என் இனிய இயந்திரா...

Internet of Things A to Z

டிஜிட்டல் டிரான்ஸாக்‌ஷன் செய்யச் சொல்லி பிரதமர் ஒரு பக்கம் மக்களை அழைக்கிறார். இன்னொரு பக்கத்தில் ‘பணம் செலுத்த ஆன்லைன்ல லாகின் செய்யறப்ப பக்குனு இருக்கு. யாராவது பாஸ்வேர்ட் திருடி அக்கவுண்ட்லேந்து பணத்தை திருடிட்டா..? போன் தொலைஞ்சு போச்சுன்னா..? சர்வீஸ் சார்ஜ் அது இதுன்னு கூடுதலா பணத்தை வேற டிஜிட்டல் டிரான்ஸாக்‌ஷன்ல எடுத்துக்கறாங்க...’ என மக்கள் அச்சப்படுகிறார்கள்.

இந்த சூழலில்தான் வருங்காலமே ‘இன்டர்நெட் ஆஃப் திங்ஸ்’ (Internet of Things) என்கிற தொழில்நுட்பத்தின் கையில்தான் இருக்கிறது என நிபுணர்கள் அறிவிக்கிறார்கள். அது என்ன இன்டர்நெட் ஆஃப் திங்ஸ்? கம்ப்யூட்டரில் டேட்டாக்களைச் சேகரித்து நமக்கு வேண்டியபோது அதை எடுத்து பயன்படுத்துகிறோம். இதுதான் இப்போதைய வழக்கம். இதுவேதான் மாறவும் போகிறது.

யெஸ். மெஷின்களே இன்டர்நெட்டில் இருந்து இனி தானாகவே டேட்டாக்களை சேமித்துக் கொள்ளும். மெஷினும் மெஷினும் பேசிக் கொள்ளும். முத்தமிட்டு காதலிக்கத் தொடங்குமா, டேட்டிங் செல்லுமா என்று தெரியவில்லை. ஆனால், தங்களுக்கிடையில் தகவல்களை, ரகசியங்களை பரிமாறிக் கொள்ளும். இதற்காகவே பயோசிப் டிரான்ஸ்பாண்டர்கள், சென்சார்கள் அனைத்து மெஷின்களிலும் பொருத்தப்படும். இப்படி சீவி சிங்காரிக்கப்பட்ட மெஷின்கள் சார்ந்த நெட்வொர்க்ஸ்தான் ‘இன்டர்நெட் ஆஃப் திங்ஸ்’.

கம்ப்யூட்டர் மாதிரி  நம்ம வீட்டு வாசலில் இருக்கும் வேப்ப மரம் முதல், அமெரிக்க அதிபரான டிரம்ப் வீட்டு நாய்க்குட்டி வரை சகலமும் ‘நெட்’டில் இணைக்கப்படும். ஆண்டிப்பட்டியிலிருந்து ஸ்விட்சை தட்டினால் அமெரிக்காவில் பல்பு எரியும். கண்ணை சிமிட்டினால் வீட்டிலுள்ள ஃபேன் சுற்றும். உலகிலுள்ள எந்தப் பொருளையும், எங்கிருந்து வேண்டுமானாலும் யாரோ ஒருவரால் இயக்கவும் கட்டுப்படுத்தவும் முடியும்.

ஆதார் எண் போல ஒவ்வொரு பொருளுக்கும் தனி அடையாளம் இருக்கும். காதை தடவிப் பார்க்காதீர்கள். பூ சுற்றவில்லை. இதுவரை 600 கோடி கேட்ஜெட்ஸ் இப்படி இணைக்கப்பட்டிருக்கின்றன. இந்த இணைப்பின் எண்ணிக்கை இன்னும் மூன்றே ஆண்டுகளில், அதாவது 2020ல், 3000 கோடியாக அதிகரித்திருக்கும்.

இதை மனதில் வைத்தே பெரும் நிறுவனங்கள் அனைத்தும் கேட்ஜெட்ஸை உருவாக்கத் தொடங்கியிருக்கின்றன. அஸ்குபுஸ்கு. சிந்திக்கும் ஆற்றல் மனிதனிடம்தானே இருக்கின்றன என அசால்ட்டாக இருக்காதீர்கள். கேட்ஜெட்ஸில் செயற்கை அறிவை செலுத்த ஆரம்பித்திருக்கிறார்கள்! இந்தத் தொழில்நுட்பத்தைப் பயன்படுத்தி ஐசியூவில் இருக்கின்ற  ஒருவருக்குத் தேவையான உதவியையும் செய்ய முடியும். அவரது மூச்சையும் நிறுத்த  முடியும். ஸ்மார்ட் போன், ஸ்மார்ட் வாட்ச் மாதிரி ஸ்மார்ட் காண்டமும் விரைவில் புழக்கத்துக்கு வந்துவிடும். சொல்வதற்கில்லை, மெஷினே மனைவி அல்லது கணவனாகவும்
மாறலாம்!