கோடம்பாக்கம் வந்திருக்கும் புது கவிஞர்!

கோடம்பாக்கத்தின் புது வரவான பாடலாசிரியர் பா.இனியவன், தனிப்பாடலாக ‘என்னோட ஆளு’ மூலம் ஹிட் ஆகியிருக்கிறார்.“விழுப்புரம் மாவட்டம் திருக்கோவிலூரையடுத்த மணம்பூண்டி என் சொந்த ஊர். அம்மா ராணி. அப்பா பாலகிருஷ்ணன் விவசாயக் குடும்பத்தில் பிறந்தவர்.

எப்போதும் எங்கள் வீட்டில் ஏதோவொரு பாடல் ஒலித்துக்கொண்டே இருக்கும். பாடலின் அர்த்தம் பெரிய அளவில் புரியாவிட்டாலும் அவற்றைக் கேட்டுக்கொண்டும் பாடிக்கொண்டுமே வளர்ந்தேன்.  வாழ்வியல் கவிஞன் வாலி மற்றும் மக்கள் கவிஞன் நா.முத்துக்குமார் ஆகியோர் எனக்குப் பிடித்த பாடலாசிரியர்கள்.

‘காதல் திருமணம்’ படத்தின் இயக்குநர் பிரதீப் சதாசிவம்தான் என்னை முதலில் பாட்டெழுத அழைத்தார். பின்பு ஏதோ சில காரணங்களால் படம் சற்று தாமதமாக... அதற்குள்  நிறைய வாய்ப்புகள். இப்போது ‘வேல் கம்பு’, ‘பசுபதிபாளையம்’, ‘மடையன்’, ‘கோபம் கொள்ளும் நேரம்’, ‘கணேசாபுரம்’  மற்றும் பெயர் சூட்டப் பெறாத மேலும் சில படங்கள் உள்பட பத்துக்கும் மேற்பட்ட படங்களில் பாடல்கள் எழுதியுள்ளேன்.