பொதுவாக ஹாலிவுட் படங்களில் டைனோசர், இயந்திர மனிதர்கள் மற்றும் வேற்று கிரக வாசிகளுக்கும் மனிதர்களுக்கும் இடையில் சண்டை ஏற்படும்போது மனிதர்கள்தான் வெற்றி பெற வேண்டும் என்று ரசிகர்கள் விரும்புவார்கள்.

மனிதர்கள் வேற்றுகிரக வாசிகளையோ அல்லது டைனோசர்களை வெற்றிப் பெறும்போது ஆர்ப்பரிப்பார்கள். இதற்கு மாறாக உலகில் முதல்முறையாக, மனிதர்கள் தோல்வியடைய வேண்டும்; கொல்லப்பட வேண்டும்  என்று ரசிகர்கள் விரும்பிய படம் ‘அவதார்’தான். 

வரும் டிசம்பர் 19ம் தேதி ‘அவதார்: ஃபயர் அண்ட் ஏஷ்’ எனும் மூன்றாம் பாகம் வெளியாகிறது. அதற்கு முன்பு இரண்டு பாகங்களுக்கும் திரும்பிப் பார்ப்போம். 

அவதார்சினிமா தொழில்நுட்பத்தில் பெரும் புரட்சி செய்த படம் இது. ‘அவதாரு’க்கு முன்பு அப்படியான தொழில்நுட்பத்துடன் கூடிய இன்னொரு படம் வந்ததே இல்லை.  

ஆனால், ‘அவதாரி’ன் 3டி செய்த மாயாஜாலத்தை உலகமே கொண்டாடியது. மட்டுமல்ல, ‘அவதாரு’க்குப் பின் ஏராளமான படங்கள் 3டியில் வெளியாகின. உண்மையில் 3டி படம் எப்படியிருக்கும் என்பதை உணர்த்திய முதல் படம் ‘அவதார்’தான். மட்டுமல்ல, சினிமா வரலாற்றில் 3டி கேமராவில் படமாக்கப்பட்ட முதல் படமே ‘அவதார்’தான். 

படத்துக்கான தொழில்நுட்பங்கள் எல்லாம் தயாராக சில வருடங்கள் காத்திருந்தார் ‘அவதார்’ இயக்குநர் ஜேம்ஸ் கேமரூன். எல்லாம் தயாரான பிறகும் கூட, முன் தயாரிப்புடன் முதல் படம் வெளியாகும் வரைக்கும் நான்கு வருடங்கள் தேவைப்பட்டிருக்கிறது. படம் வெளியாகி, திரையரங்கில் ஓடிய பிறகும் கூட மக்கள் மத்தியில் ‘அவதாரு’க்கான மவுசு குறையவே இல்லை. 

படத்தில் நடித்தவர்களுக்கும், ஜேம்ஸுக்கும் கூட படம் எப்படி வரப்போகிறது என்பதை முன்பே தீர்மானிக்க முடியவில்லை. அந்தளவுக்கு முன்பின் யாருமே பயணிக்காத ஒரு பாதையில் நடந்து அற்புதத்தைக் கண்டடைந்திருக்கிறார் ஜேம்ஸ். அதனால்தான் மொழி, நாடு என எல்லாவற்றையும் கடந்தது அனைத்து மக்களையும் ஈர்த்தது ‘அவதார்’. 

‘அவதார்: த வே ஆஃப் வாட்டர்’கடந்த டிசம்பர் 2009லேயே இரண்டாம் பாகத்தை எடுக்கப் போவதாக அறிவித்தார் ஜேம்ஸ் கேமரோன். முதல் பாகத்தைப் போலில்லாமல், இரண்டாம் பாகத்தை விரைவாக எடுத்து, 2015ல் வெளியிடுவது அவரது திட்டம். 

முதல் பாகமான ‘அவதார்’ ஒரு பில்லியன் டாலர் வசூலை எட்டுவதற்கு 19 நாட்கள் தேவைப்பட்டது. ஆனால், இரண்டாம் பாகமோ 14 நாட்களிலேயே ஒரு பில்லியன் டாலரை எட்டிவிட்டது.  இந்திய மதிப்பில் ஒரு பில்லியன் டாலர் என்பது 8,995 கோடி ரூபாய். ‘அவதார்: த வே ஆஃப் வாட்டரின்’ கதை எளிமையானது. 

பண்டோராவின் காடுகளில் மகிழ்ச்சியாக வாழ்ந்து வருகிறது ஜேக் சல்லியின் குடும்பம். மனிதர்களால் உண்டான பழைய பிரச்னை ஒன்று விஸ்வரூபம் எடுக்கிறது. இதிலிருந்து தப்பிக்க, நீரில் வாழும் இனத்துடன் அடைக்கலமாகுகிறது ஜேக்கின் குடும்பம். நீர் வாழ் மக்களுடன் சேர்ந்து மனிதர்களை எப்படி ஜேக் எதிர்க்கிறார் என்பதே இதன் கதை. 

இந்த உலகத்திலிருந்து நீரினாலான இன்னொரு உலகத்துக்கு அழைத்துச் சென்று அங்கேயே மூன்று மணி நேரம் வாழ்ந்த மாதிரி ஓர் அனுபவத்தைக் கொடுத்திருப்பார் ஜேம்ஸ் கேமரோன்.  

திமிங்கிலத்திலிருந்து எடுக்கப்படும் ஓர் அரிய பொருள் பல கோடிகளுக்கு விற்பனை செய்யப்படுகிறது. அதிக நாட்களுக்கு உயிர் வாழவும், என்றும் இளமையாக இருக்கவும் அந்தப் பொருளைப் பயன்படுத்தப்படுகிறது. 

இதற்காகவே திமிங்கலங்கள் வேட்டையாடப்படுவதாகச் சொல்கின்றனர். இந்த திமிங்கல வேட்டையை அட்டகாசமாகப் பதிவு செய்திருக்கிறது இந்தப் படம். 

‘டைட்டானிக்’ புகழ் கேட் வின்ஸ்லெட், ரொனால் என்ற முக்கிய கதாபாத்திரத்தில் நடித்திருந்தார். நீருக்கடியிலான சண்டைக்காட்சிகளை டூப் இல்லாமல் வின்ஸ்லெட்டே செய்திருக்கிறார். 

அதனால் கேமரா குறித்த பரிசோதனைகளில் இறங்கினார் ஜேம்ஸ். ‘சோனி’ நிறுவனம் ஜேம்ஸுக்கு உதவ முன்வந்தது. ஜேம்ஸுடன் இணைந்து ‘வெனிஸ்’ என்ற கேமராவை வடிவமைத்தது, ‘சோனி’. 

இக்கேமராவின் மூலமாக ‘அவதார் 2’ மற்றும் இம்மாதம் வெளியாகும் ‘அவதார் 3’யையும் படமாக்கியிருக்கிறார் ஜேம்ஸ். தொழில்நுட்ப ரீதியாக புதுமையைப் படைத்ததோடு மட்டுமல்லாமல், இப்படத்துக்காக உயிரைப் பணயம் வைத்து ஆய்வுகளைச் செய்திருக்கிறார்.

பூமியிலேயே ஆழமான கடல் பகுதியான மரியானா டிரெஞ்சுக்குள் சென்று ஆய்வுகளைச் செய்திருக்கிறார் ஜேம்ஸ். அங்கே கண்ட காட்சிகளை முன் மாதிரியாக வைத்து, இப்படத்துக்கான நீர்நிலை உலகை வடிவமைத்திருக்கிறார். 

தவிர, விக்டோரியா பல்கலைக்கழகத்தைச் சேர்ந்த பவளப்பாறை உயிரியல் துறையைச் சேர்ந்த நிபுணர்களுடன் கலந்துரையாடி, படத்தில் வரும் கடல் உயிரினங்களை வடிவமைப்பு செய்திருக்கிறார் ஜேம்ஸ். அதனால்தான் படத்தில் வரும் உயிரினங்கள் நம்பகத்தன்மையுடன் இருந்தன.