“பெண்கள் விளையாடி என்ன சாதிக்கப் போகிறார்கள்..?” இந்த வார்த்தைகள், பெரிய கனவுகளைக் காண முயற்சிக்கும் எண்ணற்ற இளம் பெண்களின் இறக்கைகளை முறிப்பதற்குப் போதுமான அளவு கூர்மை படைத்தவை. 

சென்ற  வாரம் அமெரிக்காவின் லிவர்பூலில், 2025 உலக குத்துச்சண்டை சாம்பியன் பட்டத்திற்கான போட்டியின் இறுதி நாளில், 48 கிலோ பிரிவில், ஒலிம்பிக் வெண்கலப் பதக்கம் வென்ற கஜகஸ்தானின் நசிம் கைசைபேயை தோற்கடித்து தங்கப் பதக்கம் வென்றார் 24 வயதான மீனாட்சி ஹூடா. 

குத்துச்சண்டை பயிற்சியில் நான் தற்செயலாகத்தான் சேர்ந்தேன். எங்க ஊரில் ஸ்டேடியம் உண்டு. அங்கு குத்துச்சண்டைக்கு பயிற்சி நடக்கும். அதைப் பார்க்க செல்வேன். அந்த விளையாட்டு எனக்குப் பிடித்திருந்தது. 

நானும் குத்துச்சண்டை பயிற்சியில் சேர பெற்றோர்களிடம் கேட்ட போது அவர்களும் சம்மதித்தார்கள். ஆனால், கிராம மக்களின் மனநிலையை மாற்றுவது கடினமாக இருந்தது. தொடக்கத்திலேயே, ‘பெண்கள் விளையாடி என்ன சாதிக்கப் போகிறார்கள். பதக்கங்கள் கிடைக்க நான்கு, ஐந்து ஆண்டுகள் ஆகும். 

நல்லா படிக்கச் சொல்லுங்கள். பெண்களுக்கு ஏற்ற விளையாட்டு இது இல்லை’ என்று அக்கம் பக்கத்தினர் சொல்லத் தொடங்கினர். ஆனால், நான் பயிற்சி எடுக்க வேண்டும் என்று உறுதியாக இருந்தேன். 

அதற்கு முக்கிய காரணம் என் சீனியர்கள் குத்துச்சண்டை போட்டியில் வெற்றிப் பெற்று பதக்கங்கள் வென்று அரசு வேலைகளில் அமர்ந்த போதுதான் எங்க ஊர் மக்களின் மனநிலை மாறியது. இப்போது எங்க ஊரில் சுமார் 10க்கும் மேற்பட்ட பெண்கள்  குத்துச் சண்டை பயிற்சி பெற்று வருகிறார்கள் என்றால் பார்த்துக் கொள்ளுங்கள்.

எந்த விளையாட்டாக இருந்தாலும் அதில் ஒழுங்கினை கடைப்பிடிக்க வேண்டும். குறிப்பாக நினைக்கும் நேரத்தில் விரும்பிய இடத்திற்கு செல்ல முடியாது. உணவு, ஓய்வு உட்பட அனைத்தையும் கவனமாக திட்டமிட வேண்டும். உடல்  நலம் கெட்டுவிட்டால், பயிற்சி செய்ய முடியாது. விளையாட்டுப் போட்டியில் பங்கு பெற முடியாமல் போகும். 

இப்படி பல விஷயங்களை நாம் கருத்தில் கொண்டால்தான் விளையாட்டில் ஜெயிக்க முடியும்’’ என்று கூறும் மீனாட்சி, பெண்கள் விளையாடி என்ன சாதிக்கப்  போகிறார்கள் என்று கேலி பேசியவர்களுக்கு உலக சாம்பியன் போட்டியில் தங்கப் பதக்கம் பெற்று தக்க பதிலை கொடுத்துள்ளார்.