப் பேசுவதை அவர் நிறுத்தவே இல்லை.