ஆங்கிலப்படங்களை தழுவி எடுக்கப்பட்ட நூறு தமிழ்ப் படங்களின் பட்டியல் இங்கே தரப்பட்டுள்ளன. இவை முழுமையானவையோ அல்லது நிறைவானவையோ அல்ல. விடுப்பட்டவை ஏராளம். என்றாலும் இப்படியொரு பட்டியலை வெளியிட காரணமிருக்கிறது. அந்தக் காரணம், நிச்சயம் சம்மந்தப்பட்ட தமிழ்ப் படத்தின் இயக்குநர் அல்லது கதாசிரியரை புண்படுத்தும் நோக்கம் கொண்டதல்ல. இதை அழுத்தமாக பதிவு செய்ய விரும்புகிறோம்.

ஏனெனில் எந்தவொரு படமும், பிற மொழிப் படங்கள் அல்லது நாவல்கள் அல்லது நிகழ்வுகள் அல்லது பத்திரிகை செய்திகளின் பாதிப்பிலிருந்தே உருவாகின்றன, திரைக்கதை வடிவம் எடுக்கின்றன. உலகில் உள்ள அனைத்து மொழித் திரைப்படங்களிலும் இதுதான் நிலை. அதற்காக இந்தத் தழுவல் அல்லது காப்பியை சரி என்று நியாயப்படுத்துவதாக எடுத்துக் கொள்ள வேண்டாம். பிரபஞ்சம் தழுவிய விதி, இப்படி இருக்கிறது என்பதைதான் சொல்ல வருகிறோம்.

மற்றபடி உதவி இயக்குநர்கள் அல்லது சினிமாவில் கதை எழுத விருப்பமுள்ளவர்கள் ஆகியோருக்கு இந்தப் பட்டியல் பயன்படலாம். சம்பந்தப்பட்ட ஆங்கிலப்படங்களையும், தமிழ்ப் படங்களையும் ஒருசேர பார்த்து சில விஷயங்களை கற்றுக் கொள்ளலாம். ஆங்கிலப் படங்களின் காட்சிகளை எப்படி தமிழ்ச் சூழலுக்கு ஏற்ப மாற்றலாம் என அறிந்துக் கொள்ளலாம்.

இந்தப் பட்டியலில் உள்ள சில தமிழ்ப் படங்கள் குறிப்பிட்ட ஆங்கிலப்படத்தின் லைனை மட்டும் எடுத்துக் கொண்டு, அதை அப்படியே தமிழ்ச் சூழலுக்கு ஏற்ப மாற்றி அமைக்கப்பட்டவை. சில, காட்சிக்கு காட்சி அப்படியே சுடப்பட்டவை. இன்னும் சில, குறிப்பிட்ட கதாபாத்திரத்தின் தன்மையை மட்டும் எடுத்துக் கொண்டவை. ஒன்றிரண்டு படங்கள், கதை சொல்லும் முறையை, திரைக் கதையின் போக்கை, மட்டும் களவாடியவை. இதையெல்லாம் ஒரு நடைமுறை பயிற்சியாக கற்கத்தான் இந்தப் பட்டியல்.

இறுதியாக ஒன்று. இங்கே குறிப்பிடப்பட்டுள்ள் சில தமிழ்ப் படங்கள் நேரடியாக ஆங்கிலப் படத்திலிருந்து கதைக் கருவை எடுத்துக் கொண்டவை அல்ல. குறிப்பிட்ட ஆங்கிலப் படத்தின் பாதிப்பில் உருவான பிற இந்திய மொழி படங்களில் இருந்து ரீமேக் அல்லது காப்பி அடிக்கப்பட்டவை. என்றாலும் அவற்றையும் ஆங்கிலப் படத்தில் இருந்து உருவாக்கப்பட்டவையாகவே பட்டியலில் இணைத்திருக்கிறோம்.