வானத்து நிலவை பார்த்து ரசிக்காதவர்கள் யாரும் இருக்க முடியாது. நாம் வாழும் பூமிக்கு இருக்கும் ஒரே துணைக்கோளான நிலா, பூமியிலிருந்து 3 இலட்சத்து 84 ஆயிரம் கிலோ மீட்டர் தொலைவில் உள்ளது. 

இந்த நிலவை சுற்றி வர அமெரிக்க விண்வெளி வீரர்கள் தயாராகி வருகிறார்கள்.நிலவை ஆய்வு செய்யும் தனது ஆர்டெமிஸ் திட்டத்தின் ஒரு பகுதியாக, வரும் பிப்ரவரி 6ம் தேதி விண்வெளி வீரர்களை மீண்டும் நிலவுக்கு அனுப்ப நாசா திட்டமிட்டுள்ளது. புளோரிடாவின் கேப் கனாவெரலில் உள்ள கென்னடி விண்வெளி மையத்திலிருந்து இந்த விண்கலம் ஏவப்படும். 

கிரேக்க புராணங்களின்படி ‘ஆர்ட்டெமிஸ்’,  அப்பல்லோவின் இரட்டை சகோதரி மற்றும் நிலவின் கடவுள். இதை உணர்த்தவே இந்தப் பெயர்.  பனிக்கட்டி வடிவில் நீர் இருக்க வாய்ப்புள்ள நிலவின் தென் துருவத்தை இந்தியாவின் சந்திரயான்- 1 விண்கலம் முதல் முறையாகக் கண்டறிந்தது. 

இந்த இடத்தில் பல ஆய்வுகளைச் செய்ய நாசா திட்டமிட்டுள்ளது. தென் துருவத்தில் உள்ள ஆழமான பள்ளங்களில் பல கோடி ஆண்டுகளாக சூரிய வெளிச்சமே படாமல் உறைந்த நிலையில் தண்ணீர் இருக்கிறது. இந்த நீரை உருக்கி குடிநீராகப் பயன்படுத்தலாம்; இந்த நீரைப் பிரித்து ஆக்சிஜன் மற்றும் ராக்கெட் எரிபொருளுக்கான ஹைட்ரஜனைத் தயாரிக்கலாம். 

தென் துருவத்தின் சில உயரமான பகுதிகளில் எப்போதும் சூரிய ஒளி படும். இது விண்வெளி வீரர்களின் மின்சாரத் தேவைக்கு - சோலார் பவர் - மிகவும் பயனுள்ளதாக இருக்கும். 

ஓரியன் விண்கலம், வீரர்கள் தங்குவதற்கும் பயணிப்பதற்கும் வடிவமைக்கப்பட்ட நவீன விண்கலம். இது மிக அதிக வெப்பத்தைத் தாங்கும் வகையில் உருவாக்கப்பட்டுள்ளது. இந்த விண்கலம் நேரடியாக நிலவில் தரை இறங்காது. மாறாக, நிலவைச் சுற்றிச் சென்று பூமியின் ஈர்ப்பு விசை மற்றும் நிலவின் ஈர்ப்பு விசையைப் பயன்படுத்தி மீண்டும் பூமிக்குத் திரும்பும்.

நிலவின் மேற்பரப்பில் மனிதர்கள் தங்குவதற்காக ‘ஆர்ட்டெமிஸ் பேஸ் கேம்ப்’ நிலவின் தென் துருவத்தில் அமைக்கப்பட்டுள்ளது. ஒரே நேரத்தில் 4 விண்வெளி வீரர்கள் வரை தங்குவதற்கான வசதிகள் இதில் இருக்கும். 

இது கதிர்வீச்சு மற்றும் நிலவின் கடுமையான வெப்பநிலையிலிருந்து வீரர்களைப் பாதுகாக்கும். நிலவுக்குச் செல்லும் விண்வெளி வீரர்கள் நேரடியாக நிலவில் இறங்காமல், முதலில் கேட்வே நிலையத்திற்குச் செல்வார்கள். அங்கிருந்து ஒரு சிறிய விண்கலம் மூலம் நிலவின் மேற்பரப்பில் இறங்குவார்கள்.

நிலவில் இருக்கும் வீரர்களுக்கும் பூமிக்கும் இடையே தகவல்களைப் பரிமாறிக் கொள்ள தொடர்பு மையம் ஏற்படுத்தப்பட்டுள்ளது. இந்த பேஸ் கேம்ப் மற்றும் கேட்வே ஆகிய இரண்டும் வெற்றிகரமாகச் செயல்பட்டால், மனிதர்கள் நிலவில் பல வாரங்கள் அல்லது மாதங்கள் தங்கி ஆய்வு செய்ய முடியும். 

இது எதிர்காலத்தில் செவ்வாய் கிரகத்திற்கு மனிதர்களை அனுப்புவதற்கான ஒரு முக்கியப் பயிற்சியாக அமையும். நாசாவின் இந்த ‘ஆர்ட்டெமிஸ்’ திட்டத்தில் எலான் மஸ்க்கின் ‘SpaceX’ நிறுவனம் முக்கியமான ஒப்பந்தத்தைப் பெற்றுள்ளது!