முப்பரிமாணம்

துரோகம் செய்யும் காதலி!

சின்ன வயது முதல் பழகிய தோழி, காதலியாக வந்தபிறகு செய்யும் துரோகம்தான் கதை. காதலர்களாக சாந்தனுவும் சிருஷ்டி டாங்கேவும் வாழ்ந்திருக்கிறார்கள்.இதுவரை இருந்த சாக்லெட் பாய் இமேஜை உடைத்து, ஆக்‌ஷன் ஹீரோவாக உருமாறியிருக்கிறார் சாந்தனு.

முதல்பாதியில் காதலும் காதல் சார்ந்தும் பூப்போல வலம் வருகிறவர், இரண்டாம் பாதியில் மிரள வைக்கிறார். எப்படி இப்படி மாறினார் அப்படீனு கேட்கும்படியாக இருக்கிறது. சிருஷ்டியின் நடிப்பு சிருஷ்டி. அப்பாவி போல உலவிவிட்டு, அவர் எடுக்கும் துரோக விஸ்வரூபம் ரசிக்க வைக்கிறது.

திரை நட்சத்திரமாக நடித்துள்ள ஸ்கந்தா அசோக், அலட்டிக் கொள்ளாமல் செய்திருக்கிறார். உச்சகட்ட காட்சியில், சிருஷ்டியின் கன்னத்தில் அவர் பளார் விடும்போது, தியேட்டரில் கைதட்டல் சத்தம் கேட்கிறது. ரவி பிரகாஷ், அப்புக்குட்டி, தம்பி ராமையா,லொள்ளு சபா சாமிநாதன் ஆகியோர் கொடுத்த வேலையை குறையில்லாமல் செய்திருக்கிறார்கள். ராசாமதியின் படகுவீட்டுக் காட்சிகள் லயிக்க வைக்கின்றன.

நா.முத்துக்குமார், கபிலன், யுகபாரதி பாடல்களுக்கு இசையமைத்திருக்கிறார் ஜி.வி.பிரகாஷ்குமார். புத்தாண்டை வரவேற்கும் ஒரு பாடல் காட்சியில், கோடம்பாக்கத்தின் பாதி நட்சத்திரங்கள் பங்கேற்றிருப்பது சிறப்பு. பாலாவின் உதவி இயக்குநராக இருந்து சினிமா கற்றுக்கொண்ட அனுபவத்தில், காதல் நிறைந்த திரில்லர் கதையை  அழகாக இயக்கியிருக்கிறார் அதிரூபன்.