ரியாலிட்டி ஷோவுக்கு அப்பாவை அனுப்பும் மகள்!

படத்துக்கு படம் துப்பாக்கி, கத்தி ஏந்தும் கிஷோர் கையில் கால்பந்து, மைக் சுழல்கிறது. ஹிப்பி தலை, கத்தரிக்கப்பட்ட மீசை என உருமாறி வந்துள்ளார். விரைவில் வெளியாகவுள்ள ‘மெல்லிசை’ படத்துக்காகத்தான் இந்த அதிரடி மாற்றம்.திரவ் இயக்கியுள்ளார். இவர் ரசிகர்களி டையே வரவேற்பு பெற்ற ‘வெப்பம் குளிர் மழை’ படத்தில் நாயகனாக நடித்தவர். இறுதிக்கட்ட வேலையில் மூழ்கி இருந்த திரவ்விடம் பேசினோம்.

இது உங்களுக்கு இரண்டாவது படமா?

இல்லை. ‘மெல்லிசை’ எனது முதல் படம். இந்தப் படத்தில் இரண்டு வித டைம் லைன் இருக்கிறது. அதற்காக சில காலம் காத்திருந்தோம். அப்போது ‘வெப்பம் குளிர் மழை’ செய்தோம். அந்தப் படத்தில் கதையின் நாயகனாக நடித்ததோடு மட்டுமல்லாமல், எடிட்டர், பாடல் என பல அவதாரம் இருந்துச்சு.இந்தப் படத்துக்கு இசையோடு தொடர்புடைய டைட்டில் தேவைப்பட்டுச்சு. கதையும் யதார்த்தமாக இருக்கும். கதை களத்துக்கு பொருத்தமாக இருந்ததால் இந்த டைட்டிலை முடிவு பண்ணினோம்.

அப்பா - மகள் கதையா?

அப்படியும் சொல்லலாம். அம்மா - மகன் கதை என்றும் சொல்லலாம். இது எளிமையான மனிதர்கள் பற்றிய கதை. சராசரி வாழ்க்கை வாழ்ந்து கொண்டிருக்கும் ஒவ்வொருத்தரும் சிறு வயதில் டான்சராக, பாடகராக, விளையாட்டு வீரராக வரவேண்டும் என்று பல கனவுகளோடு இருந்திருப்பார்கள்.சொல்லப்போனால், அதற்குரிய திறமையும் அவர்களிடத்தில் இருந்திருக்கும். குடும்ப சூழ்நிலை காரணமாக காலப்போக்கில் அந்த கனவு கலைந்திருக்கும். ஆனால் மனசுக்குள் அந்த கனவு அப்படியே உறங்கிக் கொண்டிருக்கும்.

அப்படி கனவு நிறைவேறாத ஒரு தந்தை. அவரிடம் உள்ள திறமையை வெளியே கொண்டு வர நினைக்கிறார் மகள். அதற்காக தன் தந்தையை ரியாலிட்டி ஷோவில் கலந்துகொள்ள ஏற்பாடு செய்கிறார். அதை தனது பிறந்த நாள் பரிசாக தரவேண்டும் என்று தந்தையிடம் கோரிக்கை வைக்கிறார். அதை நிறைவேற்ற தந்தை முயற்சி செய்கிறார். அந்தப் பயணத்தில் வரும் சவால்களை சந்திச்சு அவர் எப்படி வெற்றி பெறுகிறார் என்பதுதான் படம்.