சிங்கப்பூர் முன்னாள் பிரதமர் லீ குவான்யூ மரணம் குறித்து நடிகர் விவேக் வருந்தித் தந்த இரங்கற்பா...



சிங்கப்பூரின் சிங்கம் இன்று
அடங்கி விட்டதே!
லஞ்சம் தொடா தேகம் ஒன்று
முடங்கி விட்டதே!

உழைப்பு என்னும் பெருவாழ்வு
உறங்கி விட்டதே - உங்கள்
ஊர்க் கொடிகள் பாதியாக
இறங்கி விட்டதே!

நேரு மாமா நண்பனாக
வாழ்ந்த கொற்றவா! - உன்னிடம்
ஊருக்குழைக்கும் உன்னதத்தை
நாங்கள் கற்கவா?

உலகப்பந்தில் சிங்கப்பூரை
புள்ளி என்பதா? - அதை
உலகனைத்தையும் திரும்பிப் பார்க்க
வைத்த மன்னவா!

கொஞ்சம்கூட வளங்கள் அற்ற
தீபகற்பம்தான் - அதை நீ
லஞ்சம் இன்றி மாற்றியதால்
வாழும் சொர்க்கம்தான்!

உண்மை உழைப்பு ஒழுக்கம்
என்று நீதி நாட்டினாய் - எங்கள்
அண்மையிலே வாழ்ந்து, முடிந்து
பாதை காட்டினாய்!

‘உலகத் தலைவர் இரங்கற் செய்தி’
ஒன்றும் புதிதல்ல! - எங்கள்
ஊரில், தெருவில் ‘இரங்கற் தட்டி’!!
இது சாதா நிகழ்வல்ல!

எப்போதும் தேசநலன்
உந்தன் சிந்தையே! - இனி
என்று காண்பர் மீண்டும் உன்னை
பாசத் தந்தையே?

மண் சிறக்க; மழை பெருக்க
மரம் வளர்த்தவா! - எங்கள்
கண் பனிக்க கைகூப்பி
சிரம் தாழ்த்தவா..!

எங்கள் கண்ணீர் கடல் கலந்து
இன்னும் கரிக்கட்டும்
எதிர்காலம் உந்தன் பெயரைப்
பொன்னில் பொறிக்கட்டும்!