கிராமங்களில் விவசாயம் அழிந்து வருவதை பொங்கல் சிறப்பிதழ் கவிதைகள் இரண்டும் ‘ஆணி அடித்தாற் போல’ உணர்த்தின. பாராட்டுக்கள்!

‘மனதை வருடும் மயிலாடி கற்சிலைகள்!’ கட்டுரை, தமிழ்நாட்டு சிற்பக் கலையின் மேன்மையை உலகறியச் சொல்லிவிட்டது. இன்றும் அவற்றைக் காப்பாற்றி வைத்திருக்கும் மயிலாடி கிராமத்தினருக்கு நாம் அனைவருமே கடமைப்பட்டுள்ளோம்!

சன் குடும்ப விருதுகள் வழங்கும் விழாவை லைவ் ரிலே போலத் தொகுத்தளித்து பரவசமூட்டி விட்டீர்கள். சரியான தேர்வும் நிறைவான நிகழ்ச்சியும் ‘சன் குடும்பம், என் குடும்பம்’ என எண்ண வைத்தது!

‘கட்டைக் கால்’ தவில் வித்துவான் மாரிமுத்துவின் புதிய முயற்சியையும் திறமையையும் பாராட்டி ‘குங்குமம்’ கட்டுரை வெளியிட்டிருப்பதே அவருக்கு ஒரு சிறப்பு அங்கீகாரம்தான். கிடைக்கப் போகும் அங்கீகாரங்களுக்கு இது தொடக்கம் எனலாமே!

‘வாழ்க்கையின் முதல் அன்னியமாதல் கண்ணாடி பார்ப்பதிலிருந்து தொடங்குகிறது’ என்ற வைர வரிகள் தத்ரூபமாகவும், யதார்த்தமாகவும் இருந்தது. மொத்தத்தில் பொங்கல் போனஸாக மனுஷ்ய புத்திரன் கடந்த இதழில் பின்னியெடுத்துவிட்டார்.- இராம.கண்ணன், திருநெல்வேலி.

அட்டையில் விக்ரம் ஸ்டில் ‘தில்’லாக ‘தூள்’ கிளம்புவது போன்று இருந்தது. நடிப்பில் ‘கிங்’காகவும் பலருக்கு ‘பிதாமக’னாகவும் இருக்கும் விக்ரம், ‘டேவிட்’டாக வரும் நாளை விரைவில் எதிர்பார்க்கிறோம்!

‘ச்சீய் பக்கங்கள்’ பகுதியில் ‘ரேப்’ பற்றிப் படிக்க திகிலாகவும், திகைப்பாகவும் இருந்தது. டெல்லி மருத்துவ மாணவியின் துயரமும் மனதுக்குள் நிழலாடியது.

சூப்பர் ஸ்டார் ரஜினி என்றுதான் எல்லோருக்கும் தெரியும். ஆனால், அவர் கொடை வள்ளலும் கூட என்று கலைஞானத்தின் வார்த்தைகள் ஊர்ஜிதம் செய்துவிட்டன. சூப்பர் ஸ்டார் ஆகும் முன்னமே அந்த மனிதருக்குள் இருந்த அந்த கம்பீரம்... பார்த்துக் கொண்டே இருக்கலாம் போலிருக்கிறது!

எல்லோருக்கும் சிறந்த ‘நக்கல்’ பட்டங்களை வழங்கிய ஆல்தோட்ட பூபதியை ‘நக்கல் நங்கூரம்’ என்ற பட்டத்தை நாம் வழங்கி சிறப்பிப்
போமாக!