இந்த ரயிலில் மட்டும் பயணிகளுக்கு மூன்று வேளை உணவும் இலவசம்!

பொதுவாக நாம் தொலைதூர ரயில் பயணங்கள் என்றால் ஒன்று உணவை வீட்டிலேயே தயார் செய்து கையுடன் எடுத்துச் செல்வோம்; அல்லது வழியில் உள்ள ரயில் நிறுத்தங்களிலோ, ரயிலின் உள்ளே கொண்டு வரப்படும் உணவுகளையோ விலை கொடுத்து வாங்கி உண்போம். இதுவே, ‘வந்தே பாரத்’, ‘ராஜதானி’, ‘தேஜாஸ்’ போன்ற விரைவு ரயில்களில் டிக்கெட் ரிசர்வ் செய்யும்போதே உணவுக்கான கட்டணத்தைச் செலுத்தும் ஆப்ஷன் இருக்கின்றன. அவ்வளவே!  

ஆனால், இவை எதுவும் இல்லாமல் இந்தியாவில் ஒரேயொரு விரைவு ரயிலில் மட்டும் மூன்று வேளை உணவும் பயணிகளுக்கு இலவசமாக வழங்கப்படுகிறது. அதுவும் சுமார் முப்பது ஆண்டுகளாக இந்த சேவை தொடர்வது சமீபத்தில் வைரலாகி இருக்கிறது. அந்த விரைவு ரயிலின் பெயர், ‘சச்கண்ட் எக்ஸ்பிரஸ்’ (Sachkhand  Express). மகாராஷ்டிராவின், நான்தேட் நகருக்கும் பஞ்சாப்பின் அமிர்தசரஸிற்கும் இடையே தினசரி இந்த ரயில் இயக்கப்படுகிறது. 

அதாவது நான்தேட்டில் உள்ள ஹசூர் சாஹிப் குருத்வாராவையும், அமிர்தசரஸில் உள்ள பொற்கோயிலையும் இணைக்கும் விதமாக இந்த ரயில் இயங்குகிறது. நான்தேட்டில் இருந்து சுமார் 2000 கிலோமீட்டர் தொலைவில் உள்ளது அமிர்தசரஸ். இவற்றுக்கு இடையிலான பயண தூரம் 33 மணிேநரம். காலை 9.30 மணிக்கு கிளம்பும் இந்த ரயில் மறுநாள் இரவு 9.30 மணிக்கு செல்கிறது. வழியில் மொத்தம் 39 ரயில் நிலையங்களைக் கடக்கிறது. 

இந்த ரயிலில் சாதாரண பொதுப் பெட்டிகளும், படுக்கை வசதி கொண்ட பெட்டிகளும், ஏசி பெட்டிகளும் இருக்கின்றன. இதிலுள்ள அனைத்து பயணிகளுக்கும் எந்த வேறுபாடும் இல்லாமல் ஒரே மாதிரியான தரம் நிறைந்த உணவு இலவசமாக வழங்கப்படுகிறது.இதில் அரிசி சாதம், பருப்பு, கொண்டக்கடலை மசாலா, கிச்சடி, உருளைக்கிழங்கு மற்றும் காலிஃப்ளவரில் செய்த பொரியல் என வெரைட்டியாகத் தரப்படுகின்றன.