பெண்ணின் மனதைதொட்டு கொட்டாச்சி

டைட்டில்ஸ் டாக்-121

பெண்ணின் மனசைத் தொடுவது அவ்வளவு சுலபம் கிடையாது. பெண்ணின் மனதைத் தொடுவதென்றால் காதல் என்று மட்டுமே பலரும் கருதுகிறார்கள். அப்படியல்ல. எல்லோருமே குறைந்தபட்சம் அவரவர் அம்மாவின் மனதைத் தொட்டவர்கள் மட்டுமல்ல. மனதிலும் வாழ்பவர்கள்.எனக்குத் தெரிந்து நான் மூன்று பெண்களின் மனதைத் தொட்டிருப்பதாகக் கருதுகிறேன்.

எங்கள் குடும்பத்தில் ஆண் வாரிசு என்றால் அது நான் மட்டுமே. மூன்று சகோதரிகள். நான்காவது குழந்தை ஆணாகப் பிறந்ததில், என் அம்மாவுக்கு கூடுதல் சந்தோஷம். அவருக்கு சினிமா ஆர்வம் அதிகம். எந்தவொரு சினிமாவையும் அவர் தவறவிட்டதில்லை. அதனால் எனக்கும் இயல்பாகவே சினிமா ஆர்வம் ஒட்டிக் கொண்டது.

என்னுடைய ஊர் பொள்ளாச்சி பக்கத்துல உள்ள ஜமீன் ஊத்துக்குளி. சினிமாவில் ஜமீன் அரண்மனையை காண்பிக்கணும்னா எங்க ஊர்லதான் படப்பிடிப்பு நடத்துவாங்க. ‘சின்னத்தம்பி’, ‘எஜமான்’ என்று ஏராளமான படங்களில் எங்க அரண்மனை இடம் பிடிச்சிருக்கு.

எங்க ஊர்லே படப்பிடிப்பு நடக்கும்போது வேடிக்கை பார்ப்பது எங்கள் வாடிக்கை. அந்த கும்பலில்  நான்தான் முதல் ஆளாக இருப்பேன். அப்பா, நான் சின்னப்பிள்ளையாக இருக்கும்போதே தவறிவிட்டார். அம்மாதான் அக்காக்களையும் என்னையும் வளர்த்து ஆளாக்கியவர்.

எனக்கு புத்தி தெரிஞ்ச சமயத்தில் என்னை திருப்பூர்லே வேலைக்குச் சேர்த்துவிட்டார். சில வருடங்களில் அம்மாவும் தவறிட்டார். அம்மாவின் ஏக்கத்தில் இருந்த எனக்கு ‘சீமான்‘ படம் அருமருந்தாக இருந்தது. அந்தப் படத்துலே மனோரமா ஆச்சி கையில் ஒரு குழந்தை இடம்பிடித்திருக்கும். ஆச்சி பக்கத்தில் என்னுடைய அக்கா, எங்க ஊர்க்காரப் பெண்களுடன் சேர்ந்து என்னுடைய அம்மாவும் நின்றுகொண்டிருந்தார்.