மதுவுக்கு அடிமையாவதைப் போல இன்றைய சமுதாயம் பரோட்டாவிற்கு அடிமையாகி விட்டது. ஆரோக்கியக் கேடான பரோட்டாவை எதிர்க்கும் போராட்டம் போற்றத்தக்கது!

‘பாண்டிய நாடு’ திரைப்பட ஜோடி விஷால்-லட்சுமி மேனன் அட்டைப்படம், படு பாந்தம். விஷால் அப்பாவாக பாசத்திற்குரிய பாரதிராஜாவா? அந்தக் காம்பினேஷனைக் காண இப்போதே ஆவல் அள்ளுகிறதே!

‘குடிதண்ணீரை அரசு விற்பது சரியல்ல’ என்று சமூக ஆர்வலர்கள் வாதம் பண்ணியிருந்ததெல்லாம் ஓகேதான். ஆனால், அரசு ‘தண்ணி’யையே ஊத்திக் கொடுக்கும்போது, தண்ணீர் விற்பது பாவமா? விடுங்க பாஸ்!

‘சைமா’ விழாவை சுவையான ‘கைமா’ பண்ணி கொடுத்ததுக்கு நன்றி! விழாவை நேரில் பார்த்த மாதிரியே உங்க கவரேஜ் செம கிளுகிளுப்பு. ஆனால், அங்கே ராணா, த்ரிஷா பக்கத்துல உட்கார்ந்தா உமக்கு ஏனய்யா... கடுகடுக்குது?

‘மனித உயிருக்கே மதிப்பில்லாத உலகில்’ கிளியைக் காப்பாற்ற உயிர்விட்ட அருண்குமாரின் மறைவு கண்களைக் கரைத்தது. அவர் தந்தையின் வார்த்தைகளில் புத்திர சோகத்தை அப்படியே தரிசித்தோம்!

பூனை, அணில், உடும்பு என பல உயிர்களை தன் வருமானம் முழுவதும் செலவு செய்து காப்பாற்றி வரும் கும்பகோணம் சடகோபன் பற்றிப் படித்ததும் மனம் நெகிழ்ந்தது. இவர் போன்ற மனிதர் இருப்பதால்தான் நாட்டில் கொஞ்சமாவது மழை பொழிகிறது.

சமீரா ரெட்டியின் ஆடை சர்ச்சையை ஏற்படுத்தியது என்று சொல்லிவிட்டு, நீர் ஏன் மறுபடியும் அதே ஸ்டில்லைப் போட்டு சச்சரவை ஏற்படுத்துறீர்? ரசிக்கணும்னா ரசிச்சுட்டுப் போங்களேன்ய்யா. சர்ச்சையாவது, சாம்பார் வெங்காயமாவது!

லீனா மணிமேகலையின் நேர்காணல், ஈழப் பிரச்னையில் முக்கியமானதொரு சாட்சியம். ‘நசிந்து போன ஈழ மக்களின் வீடுகளில் சாமி படங்களை விட, இறந்தவர்களின் படங்கள்தான் அதிகம் இருக்கின்றன’ என்ற வரிகளைப் படித்தபோது கண்கள் குளமாகின.

இமான் அண்ணாச்சி, ‘கீரையும், தக்காளியும் விற்ற காமெடி அனுபவங்கள்’ அருமைண்ணே... அருமை!

பஞ்சு அருணாசலத்தின் பாடல் வரிகளான ‘வாழ்வே... மாயமா?’ பாடல், ‘காயத்ரி’ படம் வெளியானபோதே சூப்பர் ஹிட். மனுஷ்ய புத்திரனின் நெஞ்சில் நின்ற அந்தப் பாடல் எங்கள் நெஞ்சிலும் நீங்கா இடம் பிடித்துள்ளது.