சர்க்கஸ் அழகியைக் காதலித்து மயங்கும் இளைஞனின் கதையே ‘மெஹந்தி சர்க்கஸ்’.ஏற்றத்தாழ்வு, சாதிவெறி என காதல் கதைகள் வந்து கனமேற்றும் நேரத்தில் காவியமாக சர்க்கஸ் பின்னணியில் காதல் சொல்லியிருக்கிறார்கள்.

எல்லாக் கற்பனைகளுக்கும் அப்பாற்பட்ட அற்புதங்களும், எந்தக் கணிதத்துக்குள்ளும் அடங்காத மனக்கணக்காக காதலை இன்னிசையோடும், இளையராஜாவை மீட்டும் நினைவுகளோடும் சொல்லிய வகையில் புதிதாய் மிளிர்கிறார் அறிமுக இயக்குநர் சரவண ராஜேந்திரன்.

காதலுக்கு என்றும் திவ்யமான பக்கங்கள் உண்டு என்பதைத் தெளிவுபடுத்திய விதத்தில் படமும் விசேஷ கவனம் பெறுகிறது.திடீரென சர்க்கஸ் கம்பெனி அந்த ஊரில் வந்து இறங்கிவிட, ஊரே விழித்துக்கொள்கிறது.

அதிலும் உயிரைப் பணயம் வைத்து கத்தி விடும் நிகழ்ச்சி இன்னும் கவனம் பெறுகிறது. சர்க்கஸ் உரிமையாளரின் மகள் ஸ்வேதா திரிபாதி பயப்படாமல் நிற்க, அவர் அழகில் மனம் தருகிறார் மாதம்பட்டி ரங்கராஜ். இருவருக்குமான காதல் மலர, ரங்கராஜின் அப்பா மாரிமுத்து தடைபோட, ஜோடிக் கிளிகளாகப் பறந்துவிடுகிறார்கள்.