‘‘இன்னைக்கு உலக அளவுல 174 மொழிகளில் அகராதிகள் ஆன்லைனில் வருது. அதில் தமிழுக்கான இடம் 23 ஆக இருந்துச்சு. இப்ப அதை நான் ஏழாவது இடத்துக்குக் கொண்டு வந்திருக்கேன்.  

இதில் அறிவியல் அகராதிகள், ஆட்சிச் சொல்லகராதிகள், இலக்கிய அகராதிகள், கணிதவியல் அகராதிகள், கலை, வாழ்வியல் அகராதிகள், கல்வெட்டியல் அகராதி, சட்டவியல் அகராதி, பண்ணை அறிவியல் அகராதிகள், பொறியியல் அகராதிகள், பல்துறை அகராதிகள், மருத்துவ அகராதிகள், வணிகவியல் அகராதிகள் என 160 துறைகளுக்கு 72க்கும்  மேற்பட்ட அகராதிகளைத் தந்துள்ளார்.  

இதனுடன் பழமொழிகளுக்கென ஐந்து அகராதிகளும், விடுகதைகளுக்கென்று இரண்டு அகராதிகளும், திரைப்படத் தரவுகளுக்கு ஒரு அகராதியும், தமிழ் இதழ்களின் தரவுகளுக்கு ஒரு அகராதியும், தமிழ் நூல்களின் தரவுகளுக்கு ஒரு அகராதியும் என ஒட்டுமொத்தமாக 80 அகராதிகள் இருக்கின்றன.

அதாவது இத்தளத்தின் தேடுபொறியில் ஒரு சொல்லினை உள்ளீடு செய்தால் அச்சொல் எண்பது அகராதிகளிலும் தேடப்பட்டு அதன் விளக்கங்கள் முழுமையாக அளிக்கப்படும் வகையில் அமைக்கப்பட்டுள்ளது. 

அது பழமொழியாக, விடுகதையாக, நூல் தரவாக, திரைப்படமாக, இலக்கியமாக என எப்படியிருந்தாலும் இதில் தேடித் தரவுகளைப் பெற முடியும்.   

அப்புறம் 1802ம் ஆண்டிலிருந்து தமிழ் இதழ்களுக்கான தரவுகள் என்னிடம் இருக்கு. அப்படியாக தமிழில் வந்த 5,000 இதழ்களுக்கான தரவுகள் கொடுத்திருக்கேன். குறிப்பா ‘குங்குமம்’, ‘முத்தாரம்’, ‘சுமங்கலி’, ‘வண்ணத்திரை’, ‘தினகரன்’, ‘முரசொலி’, ஐயா கலைஞர் அவர்கள் நடத்தின கையெழுத்து பத்திரிகைனு என் சேகரிப்புல ஆயிரம் இதழ்களை அச்சுப்படியாகயும் வச்சிருக்கேன். 

அதேபோல் அகராதிகள், நூல்கள் உள்ளிட்டவற்றின் தரவுகளை இணையத்துல வெளியிடுவது மட்டுமில்லாமல் அதைத் தேடுபொறிக்கு உகந்ததாக, அதாவது சர்ச் எஞ்சினுக்கு உதவியாகக் கொண்டு வரும் வேலையைச் செய்திருக்கேன்...’’ என நம்பிக்கையுடன் குறிப்பிடுகிறவர், தொடர்ந்து பேசினார். 

‘‘இந்த அகராதி எப்படி செயல் படுதுன்னா, இப்ப உங்களிடம் ரெண்டு ரேக் முழுவதும் புத்தகங்கள் இருக்குனு வைப்போம். அது ரெண்டு லட்சம் பக்கங்கள் வரும் இல்லையா. இந்த ரெண்டு லட்சம் பக்கங்களில் ஒரே சொல்லுக்கான கலைச்சொல்லும், விளக்கங்களும் தேடுங்கனு சொன்னால் குறைஞ்சது உங்களுக்கு ரெண்டு ஆண்டுகளாகும்.

இப்போ நாம் ஒவ்வொரு நூலுக்கும் அந்த நூலின் பேர் என்ன, ஆசிரியர் யார், பதிப்பகம் என்ன, நூல் வெளியான ஊர், அந்த நூல் எது சம்பந்தமானது, அந்த நூலின் மொழிபெயர்ப்பாளர் யார், மறுபதிப்பு என்னனு எல்லா விவரங்களையும் கொண்டு வர்றோம். 

உதாரணத்திற்கு, ‘பராசக்தி’ என்ற பேர்ல எத்தனை புத்தகம் தமிழில் வந்ததுனு தேட விரும்புறீங்கனா, எல்லா தரவுகளையும் தந்திடும். இது தொடர்பா அந்த எல்லா புத்தகங்களும் நொடிப் பொழுதில் பார்க்கும் பொழுது, நீங்க அதுகுறித்து ஆய்வை முன்னெடுக்க வசதியா இருக்கும். 

அப்புறம், இந்த நூல் எங்க கிடைக்கும் என்கிற லோகேஷனையும் கொடுக்கிறேன். அடுத்து எந்தத் துறையைச் சேர்ந்த புத்தகத்தையும் தமிழ்ல என் அகராதி மூலம் மொழிபெயர்ப்பு செய்யமுடியும்.