கல்லீரல் நோய் முற்றி ‘துள்ளுவதோ இளமை’ புகழ் நடிகர் அபினய் இறந்திருப்பது பேசு பொருளாகி இருக்கிறது. கல்லீரல் நோய் என்றாலே அது மது அருந்துவதால்தான் வந்திருக்கும் என்று பலரும் நினைக்கின்றனர். 

இருபது வருடங்களுக்கு முன்பு, கல்லீரல் நோய் என்று ஒருவர் வந்தால் அவர் அளவுக்கு மீறி மது அருந்தியதால் அவருக்கு கல்லீரல் நோய் வந்திருக்க நூற்றுக்கு நூறு சதவிகிதம் வாய்ப்பு அதிகம். ஆனால், இப்போது கல்லீரல் நோய் ஏற்படுவதற்கு மது மட்டுமே காரணமன்று. மதுவுடன் சேர்த்து அதிக மாவும், இனிப்பும், உடல் உழைப்பின்மையும் உறக்கமின்மையும் மன அமைதியின்மையும் காரணமாகி இருக்கின்றன. 

ஆம். கல்லீரலை பாதிக்கும், கல்லீரலில் கொழுப்பு படியும் நோய் இரண்டு வகைப்படும். முதல் வகை மதுவினால் ஏற்படுவது. இது ‘ஆல்கஹாலிக் ஃபேட்டி லிவர் நோய்’. இரண்டாவது வகை மது அல்லாத காரணங்களால் ஏற்படும் ‘ஃபேட்டி லிவர் நோய்’. 

வளர்சிதை மாற்ற காரணிகளால் இந்த நோய் ஏற்படுவதால் இது ‘MAFLD’ (Metabolic Associated Fatty Liver Disease) என்று அழைக்கப்படுகிறது.பெரும்பாலும் நாற்பதுகளை நெருங்கும் /தாண்டிய ஆணோ, பெண்ணோ அல்ட்ரா சவுண்ட் ஸ்கேன் எடுக்கும் போது தற்செயலாக ‘ஃபேட்டி லிவர்’ கண்டுபிடிக்கப்படும்.

இப்போது இந்த நோய் இருபது முதல் முப்பது வயது மக்களுக்கும் தென்பட ஆரம்பித்திருக்கிறது. உங்களது அல்ட்ரா சவுண்ட் ஸ்கேன் ரிப்போர்ட்டில் Fatty liver ( grade 1 /2) என்று குறிப்பிடப்பட்டிருக்கலாம். அல்லது Hepatomegaly with fatty changes என்று குறிப்பிடப்பட்டிருக்கலாம். 

கல்லீரலில் அதிகமான கொழுப்பு தேங்குவதால் ஏற்படும் நிலைதான் இந்த ‘கல்லீரலில் கொழுப்பு படியும் நோய்’. நிறைய பேருக்கு தற்செயல் கண்டுபிடிப்பாக தென்படுவதால் இது ‘நார்மல்’ என்று ஆகிவிடாது. கல்லீரல் அடிவாங்குகிறது என்பதால், அது எழுப்பும் கூக்குரலாகவே இந்த நோயைக் கருத்தில் கொள்ள வேண்டும். 

பொதுவாக கல்லீரல் ஒரு கல்லுளி மங்கன் போன்ற உறுப்பு. எதற்கும் அசையாத ஸ்ட்ராங்கான ஓர் உறுப்பு. தான் உண்டு, தன் வேலையுண்டு என்று அதன் வேலையைப் பார்க்கும். 

இப்படி தேவைக்கு மீறி மாவு இருந்தும் தினமும் யாரோ ஒருவர் மாவு / பரோட்டா என வாங்கி வந்துவிட்டால் நம் அம்மா என்னதான் செய்வார் பாவம்... ஃப்ரிட்ஜும் ஓர் அளவுக்கு மேல் இடம் கொள்ளாது. ஒரு கட்டத்துக்கு மேல் கிச்சனே அலங்கோலமாகி விடும். இந்த சினாரியோவை நமது கல்லீரலுக்கும் சிந்தித்துப் பாருங்கள்.மாவுச்சத்து ஒரு வரைமுறைக்குள் இருந்தால் உடல் அதை சக்திக்கு உட்கொண்டுவிடும். அது வரம்பு மீறிச் சென்றால் நம் கல்லீரல் அதைக் கொழுப்பாக மாற்றி தொப்பையில், தொடை, இடுப்பு, மார்பு பகுதிகளில் சேமிக்கும். 

உங்கள் கல்லீரலில் கொழுப்பு படிவதைப்பார்த்தவுடன் நீங்கள் உண்ணும் மாமிசம் / முட்டை / பால் போன்றவற்றை  நிறுத்தி விட்டு அதற்குப்பதிலாக அதிகமாக சோறு / கோதுமை / மைதா என்று உண்பீர்களானால் நிச்சயம் உங்களது ஃபேட்டி லிவர் பிரச்னை குறையாது. 

அதிகமாகவே செய்யும். ஃபேட்டி லிவர் பிரச்னையில் கொழுப்பு கல்லீரலில் படிவதால், இந்தக் கொழுப்பு படிந்துள்ள இடங்கள், நார்மல் கல்லீரலை விட அதிக ஒலி அலையை பிரதிபலிக்கும். அதனால் அந்த இடங்கள் நார்மல் கல்லீரலை விட பழுப்பாகவோ கருப்பாகவோ இருக்கும். 

இந்த கல்லீரலில் படியும் கொழுப்பானது, பின்னாளில் கல்லீரலில் பாதிப்பை ஏற்படுத்தி மது அருந்தாதவர்களுக்கு வரும் கல்லீரல் கொழுப்பு படியும் நோயாக மாறலாம் (NonAlcoholic Steato Hepatosis). 

இதை சுருக்கமாக NASH என்று அழைக்கிறோம். இத்தகைய நிலையில், கல்லீரல் செல்கள் தொடர்ந்து இடர்ப்பாட்டுக்கு உள்ளாகி மரணமடைந்து தழும்புகளாக மாறிவிடும். 

இது பின்னாளில் கல்லீரல் புற்றுநோய் அல்லது கல்லீரல் செயலிழப்பு வரை இட்டுச்செல்லும் ஆபத்து இருக்கிறது.நம்மை பயமுறுத்தும் செய்தி யாதெனில் மேலை நாடுகளில் இருபது வயதைக்கூட எட்டாத பள்ளி செல்லும் பிள்ளைகளிடம் செய்த ஆய்வில் அவர்களில் பெரும்பாலானோருக்கு, மது அருந்தாதவர்களுக்கு ஏற்படும் ஃபேட்டி லிவர் இருப்பது கண்டுபிடிக்கப்பட்டுள்ளதுதான். 

புரதச்சத்து மிக்க, கொழுப்புச் சத்து குறைவான, மாவுச்சத்து குறைவான உணவு முறை பரிந்துரைக்கப்படுகிறது. மது, சிகரெட் போன்ற தீய பழக்கங்கள் இருப்பின் அவற்றை விட்டொழிக்க வேண்டும். 

தினமும் ஒரு மணிநேரம் நடைப் பயிற்சி, எட்டு மணிநேர உறக்கம், மன அமைதி பேணும் வாழ்வியல்... இவையும் கல்லீரல் நலம் பேண முக்கியம். சிரோசிஸ் என்பது முடிவுரை அன்று. முறையான மருத்துவ சிகிச்சைகள் மூலமும் கண்காணிப்பு மற்றும் சிறப்பான கவனிப்பு  மூலமும் சிறந்த வாழ்வையும் ஆயுள் நீட்சியையும்  உறுதி செய்ய முடியும்.