தமிழக அரசின் எரிசக்தி துறை முதன்மைச் செயலாளராக பணியாற்றி வந்த பீலா வெங்கடேசன் உடல்நலக் குறைவு காரணமாக சென்னையில் காலமானார்.

கொரோனா பெருந்தொற்றுக் காலத்தை எப்படி நம்மால் மறக்க முடியாதோ, அதேபோல்  கொரோனா பேரிடர் காலத்தில், சுகாதாரத்துறை செயலாளர் பதவிக்கு வந்து, முன்களப் பணியாளராய் ஊடகங்கள் முன் தோன்றி, பொது மக்களுக்கு கொரோனா பெருந்தொற்று தகவல்களை  பீலா வெங்கடேசன் தெரிவித்ததை அத்தனை எளிதில் யாராலும் மறக்க முடியாது.

தூத்துக்குடி மாவட்டம், வாழையடி கிராமத்தைச் சேர்ந்தவர் ஐஏஎஸ் அதிகாரி பீலா வெங்கடேசன். இவரின் தந்தை எல்.என். வெங்கடேசன், ஓய்வுபெற்ற ஐபிஎஸ் அதிகாரி மற்றும் காவல்துறை இயக்குநர். 

ஒடிசாவைச் சேர்ந்த ஐபிஎஸ் அதிகாரியான ராஜேஷ் தாஸ் என்பவரை காதலித்து கரம் பற்றிய பீலா வெங்கடேசன, தன் பெயருக்கு பின் கணவரின் பெயரை இணைத்து பீலா ராஜேஷ் என போட ஆரம்பித்தார். 

இவர்களுக்கு இரண்டு மகள்கள் உள்ளனர்.கடந்த சில ஆண்டுகளுக்கு முன் ஐபிஎஸ் அதிகாரி ராஜேஷ் தாஸ் பாலியல் சர்ச்சையில் சிக்க, அவரைப் பிரிந்து வாழ்ந்த பீலா ராஜேஷ், தனது பெயருக்குப் பின்னால் இருந்த ராஜேஷ் என்ற பெயரை நீக்கிவிட்டு, பீலா வெங்கடேசன் என தனது தந்தையின் பெயரை போட ஆரம்பித்ததுடன், ஐபிஎஸ் அதிகாரி ராஜேஸ் தாஸ் மீது விவாகரத்து வழக்கும் தொடர்ந்தார்.

மக்கள் முழுக்க முழுக்க பீதியிலும் குழப்பத்திலும் இருந்த நிலையில், கொரோனா பரவ ஆரம்பித்த ஒவ்வொரு நாளும் செய்தியாளர்களைச் சந்தித்தவர், மாநிலத்தில் கொரோனா பரவல் குறித்த நிலையை விரிவாக பொதுமக்களுக்கு விளக்கினார்.

 தமிழ்நாடு அரசு எடுத்து வரும் முன் நடவடிக்கைகள் தொடர்பான தகவல்களை தொடர்ச்சியாய் பகிர்ந்ததுடன், தெளிவான விளக்கங்களையும் கொடுத்து வந்தார். இது மக்களுக்கு அச்சத்தைப் போக்கி, நம்பிக்கையை கொடுத்து வந்தது. செய்தியாளர்களை தினசரி மாலைசந்தித்து விளக்கம் கொடுத்த சுகாதாரத்துறை செயலாளர் பீலா வெங்கடேசனின் செயல் அந்தக் காலக்கட்டத்தில் பெரிதாகப் பாராட்டப்பட்டது.

இதனால் தமிழகம் அறிந்த நபராய் கொரோனா காலகட்டத்தில் பீலா வெங்கடேசன் இருந்து வந்தார். தினமும் மாலையில் ஊடகத்தை சந்திக்க வரும்போது, நேர்த்தியுடன், அவர் உடுத்தி வரும் சேலைகளும் பொதுமக்கள் கவனம் ஈர்த்தன. இது சமூக வலைத்தளங்களில் அப்போதைய பேசு பொருளானது.

தமிழ்நாட்டில் அப்போது வைரஸ் பாதிப்பு உச்சம் தொட்டு 40,000 ஐ தாண்ட, பீலா வெங்கடேசன் சுகாதாரத் துறை செயலாளர் பதவியில் இருந்து மாற்றப்பட்டு வணிக வரி மற்றும் பதிவுத் துறைச் செயலாளராய் நியமிக்கப்பட்டார். 2021 ஆட்சி மாற்றத்திலும், பல்வேறு முக்கிய பதவிகளை வகித்தார்.