புதிய அரசு உடனடியாக தீர்க்க வேண்டிய டாப் 10 பிரச்னைகள்!

வெற்றிகரமாக நடந்து முடிந்திருக்கிறது பத்தொன்பதாவது மக்களவைத் தேர்தல். இந்தியா தனது ஜனநாயகப் பாதையில் கொஞ்சம் கொஞ்சமாக முன்னேறிக்கொண்டிருக்கிறது. ஆயிரம் பிரச்னைகள், சறுக்கல்கள், கருத்து முரண்பாடுகள் இருந்தாலும் இந்திய சிவில் சமூகம் மெல்ல முன்னேற்றத்தை நோக்கி நகர்ந்துகொண்டிருக்கிறது என்பதை யாரும் மறுத்துவிட முடியாது.

இந்தியா பல்வேறு விதமான மக்கள் திரள்கள், பலநூறு பண்பாடுகள், மத நம்பிக்கைகள், இனக்குழு மரபுகள் ஆகியவற்றின் கருத்தியல்களால் ஆன தொல்நிலம்.

இவை ஒவ்வொன்றும் ஒவ்வொரு மூலைக்கு இந்திய தேசியத்தை இழுக்கின்றன என்றால் மறுபுறம் உலகம் முழுதும் இருந்து வரும் புதிய நவீன சிந்தனைகள், அரசியல் சூழல்கள் கொடுக்கும் நிர்ப்பந்தங்கள் இன்னொருபுறம் சூழ்ந்து அழுத்துகின்றன. இவற்றுக்கு இடையேதான் நமது சமூக - அரசியல் - பொருளாதார நலத் திட்டங்கள் முதல் எந்த ஒன்றையும் செய்ய வேண்டி இருக்கிறது.

இப்போது அமையவுள்ள புதிய அரசு என்னவெல்லாம் செய்ய வேண்டியதாக உள்ளது என்பதை சுருக்கமாகப் பார்ப்போம்.

தேசிய அளவில் உள்ள பிரச்னைகளுக்கு முதலிடம் கொடுக்க வேண்டும் என்பதற்கு எப்போதுமே மாற்றுக் கருத்து இல்லை.

*இந்தியாவின் அயலுறவுக் கொள்கையில் சில முக்கியமான, ஆரோக்கியமான மாற்றங்களைக் கொண்டுவர வேண்டியது அவசியம். கடந்த இருபத்தைந்து ஆண்டுகளாக, அதாவது உலகமயமாக்கலுக்குப் பிறகு இந்தியாவின் அயலுறவுக் கொள்கை என்பது இந்தியாவின் நலன்களை அயல் நாடுகளுக்குத் தாரை வார்ப்பதாகவே உள்ளது.

உலகமயத்தால் நமக்கு சில நன்மைகள் விளைந்திருந்தாலும் அணு ஒப்பந்தம் முதல் பல விவகாரங்களில் அமெரிக்கா போன்ற வளர்ந்த நாடுகள் தங்களுக்குச் சாதகமாக விதிக்கும் பொருளாதார ஒப்பந்தங்களில் மறுகேள்வியின்றி கையொப்பம் இடுவதாகவே கடந்த கால இந்திய அரசுகள் செயல்பட்டிருக்கின்றன.

தன்மானமும் தன்னிறைவும் கொண்ட நாடாக நாம் மாற வேண்டும் என்றால் நம்முடைய குறைந்தபட்ச நலன்களையாவது கேட்டுப் பெறவேண்டியவர்களாக நாம் இருக்கிறோம். எனவே, நமது அயலுறவுக் கொள்கைகளை முதலில் பரிசீலிக்க வேண்டும்.

 நாட்டின் நிதி நிலை மோசமாக உள்ளது. அதிலும் கடந்த ஐந்து ஆண்டுகளாக இந்தியப் பொருளாதாரம் தடுமாறியதைப் போல எப்போதுமே தடுமாறியது இல்லை.

உள்நாட்டு உற்பத்தி தொடர்ந்து சரிந்து வருகிறது. விலைவாசி விண்ணளவு உயர்ந்துள்ளது. ஏழைக்கும் பணக்காரருக்குமான இடைவெளி நாளுக்கு நாள் அதிகரித்து வருகிறது.

புதிய அரசு இதை எல்லாம் மேஜிக் போல் உடனே சீராக்க முடியாது என்றாலும் மக்கள் மைய பொருளாதாரம் என்ற கருத்தை மனதில் வைத்து செயல்பட்டால் நீண்ட கால அளவிலாவது இந்த மாற்றங்கள் நிகழும்.

* விவசாயம் கபளீகரம் செய்யப்பட்டிருக்கிறது. தொழில்துறைக்குக் கொடுக்கும் முக்கியத்துவத்தில் பாதிகூட விவசாயத்துக்குத் தரப்படுவதில்லை என்ற குற்றச்சாட்டு தொடர்ந்து முன்வைக்கப்படுகிறது. நாம் தொழில்துறையில் எவ்வளவு வளர்ந்திருந்தாலும் இன்னமும் விவசாய நாடுதான். விவசாய மைய பொருளாதார நடவடிக்கைகளே நமக்கு எப்போதும் தேவை.

விளைபொருட்களுக்கு பொதுவான விலை நிர்ணயம் முதல் விவசாய சந்தையில் கார்ப்பரேட்டுகளின் அதீதமான தலையீடு, பூச்சிகொல்லி, உரக் கம்பெனிகளின் அடாவடித்தனம் வரை விவசாயத்துறையில் அதிரடி மாற்றங்கள் செய்ய வேண்டியது உள்ளது. விவசாயத்திலிருந்து மக்கள் வெளியேறுவது நிச்சயம் நமக்கு நல்லதல்ல. இதனை அரசு உடனடியாகத் தடுத்து நிறுத்த ஆவன செய்ய வேண்டும்.