‘‘மக்களுக்கு தாங்கும் சக்தி இப்ப அதிகமாகியிருக்குன்னு தலைவர் சொல்றாரே... ஏன்?’’
‘‘அவர் மீட்டிங்கை ஆரம்பம் முதல் இறுதி வரை இருந்து கேட்கறாங்களே... அதை வச்சு சொல்றார்!’’

என்னதான் டாஸ்மாக் கடையிலே வேலை பார்க்கறவரா இருந்தாலும், வீட்டுக்கு வந்தவங்களை ‘‘என்ன சாப்பிடுறீங்க... காபியா? டீயா?’’ன்னு கேட்பாரே தவிர, ‘‘விஸ்கியா... பிராந்தியா..?’’ன்னு கேட்க மாட்டார்.
- தத்துவத்தில் ‘பட்டையை’க் கிளப்புவோர் சங்கம்

‘‘எல்லா நாட்டு மன்னர்களையும் ஏன் ஒரே சமயத்தில் போருக்கு வரச் சொன்னீர் மன்னா..?’’
‘‘வயதாகிவிட்டது அல்லவா... ஒவ்வொருவர் துரத்தும்போதும் தனித்தனியாக ஓட முடிவதில்லை அமைச்சரே..!’’

‘‘போருக்கு நான் வாள், கேடயம், கவசம் எதையும் கொண்டு செல்லப் போவதில்லை...’’
‘‘ஏன் மன்னா..?’’
‘‘அவைகள் எல்லாம் இருந்தால் ‘அன் ஈசி’யாக இருக்கும்; ‘ரன் ஈசி’யாக இருக்காது..!’’

கீரைல போட்ட அதைக் கீரை வடைன்னு சொல்றோம், மசால்ல போட்டா அதை மசால் வடைன்னு சொல்றோம். ஆனா மெதுவா போடுற வடையை ‘மெதுவடை’ன்னு சொல்ல முடியுமா?
- கடையேறி வடை திருடுவோர் சங்கம்

‘‘நீங்க பத்து நிமிஷம் வெளியே இருங்க... பேஷன்ட்டை தனியா பரிசோதிக்கணும்...’’
‘‘அதுக்கு அவசியமில்லை டாக்டர்... அவரோட பர்ஸ் என்கிட்ட தான் இருக்கு..!’’

என்னதான் ஒரு தயாரிப்பாளர் பக்கா ‘மசாலா’வா படம் தயார் பண்ணினாலும், அது மட்டன் மசாலாவா, சிக்கன் மசாலாவா, மீன் மசாலாவான்னு சொல்ல முடியாது!
- மசாலா போட்டு குஜாலா சமைப்போர் சங்கம்.