கண்களில் பிரகாசம் மின்ன பேசிய நூறு வயதைக் கடந்த குட்டியம்மாளின் குரலில் இருந்த உற்சாகம் அந்தக் காடு அவரது வாழ்வில் எந்தளவு பின்னிப் பிணைந்துள்ளது என்பதை வெளிக்காட்டியது.இஞ்சிக்குழி - இது ஏதோ ஒரு பலகாரத்தின் பெயரல்ல. மேற்குத் தொடர்ச்சி மலைத்தொடரில் உள்ள பொதிகை மலையின் அடர்ந்த சோலைக்காட்டுக்குள் ஒளிந்து கிடக்கும் ஒரு சிறிய காணி குடியிருப்பு. 

மொத்தமாய் இப்போது 3 வீடுகள் மட்டுமே எஞ்சியுள்ள இங்கு, ஒரு மண் வீட்டில் தன்னந்தனியாய் வசிக்கிறார் நூறு வயதைக் கடந்த குட்டியம்மாள் காணி.நெல்லை மாவட்டம் பாபநாசம் கோயிலிலிருந்து 16 கிலோமீட்டர் தூரம் வனப்பகுதியில் பயணித்தால் பிரிட்டீஷாரால் 1942ல் கட்டப்பட்ட காரையாறு அணைப்பகுதியை அடையலாம். 

மேற்குத் தொடர்ச்சி மலையில் உற்பத்தியாகும் தாமிரபரணி, காரையாறு, பாம்பாறு, உள்ளாறு, சேர்வலாறு மற்றும் ஏராளமான சிற்றாறுகள் வற்றாமல் பாய்ந்தோடி வந்து இந்த அணையில் சேர்கின்றன. 

இவற்றில் பூங்குளத்தில் உற்பத்தியாகும் தாமிரபரணி அடர்ந்த சோலைக்காடுகள் வழியாக பாய்ந்தோடி பாணதீர்த்தம் அருவி வழியாக நேரடியாக அணையில் கலக்கிறது.

காட்டு வழியில் நாம் பாதை தவறி விடக்கூடாது என்பதால் ரேஞ்சர் கல்யாணி, பாரஸ்டர் பெத்துராஜ் அறிவுறுத்தலின்படி வழிகாட்ட கூட வந்தார்கள் வனக்காப்பாளர்கள் அசோக்குமார், வினு, வாட்ச்சர் சுடலைமணி செல்வம், சூழல் சுற்றுலா சுமன் மற்றும் அஜித்குமார். 

வழியில் ஈரத்தோடு காணப்பட்ட ஒரு மிருக எச்சத்தைக் காட்டி, ‘இது சிறுத்தையின் எச்சம்’ என்றார்கள் சர்வசாதாரணமாக! பல கிலோமீட்டர் தூரம் கடந்ததும் வருகிறது கட்டளை மலை எஸ்டேட். அங்கிருந்து துவங்குகிறது கன்னிகட்டி வனப்பகுதி. 

ஆதிகாலத்தில் மனித நடமாட்டத்தை அறிந்திராத இப்பகுதி ஆங்கிலேயர்களின் ஆட்சிக்காலத்தில் அவர்களின் விருப்பப் பகுதியானது. இந்த சோலைக்காடுகளில் ஏற்கனவே பருத்து வளர்ந்திருந்த செங்குறிஞ்சி, ஈட்டி, கோங்கு, குங்கிலியம் உள்ளிட்ட அரியவகை மரங்கள் ஒருவித ஆர்வத்தை கொடுத்தன. 

இதையடுத்து அடர்ந்த காடுகளின் வேறு பகுதிகளில் வாழ்ந்த காணி இன மக்களை தாமிரபரணி பாயும் மலையின் கிழக்குச் சரிவிற்கு அழைத்து வந்து, ஆண்டு முழுவதும் வற்றாமல் சீறிப்பாயும் தாமிரபரணியின் இரு கரைகளில் பெரிய மைலாறு, இஞ்சிக்குழி பகுதிகளில் காணி மக்களை குடிமயர்த்தினர். 

மேற்குத் தொடர்ச்சிமலையின் அகத்தியமலைச் சரிவில் மட்டுமே அதிகம் காணப்படும் செங்குறிஞ்சி மரங்கள் சுமார் 35 மீட்டர் உயரம் வரை வளர்பவை. செம்மரங்களைப் போலவே காட்சியளிக்கும் இந்த மரங்கள் இங்கிருந்து அதிகம் இங்கிலாந்திற்கு கொண்டு செல்லப்பட்டன.

காணி மக்களின் இஷ்ட தெய்வமாக விளங்கும் அகத்தியர் வீற்றிருக்கும் பொதிகை மலையையும், அதன் அருகே அமைந்துள்ள ஐந்தலை பொதிகை, நாக பொதிகையையும் இங்கிருந்தே வணங்கும் காணிகள், ஆண்டின் குறிப்பிட்ட நாட்களில் மட்டும் சுமார் 8 கிலோமீட்டர் தொலைவு கடும் மலையேற்றத்திற்குப் பின் பொதிகை உச்சிக்கு சென்று அகத்தியரை வணங்கி வந்துள்ளனர்.  

காட சுத்தி ஏழ்ல கிழங்கு, பலா, பாக்கு, கிராம்பு, தென்ன, மொளகு, காந்தாரி மொளகால்லாம் போட்ருப்போம். காடூட போயி தேனெடுப்போம். ஆத்துல தூண்டி போட்டு மீனெடுப்போம். இந்த மலைலே எங்கட கால் படாத இடமே கெடயாது. 

அவரு போனதக்கப்பம் இந்த வீடோட மொடங்கிட்டேன். காட்டுல கெடச்சத கொண்டாந்து புள்ளைங்க தந்தத தின்னிட்டிருந்தேன். அப்பதாம் கலேட்டரு (கலெக்டர்) விஷ்ணு வந்தாரு. அவர எங்கட சாமிதான் அனுப்பிச்சதுன்னு நெனக்கேன். நா இருட்டுல கெடக்கத பாத்து இந்த வௌக்க தந்தாரு...’’ என அங்கிருந்த சோலார் விளக்கை கை காண்பித்தார். 

‘‘அப்புறோம் எனக்கு மாசந்தோறும் ஆயிர ரூவா தரச்சொன்னாரு. காயிதக்காரு கிறிசுதுராசா எனக்காக அத நடந்து கொண்டாந்து தாராரு. அத வச்சிக்கிட்டும், கீழ ரேசன் கடேலிருந்து மவன் கொண்டாந்து தார அரிசியும்தான் வாழ ஒதவுது. 

ஒரு நா சோறு பொங்கிட்டு அத 2 நாளுக்கு வச்சிக்குவம். சமைக்க தண்ணீ, வெறவு கிடைக்கி. காய்கறி கெடைக்காது. எனக்கு கவலயில்ல. இந்தாருக்க காட்டு ஆபீசருட்ட சொன்னா சீனி, தேயிலை கொண்டாந்துரும். பக்கத்துல புளிப்பு ஆரெஞ்சி, தேங்கா, பாக்கு இருக்கு. போதுமில்லா? 

நா இருக்கனானு அது பாக்க வருதுன்னு நெனச்சிப்பேன். நா வூட்டுலர்ந்து குரல் கொடுப்பேன். செத்த நேரத்துல அது போயிரும். தினைக்கும் யான சத்தம் கேட்காம என்னால இருக்க முடியாது.