நவீனமாக வடிவமைக்கப்பட்டிருக்கும் இந்த டிரோன்ஸ் துபாயில் இருந்து, நகரின் அனைத்து இடங்களுக்கும் செல்லும் வகையில் இயக்கப்படும். இயற்கைச் சீற்றங்களிலும் பயணம் செய்ய முடியும். அடுத்த ஆண்டு ஏப்ரல் மாதம் இது செயல்பாட்டுக்கு வர இருக்கிறது.

அடிக்கடி எமிரேட்ஸ் விமானத்தில் பயணம் மேற்கொள்ளும் சிறப்பு உறுப்பினர் அட்டை உள்ளவர்களுக்கு இதில் பயணிக்க முன்னுரிமை அளிக்கப்படும்...”

எமிரேட்ஸ், ஏப்ரல் ஃபூல் செய்திருக்கிறதா அல்லது சீரியஸாகவே சொல்கிறதா என்று இந்தக் கட்டுரையை எழுதும் நேரம் வரை உறுதியாகவில்லை.ஆனால், பைலட் இல்லாத பயணிகள் விமானம் சாத்தியம்தான்.‘ஆட்டோ பைலட்’ என்கிற முறை ஏற்கனவே நடைமுறையில் இருக்கிறது.

Ehang 184 flying taxis என்று பெயரிடப்பட்டிருக்கும் இந்த டிரோன்ஸை பல நூறு முறை பரிசோதித்து, இந்த திட்டம் வேலைக்கு ஆகும் என்கிற நூறு சதவிகித நம்பிக்கைக்கு வந்திருக்கிறார்கள். இதுவரையில் தோராயமாகத் தாங்கள் ஆயிரம் ஏர்டாக்ஸிகளை தயாரித்து வைத்திருப்பதாகவும் சொல்கிறார்கள்.

மூன்று ஆண்டுகளுக்கு ஒரு முறை இப்படியொரு தானியங்கி டாக்ஸியை தாங்கள் செய்து கொண்டிருப்பதாகச் சொல்லி, அடிப்படை மாடலை அமெரிக்காவின் லாஸ்வேகாஸ் நகரில் பறக்கவிட்டு காண்பித்தார்கள். இப்போது துபாய் நகரிலும் சோதனையை மேற்கொள்ள தயாராகி வருகிறார்கள். எமிரேட்ஸ் நிறுவனம், அனேகமாக இவர்களிடம் ஒப்பந்தம் ஏதேனும் கையெழுத்திட்டிருக்கலாம்.

எனினும் இவை இப்போதைக்கு மிகவும் குறுகிய தூரம் வரைதான் செல்லும். அதாவது நகரின் ஒரு பகுதியில் இருந்து வேறொரு பகுதிக்கு செல்லலாம். அதிகபட்சமாக 25 நிமிடங்கள் பயணிக்கக்கூடிய அளவுக்குதான் பேட்டரி ஆற்றல் கொண்டிருக்கிறது.சென்னை டூ செங்கல்பட்டு கூட போக முடியாது.

ஆனால், நெரிசல் மிகுந்த பாரிமுனையில் இருந்து மீனம்பாக்கம் விமான நிலையத்துக்கு ஒரு சில நிமிடங்களில் வானில் ஜிவ்வென்று பறந்து வந்துவிடலாம். இப்போதைக்கு 225 கிலோ எடையை தாங்கக்கூடிய அளவுக்குதான் செய்திருக்கிறார்கள் என்பதால் அதிகபட்சம் இருவர்தான் பயணிக்க முடியும்.